1 Hari 16 - Hanunuu

¹ Inda ti itinultul Panginuun laban sa kan Baasa kay sinabi sa panab-anan ni Hihu kay anak ni Hanani:

² “Binangun kawu niku ginan sa daga, ag binwat takinan manga nasakupan niku Israilita. Dapat sinunud nimu ti pangabuhi ni Hirubuam ag kawu ti pinun-an kasalanan niku manga nasakupan, ag ginalit nimu aku dahil sa kanda manga kasalanan.

³ Nakan rurisun kawu niku hanggan kanmu magtal-anakan parihu sa kang binwat sa magtal-anakan ni Hirubuam kay anak ni Nabat.

⁴ Ti nibilang sa magtal-anakan nimu ti mamatay sa banwa kan-un manga idu, ag ti mamatay sa tanman kan-un manga manuk sa tungud.”

⁵ Ti iba waya ka tultulanun tungkul sa maghari ni Baasa, ag kay manga binwat hanggan pagpanalu, nisurat sa Ribru Tultulanun manga Hari Israil.

⁶ Pagka namatay si Baasa, ilinbung siya sa Tirsa. Ag kay anak si Ila ti inmilis sa kanya bilang hari.

⁷ Tunda pag tultulanun Panginuun laban sa kan Baasa hanggan sa kay magtal-anakan sinabi Panginuun sa panab-anan ni purupita Hihu kay anak ni Hanani. Sinabi tunda Panginuun dahil sa tanan daut binuwat ni Baasa sa magbantay Panginuun. Ginalit niya ti Panginuun dahil sa kay binwat parihu sa binwat magtal-anakan ni Hirubuam, ag dahil sa kay pagmatay sa buu magtal-anakan ni Hirubuam.

Kay Maghari ni Ila sa Israil

⁸ Naghari sa Israil si Ila kay anak ni Baasa katpung 26 pag timpu kay maghari ni Asa sa Huda. Sa Tirsa siya pag nangulian, naghari siya sa sulud duwa ka timpu.

⁹ Si Simri, usa sa manga may kangaranan ni Ila ag kumandir katunga manga manugkalisa, naggayak daut laban sa kanya. Usa ka sirang, nanlangu si Ila ati sa Tirsa, sa balay ni Arsa, imaw ti manug-asikasu ati sa balay hari.

¹⁰ Sinmulud si Simri sa balay ag minatay niya si Ila. Nangyari inda katpung 27 pag timpu kay maghari ni Asa sa Huda. Ag si Simri ti inmilis sa kan Ila bilang hari.

¹¹ Pagka mag-umpisa kay maghari ni Simri, pinanmatay niya ti buu magtal-anakan ni Baasa. Unman siya may sinawadan lalaki, una sa manga katawuhan hanggan manga ampud ni Baasa.

¹² Pinanmatay ni Simri kay buu magtal-anakan ni Baasa angay sa sinabi Panginuun sa panab-anan ni purupita Hihu.

¹³ Dahil ginalit ni Baasa hanggan niya anak ni Ila ti Panginuun, ti Diyus Israil, sa manga binuwat nida kasalanan, imaw ti pinun-an kasalanan manga taga Israil sa panab-anan pagsamba sa manga diyus-diyusan.

¹⁴ Ti iba waya ka tultulanun tungkul sa maghari ni Ila, hanggan ti tanan binuwat niya, nisurat sa Ribru Tultulanun manga Hari Israil.

Kay Maghari ni Simri sa Israil

¹⁵ Naghari sa Israil si Simri katpung 27 pag timpu kay maghari ni Asa sa Huda. Sa Tirsa siya pag nangulian, dapat pitu lang ka sirang kay kadugay kay maghari. Habang magkampu ti manga sundalu Israil arani sa may Gibitun, sa usa ka banwa manga Pilistiyu,

¹⁶ nabaritaan nida kuntay minatay ni Simri ti hari. Nakan sa tunda diman pag sirang sa kampu, binwat nida hari Israil si Umri. Si Umri ti kumandir manga sundalu Israil.

¹⁷ Nighit sa Gibitun si Umri hanggan kay manga kaibahan niya Israilita, ginira nida ti Tirsa.

