1 Hari 18 - Hanunuu

Utru Napatutuuhanan kuntay Tutuu Purupita Diyus si Ilyas

¹ Tulu yi ka timpu unman may uran. Pagka sa usa ka sirang, magkun ti Panginuun sa kan Ilyas, “Paglakaw yi kawu ag pagpasampak sa kan Akab, dahil pauranun yi niku.”

² Nakan nag-atag si Ilyas sa kan Akab. Masyadu ti lun-us sa Samarya.

³ Nakan ipinatawag ni Akab si Ubadyas, imaw ti manug-asikasu sa balay hari niya. (Si Ubadyas lubus maggalang sa Panginuun.

⁴ Pagka pagmatyun ni Hisibil ti manga purupita Panginuun, itinagu niya ti 100 purupita sa duwa ka lukib, 50 kada lukib, ag pinakan-an niya sida karan-unun hanggan danum.)

⁵ Magkun si Akab sa kan Ubadyas, “Atagun nita ti manga bulbugan hanggan luung sa kanta nasyun, barang nangus may makitan kita manga ilamnun para sa kanta manga kabayu ag manga mula, hampay balaw yi nita sida kailangan matyun.”

⁶ Nakan tinunga nida duwa kanda atagan pag rugar. Rargu sida nag-atag sa kanda pag tuyuun.

⁷ Habang maglakaw si Ubadyas, nasulang niya si Ilyas. Nakilala niya si Ilyas nakan yinmuk-ub siya bilang paggalang ag magkun, “Kawu aw duy tunda, Ilyas?”

⁸ Sinmagut si Ilyas, “Hu. Taynguna, paglakaw yi kawu ag sabihun nimu sa kanmu amu sa kan Akab kuntay atay aku.”

⁹ Dapat magkun si Ubadyas, “Danga duy nimu ipauli sa kadamhakan kang buhi sa kan Akab, dahil unman waydi aku may nabwat salan sa kanmu.

¹⁰ Magsabi duy aku kay tutuu sa atubangan buhi pag Panginuun kanmu Diyus, unman may nasyun ngatay kaharian ti unman pinadarahan niku amu manga tawu hampay hanapun kawu. Nu pagsabihun manga takinan manga nasyun hanggan manga kaharian kuntay unman kawu sa kanda rugar, pagpasumpaun waya ni Akab sida kuntay balaw ungud nida kawu nakitan.

¹¹ Ag taynguna, pagsuguun waya nimu aku pag-atag sa kang amu ag sabihun sa kanya kuntay atay kawu?

¹² Kabitay nangus nu sa pag-ighit niku daran-un kawu Ispiritu Panginuun sa rugar balaw niku alam? Nu rumas-ug si Akab sitay unman lagan kawu, matyun niya aku. Ilyas, daan di ginan sa anak waya aku magsirbi yi aku sa Panginuun.

¹³ Balaw aw nimu nabaritaan kang binwat katpung pagmatyun ni Hisibil ti manga purupita Panginuun? Itinagu niku ti 100 ka purupita Panginuun sa duwa ka lukib, 50 sa kada lukib, ag pinakan-an niku sida karan-unun hanggan danum.

¹⁴ Ag taynguna pagsuguun nimu aku pag-atag sa kang amu ag sabihun sa kanya kuntay atay kawu? Matyun niya aku!”

¹⁵ Magkun si Ilyas, “Magsumpa aku sa buhi pag Panginuun Makamaskihan, kang pagsirbihan, pumasampak aku sa kan Akab kainda pag sirang.”

¹⁶ Nakan inmatag si Ubadyas sa kan Akab ag magkun sa kanya kuntay ati si Ilyas, ag linmakaw si Akab hampay pumasampak sa kan Ilyas.

¹⁷ Pagka nakitan ni Akab si Ilyas, “Kawu aw ungud tunda, ti magpan-gulu sa Israil?”

¹⁸ Sinmagut si Ilyas, “Balaw aku ti magpan-gulu sa Israil, nu unman kawu hanggan ti magtal-anakan nimu ama. Dahil dinayu niyu ti manga sugu Panginuun ag sinamba niyu ti manga histuda diyus-diyusan Baal.

¹⁹ Taynguna, tipuna nimu ti tanan nasakupan Israil hampay ibahan nida aku sa Bantud Karmilu. Ag paataga diman nimu ti 450 ka manga purupita ni Baal hanggan ti 400 ka purupita ni Asira, ti pagpakan-un ni Hisibil.”

²⁰ Nakan tinipun ni Akab ti tanan nasakupan Israil hanggan ti manga purupita sa Bantud Karmilu.

²¹ Nagpakarani si Ilyas sa manga tawu ag magkun, “Tugka waya lugud kapira kamu pag magtalinduwa? Nu ti Panginuun ti tutuu Diyus, sundun niyu siya, dapat nu si Baal ti tutuu Diyus, sundun niyu inda.” Dapat unman sinmagut ti manga tawu.

²² Magkun maan si Ilyas sa kanda, “Aku wadi ti nasawad sa manga purupita Panginuun, dapat si Baal may imaw 450 ka purupita.

²³ Taynguna, daran-i niyu kami duwa ka tudu baka. Bag-u pagpili ti manga purupita ni Baal kanda iyawun ag ipauli inda sa babaw pamagba, dapat balaw inda pamaktan. Katida diman ti buwatun niku sa usa ka tudu baka; ipauli diman niku inda sa babaw pamagba ag balaw diman niku inda pamaktan.

²⁴ Pagkatapus, mandarangin kamu sa kanyu diyus, ag mandarangin diman waydi aku sa kang Panginuun. Ti sumagut sa panab-anan apuy imaw ti tutuu pag Diyus.” Ag pinmaangay ti manga tawu.

