1 Hari 17 - Hanunuu

Nagdara Karan-unun ti Uwak sa kan Ilyas

¹ May usa ka purupita kay ngaran si Ilyas. Mag-uli siya sa Tisbi sakup Gilyad. Magkun siya sa kan Akab, “Pagsiguraduhun niku sa kanmu, sa nabubut-un buhi pag Panginuun, ti Diyus Israil kang pagsirbihan, kuntay unman may tun-ug ngatay uran rumas-ug sa sulud pira ka timpu tugka sa unman niku sabihun kuntay pag-uran ngatay pagtun-ug.”

² Bag-u magkun ti Panginuun sa kan Ilyas,

³ “Pag-ighit kawu sitay, utusa nimu ti dalan pabutlakan ag pagpatagu kawu sa Luung Kirit, baliwa sa butlakan Hurdan.

⁴ Ati kawu pag-inum sa sapa, ag suguun niku ti manga uwak pagdara sa kanmu karan-unun ati.”

⁵ Sinunud ngani ni Ilyas ti sugu Panginuun sa kanya. Nag-atag siya sa Luung Kirit, baliwa sa butlakan Hurdan, ag ati siya pag nangulian.

⁶ Pagdarahan siya manga uwak tinapay hanggan taguban kada surip ag yabi, bag-u sa sapa siya pag mag-inum.

Ti Buranday sa Saripta

⁷ Sa kadugayun, nak-at ti sapa dahil balaw yi mag-uran.

⁸ Isinugu rargu Panginuun sa kan Ilyas,

⁹ “Pag-atag kawu sa Saripta sa Sidun, ati kawu pag mangulian. May usa ka buranday ati sinugu niku mamakaun sa kanmu.”

¹⁰ Nakan nag-atag si Ilyas sa Saripta. Pagras-ug niya sa may puwirtahan banwa, may nakitan siya buranday magkayu. Magkun siya sa babayi, “Pakisuyu, mahimu aw duy aku makainum danum una di diit.”

¹¹ Pagka paginanun yi ti buranday hampay mam-ul danum, magkun waya sa kanya si Ilyas, “Pakisuyu, darahi diman aku tinapay.”

¹² Magkun ti buranday, “Magsabi duy aku sa urungdan sa atubangan buhi pag Panginuun nimu Diyus, unman yi aku may tinapay. Ti nasawad lang usa ka akup arina sa malukung ag diit pag lana ulibu sa tapayan. Magbuul ngani duy aku pira ka bilug kayu atay hampay darahun sa balay ag tamaun ti magkasawad pag arina para sa kangku ag sa anak niku, nu matabu yi nimi inda, mamatay yi kami sa lun-us.”

¹³ Magkun si Ilyas sa kanya, “Danga kawu magkaarimputu. Pag-uli kawu ag buwata ti pagsabihun nimu. Dapat tamai dapu nimu aku diit pag tinapay ginan sa nasawad arina, ag daran-a nimu rargu inda sa kangku. Bag-u pagtama diman kawu para sa kanmu ag sa anak nimu.

¹⁴ Dahil inda ti pagsabihun Panginuun, ti Diyus Israil, ‘Balaw matabwan arina kanmu malukung ag balaw matabwan lana ulibu kanmu tapayan tugka sa sirang padarahan niku uran ti daga.’ ”

¹⁵ Linmakaw ti babayi ag binwat niya ti sinabi ni Ilyas. Nakan may karan-unun sirang-sirang para sa kan Ilyas, ag para sa buranday hanggan sa kay anak.

¹⁶ Dahil unman magkatabu ti arina sa malukung hanggan ti lana ulibu sa tapayan, angay sa sinabi Panginuun sa panab-anan ni Ilyas.

¹⁷ Sa kadugayun, nasakit ti anak buranday. Nag-amat kay sakit inda tugka sa namatay.

¹⁸ Magkun ti babayi sa kan Ilyas, “Unu duy ti pag-ikagalit nimu sa kangku, manugsirbi Diyus? Nangataytag aw duy kawu sitay hampay matyun kang anak bilang parusa sa kang manga kasalanan?”

¹⁹ Sinmagut si Ilyas, “Haytag ti anak.” Bin-ul ni Ilyas ti anak sa kay ina, ag dinara inda sa sulud-sulud sa tungud, nu naan siya pag mag-uli. Ipinahuway niya ti anak sa kay igyaan,

²⁰ ag nandarangin siya sa Panginuun, “Panginuun niku Diyus, pinadarahan aw duy nimu kaaburiduhan inda pag buranday ti nagpadayun sa kangku sa panab-anan pagbawi sa kay anak?”

²¹ Napadapa si Ilyas katlu ginan sa anak ag nanawag sa Panginuun, “Panginuun niku Diyus, buhi-a duy nimu inda pag anak!”

²² Sinagut Panginuun kay darangin ni Ilyas ag nabuhi uman ti anak.

²³ Bag-u dinara ni Ilyas ti anak sa sirung ag ipinakaun sa kay ina. Magkun si Ilyas, “Bantayi duy kanmu anak, buhi siya!”

²⁴ Rargu sinabi babayi sa kan Ilyas, “Taynguna napatutuuhanan niku manugsirbi ngani kawu Diyus ag tutuu magbagaw ti Panginuun sa panab-anan nimu.”