1 Hari 15 - Hanunuu

Kay Maghari ni Abyas sa Huda

¹ Katpung ika-18 pag timpu kay maghari sa Israil ni Hirubuam kay anak ni Nabat, naghari waydi sa Huda si Abyas.

² Sa Hirusalim pag nangulian si Abyas, naghari siya sa sulud tulu ka timpu. Kay ina si Maaka, ag si Maaka anak ni Abishalum.

³ Binwat diman niya ti tanan nabwat niya ama pag kasalanan. Balaw marinu kay pakiusa sa Panginuun niya Diyus; balaw parihu sa kan Dabid sa kay ginurang.

⁴ Dapat dahil sa kan Dabid, ginustu Panginuun niya Diyus parargu ginan sa linahi niya ti humari sa Hirusalim sa panab-anan pagpakaun anak sa kanya imaw ti umilis sa kay tukawan hari hampay panguluhan ag parig-unun ti Hirusalim.

⁵ Dahil binwat ni Dabid ti matadlung sa magbantay Panginuun, ag katpung magkabuhi waya siya, unman siya naglabag sa sugu Panginuun, purya lang sa kay binwat niya sa kan Uryas Hitiyu.

^6-7 Pirmi kaybi ti labanan sa tab-anan nida ni Rihubuam ni Hirubuam. Pagka sa uryan sida maan ni Abyas ni Hirubuam ti nanlabanan. Ti iba waya ka tultulanun tungkul sa maghari ni Abyas, ag ti tanan niya binwat, nisurat sa kasuratan tultulanun manga Hari sa Huda.

⁸ Pagka namatay si Abyas, ilinbung siya sa Banwa ni Dabid. Kay anak si Asa ti nag-ilis sa kanya bilang hari.

Kay Maghari ni Asa sa Huda

⁹ Naghari sa Huda si Asa katpung ika-20 pag timpu kay maghari ni Hirubuam sa Israil.

¹⁰ Sa Hirusalim pag nangulian si Asa, naghari siya sa sulud 41 ka timpu. Kay idu niya si Maaka, ag si Maaka anak ni Abishalum.

¹¹ Matadlung kay binwat ni Asa sa magbantay Panginuun, parihu sa kan Dabid sa kay ginurang.

¹² Pinalayas niya sa Huda ti manga lalaki hanggan ti manga babayi baraydan sa rugar nida pagsambahan, ag ipinadaut niya ti tanan diyus-diyusan ipinabwat niya manga ginurang.

¹³ Hanggan kay idu niya si Maaka, pinaighit niya sa kay pagkarayna dahil nagpabuwat mayagting pag tulduk tanda diyusa si Asira. Ipinaplud ni Asa tunda pag manga tulduk ag ipinasunug sa Luung Kidrun.

¹⁴ Una balaw niya ipinadaut ti manga simbahan sa abwat pag rugar, namirmaminti diman siya matinupadun sa Panginuun sa buu buhi niya.

¹⁵ Dinara niya sa Balay Diyus ti manga pilak, gintu hanggan ti iba waya pag manga bagay kay ihinandug hanggan niya ama sa Panginuun.

¹⁶ Pirmi ti labanan ni Asa ag ni Baasa hari sa Israil sa buu panahun maghari nida.

¹⁷ Ti Huda ginira ni Baasa hari sa Israil, ag sinangput niya alad batu ti Rama hampay unman may makaluwas ngatay makasulud sa sakup ni Hari Asa taga Huda.

¹⁸ Pinanbuul ni Asa ti tanan pag manga pilak ag gintu sa haramnuan sa Balay Diyus hanggan sa balay hari. Ipiniyar niya inda sa kay manga may kangaranan ag sinugu niya sida kuntay daran-un inda sa kan Hari Bin Hadad taga Aram ati sa Damasku nu naan inda pag mag-uli. Si Bin Hadad kay anak ni Tabrimun kay laki ni Hisyun.