²⁵ Magkun si Ilyas sa manga purupita ni Baal, “Kamu ti pag-una, dahil mayamu kamu. Pagpili kamu tudu baka ag ialistu niyu. Pagdarangin kamu sa kanyu diyus, dapat danga niyu pagpamakti apuy ti pamagba.”

²⁶ Nakan bin-ul manga purupita ni Baal ti dinara sa kanda pag tudu baka ag iinalistu. Pagkatapus, nandarangin sida sa kan Baal ginan surip tugka sa karaw-an sirang. Magringgit sida, “Baal, saguta nimu kami!” Magsayaw-sayaw waya gid sida sa sangput nida binwat harandugan. Dapat unman gid may sinmagut.

²⁷ Pagka karaw-an yi sirang, pagsurugun yi sida ni Ilyas. Magkun siya, “Sigi kusgi waya niyu ti pagringgit, kabay diyus diman siya! Barang mag-isip lang siya ngatay magpahari, aw ngatay may inatagan, ngatay naturugan lang ag kailangan pulawun.”

²⁸ Nakan nagringgit waya gid sida mabisug ag biniyagan bangkaw hanggan baladaw kanda manga bilug angay sa urugaliun nida, tugka sa binmulus ti manga dugu.

²⁹ Pagkalawuy karaw-an sirang, parargu di gid kanda magringgit tugka sa linmawuy yi ti tagka pag udas sa paghandug, dapat unman gid may sinmagut sa kanda.

³⁰ Nagbagaw si Ilyas sa tanan tawu, “Pagpakarani kamu sa kangku.” Ag nagpakarani ngani ti manga tawu sa kanya. Hiniwat niya ti harandugan Panginuun, nagba yi.

³¹ Binmuul siya 12 ka batu, tanda 12 ka linahi manga anak ni Hakub, ti tawu pinaingarnan Panginuun Israil.

³² Binwat niya harandugan ti manga batu para sa Panginuun ag binuwatan kanal sa kay sangput harandugan. Tunda pag kanal mahimu paulian tulu ka galun danum.

³³ Hiniwat niya mayad ti manga pamagba sa harandugan, iniyaw ti tudu baka ag ibinugtang sa babaw pagba. Bag-u magkun siya sa manga tawu, “Buhusi niyu upat ka tapayan danum ti handug hanggan ti pamagba.” Makalawuy nida buwatun inda,

³⁴ magkun si Ilyas, “Buhusi utru niyu.” Pakalawuy nida binuhusan, sinabi utru ni Ilyas, “Buhusi waya niyu ikatlu bisis.” Sinunud nida kan Ilyas sinabi,

³⁵ ag binmulus ti danum sa sangput harandugan, ag napnu ti kanal.

³⁶ Pagka udas yi handug, nagpakarani si Purupita Ilyas sa harandugan ag nandarangin. Magkun siya, “Panginuun, Diyus ni Abraham, ni Isaak ag ni Hakub, patutuhani nimu sa inda pag sirang, kuntay kawu yi ngani ti Diyus Israil ag aku kanmu manugsirbi, ag binwat niku ti tanan inda angay sa sugu nimu.

³⁷ Panginuun, patingihi duy nimu aku, hampay maalaman manga tawu kuntay kawu ti Panginuun, ti Diyus, ag gustu nimu sida bumalik sa kanmu.”

³⁸ Susun rinmas-ug ti apuy ginan sa Panginuun, ag inirub ti handug, ti pagba, ti manga batu hanggan ti daga, ag nak-at ti kanal.

³⁹ Pagka nakitan inda tanan tawu, linmuhud sida ag magkun, “Ti Panginuun imaw ti Diyus! Ti Panginuun imaw ti Diyus!”

⁴⁰ Isinugu rargu ni Ilyas sa manga tawu, “Dakpa yi niyu ti manga purupita ni Baal. Kailangan unman may makapalagiw sa kanda!” Nakan dinakup ngani ti tanan purupita ni Baal ag dinara nida ni Ilyas sa may Luung Kisun ag pinanmatay.

⁴¹ Magkun si Ilyas sa kan Akab, “Paglakaw yi kawu, pagkaun yi ag pag-inum, dahil pararas-ugun ti mabisug pag uran.”

⁴² Nakan linmakaw yi si Akab hampay mangaun ag manginum, dapat si Ilyas tinmukad sa bantud Karmilu ag nandarangin maluhudan ag mayuk-uban sa daga.

⁴³ Pagkatapus, magkun siya sa kay suruguun, “Pagtukad kawu ag pagbantay sa dagat.” Ag sinunud inda suruguun. Pagbalik niya sa kan Ilyas, magkun siya, “Unman duy aku may mag-akitan.” Pitu ka bisis sinabi ni Ilyas kuntay pagbalik siya pagbantay.

⁴⁴ Pagka sa ikapitu niya pagbalik, magkun siya sa kan Ilyas, “May nakitan duy aku rurum mabiru ga dalukap tawu kay kadaka, magpatungud ginan sa lawud.” Nakan magkun si Ilyas, “Paglakaw yi kawu ag sabihun sa kan Akab kuntay pagsakay yi siya sa kay kalisa ag pag-uli yi bag-u waya siya matakdan uran.”

⁴⁵ Balaw nadugay, dinmulum ti langit dahil sa madamul pag rurum. Dinmurus ag inmuran mabaskug, ag sinmakay si Akab sa kalisa atabug sa Hisriil.

⁴⁶ Pinabisug Panginuun si Ilyas. Ibinugkus niya sa awak kay rutay niya panluwas ag nalagiw, ag inmuna waya sa kan Akab atabug sa Hisriil.