1 Hari 14 - Hanunuu

Ti Sinabi ni Purupita Ahiyas Laban sa kan Hirubuam

¹ Sa ati katpung pag panahun, nasakit kay anak lalaki ni Hirubuam si Abyas.

² Nakan magkun si Hirubuam sa kay asawa, “Pag-ati kawu sa Silu, pagpabalhinguun kawu hampay unman may makakilala sa kanmu kuntay kawu kang asawa. Ati si Ahiyas, ti purupita nagsabi sa kangku kuntay humari aku sa Israil.

³ Pag-atag kawu sa kanya ag pagdara manga pamakaun sampulu ka tinapay, manga karan-unun, ag usa ka garapun daykut dahil sabihun niya sa kanmu nu unu ti mangyari sa kanta anak.”

⁴ Nakan inmatag kay asawa ni Hirubuam sa balay ni Ahiyas sa Silu. Gurangun yi gid si Ahiyas ag udyi maghiling.

⁵ Dapat magkun ti Panginuun sa kan Ahiyas, “Ataytabug sa kanmu kay asawa ni Hirubuam magpabalhinguun siya hampay balaw makilala. Mamaingana siya sa kanmu tungkul sa kay anak may sakit, ag kang sabihun sa kanmu imaw kanmu isagut sa kanya.”

⁶ Pagka nasaydan ni Ahiyas magsaka yi siya sa sabian, magkun si Ahiyas, “Abala, pagsulud kawu. Alam niku asawa kawu ni Hirubuam. Hayga kawu magpabalhinguun? May daut barita aku sa kanmu.

⁷ Pag-uli kawu ag sabihun nimu sa kan Hirubuam kuntay inda ti pagsabihun Panginuun, ti Diyus Israil: ‘Kawu ti pinili niku sa tanan tawu hampay buwatun takinan manga nasakupan niku Israilita.

⁸ Bin-ul niku ti kaharian sa magtal-anakan ni Dabid ag ipinakaun sa kanmu. Dapat balaw kawu parihu sa kan Dabid, sa kang manugsirbi. Tinupad niya kang manga sugu, nagsunud siya sa kangku sa buu niya tagipusuun, ag nagbuwat matadlung sa kang magbantay.

⁹ Mas daut ti binwat nimu kaysa binwat manga takinan nag-una sa kanmu. Dinayu nimu aku ag ipinalabi waya nimu ti manga diyus-diyusan baul.

¹⁰ Dahil siyun, padarahan niku kadamhakan kanmu magtal-anakan. Matyun niku ti tanan lalaki, suruguun man ngatay bukun. Rurisun lubus niku kanmu magtal-anakan parihu sa paruk pagtutdan ag unman may magkasawad.

¹¹ Ti magkaramatay sa banwa pag mimru nimu magtal-anakan kan-un manga idu, ag ti magkaramatay sa tanman kan-un manga manuk sa tungud.’ Mangyari gid inda dahil Aku, ti Panginuun, ti magsabi inda.”

¹² Bag-u magkun si Ahiyas sa asawa ni Hirubuam, “Pag-uli yi kawu sa kanyu. Pagras-ug nimu sa kanmu banwa, mamatay kanmu anak.

¹³ Manhimanglaw sa kanya ti buu Israil ag ilubung siya. Siya lang sa magtal-anakan ni Hirubuam ti mailubung mayad, dahil siya lang ti pagbayaun Panginuun, ti Diyus Israil.

¹⁴ Taynguna pag udas, mamauli ti Panginuun hari sa Israil imaw ti man-guba sa magtal-anakan ni Hirubuam.

¹⁵ Parusahan Panginuun ti Israil tugka sa mangirkirug parihu sa tigbaw magkahapay sa bulus danum. Paighitun niya sida siyun ginan sa marinu pag daga kay ipinakaun sa kanda manga ginurang, ag wayakun sida sa luwas Sapa Iyupratis dahil ginalit nida siya pagka nagbuwat sida manga tulduk tanda diyusa si Asira.

¹⁶ Pabay-anan niya sida dahil sa manga kasalanan ni Hirubuam, imaw ti pinun-an kasalanan manga taga Israil.”

¹⁷ Pagkalawuy tunda, nuli kay asawa ni Hirubuam sa Tirsa. Pagras-ug niya sa sabian balay nida, namatay rargu kay anak.

¹⁸ Naghimanglaw ti buu Israil sa kay anak ag ilinbung nida inda, angay ngani sa sinabi Panginuun sa panab-anan niya manugsirbi si Purupita Ahiyas.

¹⁹ Ti iba waya ka tultulanun tungkul sa maghari ni Hirubuam, hanggan kay naglaban, nisurat sa Ribru Tultulanun manga Hari Israil.

²⁰ Naghari si Hirubuam sa Israil sa sulud 22 ka timpu. Pagka namatay siya, kay anak si Nadab imaw ti inmilis sa kanya bilang hari.

Kay Maghari ni Rihubuam sa Huda

²¹ Si Rihubuam kay anak ni Sulumun, ti hari sa Huda. 41 ka timpu kay idad pagka naghari siya. Naghari siya sa sulud sampulu may pitu ka timpu sa Hirusalim, ti banwa pinili Panginuun sa tanan linahi Israil, nu naan siya pagdayawun. Kay ina ni Rihubuam si Naama, taga Amun.

²² Nagbuwat kadautan ti manga nasakupan Huda sa magbantay Panginuun, ag mas subra waya ti galit Panginuun sa kanda kaysa kanda manga ginurang, dahil subra gid kanda manga kasalanan.

²³ Nagbuwat diman sida manga simbahan sa abwat pag manga rugar hanggan aramirawan pag manga batu. Nagpatindug sida manga tulduk tanda diyusa si Asira sa kada babaw tagudtud ag sa kada sirung maraybung pag puun kayu.

²⁴ Bukud waya siyun, may manga lalaki hanggan manga babayi baraydan sa rugar nida pagsambahan. Ti nasakupan Huda nagbuwat tanan mayagting pag manga bagay tunda ti pagbuwatun kaybi manga nasyun ipinalayas Panginuun sa panab-anan manga Israilita.

²⁵ Pagka sa ikalima pag timpu kay maghari ni Rihubuam, ginira ni Hari Sisak taga Ihiptu ti Hirusalim.

²⁶ Bin-ul niya ti manga kayamanan sa Balay Diyus Panginuun hanggan sa balay hari. Bin-ul niya ti tanan, hanggan ti tanan gintu pag panangga ipinabuwat ni Sulumun.

²⁷ Nakan nagpabuwat si Hari Rihubuam manga panangga galang kailis sa siyun, ag inintirga niya inda sa manga kumandir manga guwardiya magbantay sa sabian balay hari.

²⁸ Ag nu atabug ti hari sa Balay Diyus Panginuun, magkuyug sa kanya kay manga guwardiya dara inda pag manga panangga, bag-u pag-ibalik di maan nida inda sa kanda sulud-sulud.

²⁹ Ti iba waya pag manga tultulanun tungkul sa maghari ni Rihubuam, hanggan sa tanan niya binwat, nisurat sa Ribru Tultulanun manga Hari Huda.

³⁰ Pirmi ti lalabanan nida ni Rihubuam ag ni Hirubuam.

³¹ Pagka namatay si Rihubuam, ilinbung siya sa kalubngan niya manga ginurang, sa Banwa ni Dabid. (Kay ina ni Rihubuam si Naama taga Amun.) Ag kay anak niya si Abyas ti nag-ilis sa kanya bilang hari.