¹⁸ Pagka nakitan ni Simri magkaagaw yi ti banwa, inmatag siya sa marig-un pag bahagi balay hari ag inirub niya kay sangput inda, nakan namatay siya.

¹⁹ Nangyari inda dahil sa kay nabwat manga kasalanan. Daut gid kay binwat sa magbantay Panginuun, ag sinmunud siya sa daut pagpangabuhi ni Hirubuam hanggan sa kay binwat kasalanan, imaw ti pinun-an kasalanan manga taga Israil.

²⁰ Ti iba waya ka tultulanun tungkul sa maghari ni Simri, hanggan ti tungkul sa kay paglaban, nisurat sa Ribru Tultulanun manga Hari Israil.

Kay Maghari ni Umri sa Israil

²¹ Natunga ti nasakupan Israil sa duwa ka gurupu. Kay usa ka gurupu gustu bumaliw hari si Tibni kay anak ni Ginat, kay usa ka gurupu waydi gustu si Umri.

²² Dapat mas mabisug ti manga magpabliwa sa kan Umri kaysa manga magpabliwa sa kan Tibni kay anak ni Ginat. Namatay si Tibni, ag si Umri ti naghari.

²³ Nagdasun naghari sa Israil si Umri katpung 31 pag timpu kay maghari ni Asa sa Huda. Naghari siya sa sulud sampulu may duwa ka timpu; kay unum ka timpu inda ati sa Tirsa.

²⁴ Binili niya sa kan Simir ti bantud Samarya, sa 70 ka kilu pilak, ag pinatindugan niya inda banwa. Pagkalawuy pinaingarnan niya inda banwa Samarya, ginan sa ngaran ni Simir imaw ti daan may apu bantud.

²⁵ Daut kay binwat ni Umri sa magbantay Panginuun, nagsalan higit waya sa manga hari nauna sa kanya.

²⁶ Nagsunud siya sa pagpangabuhi ni Hirubuam kay anak ni Nabat hanggan sa kay binwat kasalanan, imaw ti pinun-an kasalanan manga taga Israil, sa panab-anan pagsamba sa manga diyus-diyusan. Nakan nagalit sa kanda ti Panginuun, ti Diyus Israil.

²⁷ Ti iba waya ka tultulanun tungkul sa maghari ni Umri, hanggan sa kay manga binwat ag pagpanalu, nisurat sa Ribru Tultulanun manga Hari Israil.

²⁸ Pagka namatay si Umri, ilinbung siya sa Samarya. Ag kay anak si Akab ti nag-ilis sa kanya bilang hari.

Kay Maghari ni Akab sa Israil

²⁹ Naghari sa Israil si Akab kay anak ni Umri katpung 38 pag timpu kay maghari ni Asa sa Huda. Sa Samarya siya pag nangulian, naghari siya sa sulud 22 ka timpu.

³⁰ Daut kay binwat niya sa magbantay Panginuun, subra waya sa binwat manga hari nag-una sa kanya.

³¹ Kurang waya sa kanya ti pagsunud sa manga kasalanan binuwat ni Hirubuam, bin-ul waya niya ag inasawa si Hisibil kay anak ni Hari Itbaal taga Sidun. Tunda ginan, nagsirbi siya ag nagsamba sa diyus-diyusan Baal.

³² Nagpatindug siya balay simbahan ag harandugan para sa kan Baal ati sa Samarya.

³³ Nagpabuwat diman siya tulduk tanda diyusa si Asira. Ginalit niya ti Panginuun, ti Diyus Israil, subra waya sa binwat manga un-an sa kanya pag hari sa Israil.

³⁴ Pagka sa panahun maghari ni Akab, ipinatindug maan ni Hiyil taga Bitil ti Hiriku. Habang pag-ipatindug niya kay manga paratukawan inda, namatay kay anak panganay si Abiram. Ag habang pag ipabuwat maan niya kay sabian inda, namatay kay kap-usan niya pag anak si Sigub. Nangyari inda tanan angay sa sinabi Panginuun sa panab-anan ni Huswi kay anak ni Nun.