¹⁹ Inda kay sabi ni Asa sa kan Bin Hadad: “Mamuwat kita kasunduan parihu sa binwat nita gurang. Tanggapa nimu kang manga pakaun sa kanmu manga gintu ag pilak. Pagpamuhunun niku sa kanmu apasi yi nimu ti magbaliwa sa kan Hari Baasa sa Israil hampay pabay-anan yi niya aku.”

²⁰ Pinmasnu si Bin Hadad sa pagpamuhunun ni Hari Asa, ag sinugu niya ti manga takinan niya manga sundalu kuntay giraha ti manga banwa Israil. Nasakup nida ti Ihun, Dan, Abil Bit Maaka, ti buu Kinirit hanggan ti buu Niptali.

²¹ Pagka nabaritaan inda ni Baasa, pinaapas niya ti pagpatindug alad batu sa Rama, ag nagbalik siya sa Tirsa.

²² Pagkatapus, nagsugu si Hari Asa sa tanan taga Huda kuntay bul-a ti manga batu hanggan ti manga batang ginamit ni Baasa sa pagpatindug alad batu sa Rama. Ag ginamit maan inda ni Hari Asa sa kay pagpatindug alad batu sa Giba sa Binhamin ag sa Mispa.

²³ Ti iba waya ka tultulanun tungkul sa maghari ni Asa, hanggan sa kay manga panalu ag ti tanan niya manga binuwat, hanggan ti manga banwa kay pinarig-un nakasurat sa kasuratan tultulanun manga Hari sa Huda. Pagka gurangun yi si Asa, nagkasakit siya sa lulud.

²⁴ Ag pagka namatay siya, ilinbung siya sa kalubngan niya manga ginurang sa Banwa niya ginurang si Dabid. Kay anak niya si Husapat ti inmilis sa kanya bilang hari.

Kay Maghari ni Nadab sa Israil

²⁵ Naghari sa Israil si Nadab kay anak ni Hirubuam katpung ikadwa pag timpu sa kay maghari ni Asa sa Huda. Naghari si Nadab sa Israil sa sulud duwa ka timpu.

²⁶ Daut kay binuwat sa magbantay Panginuun. Sinmunud siya sa pangabuhi niya ama hanggan sa kay binwat kasalanan, imaw ti pinun-an kasalanan manga taga Israil.

²⁷ Taynguna, si Baasa kay anak ni Ahiyas, ginan sa lahi ni Isakar, naggayak daut laban sa kan Nadab. Ipinamatay ni Baasa si Nadab habang paggirahun ni Nadab hanggan buu Israil ti Gibitun, ti usa ka rugar manga Pilistiyu.

²⁸ Kay pagmatay ni Baasa sa kan Nadab nangyari katpung ikatlu pag timpu sa kay maghari ni Asa sa Huda. Ag si Baasa ti nag-ilis sa kan Nadab bilang hari.

²⁹ Pagka mag-umpisa maghari si Baasa, pinanmatay niya ti buu magtal-anakan ni Hirubuam; balaw siya nagsawad una di usa. Nangyari inda angay sa sinabi Panginuun sa panab-anan niya manugsirbi, si Ahiyas taga Silu.

³⁰ Dahil nagalit ti Panginuun, ti Diyus Israil, sa kan Hirubuam sa manga nabwat niya kasalanan, imaw ti pinun-an kasalanan manga taga Israil.

³¹ Ti iba waya ka tultulanun tungkul sa maghari ni Nadab, ag ti tanan binuwat niya, nisurat sa Ribru Tultulanun manga Hari Israil.

³² Pirmi ti labanan nida ni Asa ni Baasa sa buu panahun nida maghari.

Kay Maghari ni Baasa sa Israil

³³ Naghari sa Israil si Baasa kay anak ni Ahiyas katpung ikatlu pag timpu kay maghari ni Asa sa Huda. Sa Tirsa pag nangulian si Baasa, naghari siya ati sa sulud 24 ka timpu.

³⁴ Daut kay binuwat sa magbantay Panginuun. Sinmunud siya sa pangabuhi ni Hirubuam hanggan sa kay nabwat kasalanan, imaw pinun-an kasalanan manga taga Israil.