1 Hari 13 - Hanunuu

Sinaadan Purupita ti Harandugan sa Bitil

¹ Sinugu Panginuun ti usa ka suruguun niya taga Huda kuntay pag-atag sa Bitil. Pagras-ug niya ati, matindugan si Hirubuam sa arani harandugan hampay manhandug.

² Sinugu Panginuun kay suruguun hampay saadan tunda pag harandugan. Magkun siya, “Inda ti pagsabihun Panginuun tungkul sa tunda pag harandugan: May ilusad usa ka lapsag sa magtal-anakan ni Dabid kay ngaran Husyas. Matyun niya ag ihandug sa inda pag harandugan ti manga manughandug magsirbi sa simbahan sa abwat pag rugar hanggan maghandug sa inda pag harandugan. Masunug kanda manga but-ul sa inda pag harandugan.”

³ Sa inda mismu pag sirang, namakaun palatandaan ti suruguun Diyus kuntay mangyari kay sinabi. Magkun siya, “Inda ti sinabi Panginuun pag palatandaan: Magkaratumpag inda pag harandugan ag kay galbuk inda mawayak.”

⁴ Pagka nadnugan inda ni Hari Hirubuam, itinudlu niya ti tawu ag magkun, “Dakpa niyu siya!” Dapat kadaka lang nan-ganit ti kamang hari, nakan unman inda nakakimut.

⁵ Pagkatapus, narup-ag ti harandugan bag-u kay galbuk nawayak, angay gid sa palatandaan sinabi suruguun Diyus, ti ipinaalam Panginuun sa kanya.

⁶ Pagkatapus, magkun ti hari sa suruguun Diyus, “Daranginan aku sa Panginuun niyu Diyus, paayada niya kang kamang.” Nakan nandarangin ti suruguun Diyus sa Panginuun ag inmayad ti kamang hari.

⁷ Magkun maan ti hari sa suruguun Diyus, “Abala kawu, atag kita sa kang balay mangaun, bag-u ayawan kawu niku pamaalu.”

⁸ Dapat sinmagut ti suruguun Diyus, “Una waya ipakaun nimu sa kangku ti katunga nimu pag kasiyunan, unman gid aku manguyug sa kanmu ngatay mangaun ag manginum sa inda pag rugar.

⁹ Dahil sinugu aku Panginuun kuntay danga aku magkaun ngatay mag-inum habang atay aku, ag sa pag-uli niku balaw aku mahimu lumakaw sa kang nag-uryanan sa kang paataytabug.”

¹⁰ Nakan tuhay maan pag dalan kay linakawan pagka nuli siya.

¹¹ Sa tunda pag udas, may usa ka gurangun purupita mag-uli sa Bitil. Nagras-ug kay manga anak lalaki ag ibinarita ti manga nangyari sa Bitil sa tunda pag sirang. Itinultul nida ti tanan binwat suruguun Diyus hanggan kay manga sinabi sa hari.

¹² Nagpaingana kanda ama, “Naan siya paglinmakaw igu nuli siya?” Ag sinabi nida nu naan pag linmakaw ti suruguun Diyus taga Huda.

¹³ Pagkatapus, magkun kanda ama sa kanda, “Alistuhan niyu ti asnu para sa kangku.” Nakan inalistu ngani nida ti asnu; sinmakay siya

¹⁴ ag linagas ti suruguun Diyus. Natakdan niya inda maharyan sa sirung kayu insina. Pinaingana niya siya, “Kawu aw ngani ti suruguun Diyus ginan sa Huda?” Sinmagut siya, “Hu, aku ngani duy.”

¹⁵ Magkun siya, “Pagkuyug duy kawu sa kangku atabug sa kang balay, mangaun kita.”

¹⁶ Sinmagut ti suruguun Diyus, “Balaw yi aku mahimu pumabalik ag kumuyug sa kanmu ngatay mangaun una manginum kaibahan niyu sa inda pag rugar.

¹⁷ Dahil sinugu aku Panginuun kuntay danga aku magkaun ngatay mag-inum habang atay aku, ag sa pag-uli niku balaw diman aku mahimu lumakaw sa kang nag-uryanan.”

¹⁸ Magkun ti gurangun purupita, “Purupita diman aku ga kanmu. Ag sinugu Panginuun kay usa ka anghil hampay sabihun sa kangku kuntay daraha niku kawu sa kang balay hampay makakaun ag makainum.” (Dapat magpudil maaw ti gurangun.)

¹⁹ Kinmuyug ngani sa kanya ti suruguun Diyus, nangaun ag nanginum siya ati.

²⁰ Habang matukawan sida sa lamisa, may sinabi ti Panginuun sa gurangun purupita.

²¹ Nakan magkun ti gurangun purupita sa suruguun Diyus taga Huda, “Inda ti pagsabihun Panginuun: ‘Linabag nimu ti sugu Panginuun nimu Diyus; balaw nimu sinunud kay sugu sa kanmu.

²² Isinugu niya sa kanmu kuntay danga kawu magkaun ag mag-inum sa inda pag rugar, dapat binmalik kawu bag-u nangaun ag nanginum. Dahil sa inda pag binwat nimu, kanmu bangkay balaw ilbung sa lulubngan nimu manga ginurang.’ ”

²³ Pagka nakatapus kaun ag inum ti suruguun Diyus, inalistu gurangun purupita ti asnu para sa pag-uli suruguun Diyus.

²⁴ Habang mag-uli yi siya, sinulang siya usa ka liyun ag minatay. Kay bangkay niya mabugtangan lang sa dalan, ag sa kay arani inda matindugan ti liyun ag asnu.

²⁵ Nakitan manga tawu maglawuy ati kay bangkay hanggan ti liyun sa kay arani inda, ag itinultul nida inda sa banwa nu naan mag-uli ti gurangun purupita.

²⁶ Pagka naalaman inda gurangun purupita, magkun siya, “Siya ti suruguun Diyus, naglabag sa bagaw Panginuun. Pinabay-anan siya Panginuun hampay sunggaban liyun ag matyun, angay inda sa sinabi Panginuun sa kanya.”

²⁷ Bag-u magkun ti gurangun purupita sa kay manga anak lalaki, “Alistuhan niyu kang asnu.” Iinalistu ngani nida inda.

²⁸ Ginminan siya, ag nakitan niya ti bangkay mabugtangan sa dalan, bag-u ti liyun hanggan ti asnu matindugan sa kay arani inda. Unman kinaun liyun ti bangkay ngatay ginus-ab ti asnu.

²⁹ Bin-ul niya ti bangkay suruguun Diyus ag isinakay sa asnu, bag-u dinara niya sa kay banwa agud kay rukuan ag ilubung.

³⁰ Sa sadili lulubngan gurangun purupita pag ilinbung ti bangkay suruguun Diyus. Nanrukuan gid sida sa kamatayan suruguun Diyus. Kanda sinangbit, “Kaawaawa kawu, patar-ari!”

³¹ Pagka nilbung yi siya, magkun ti gurangun purupita sa kay manga anak lalaki, “Nu mamatay aku, lubngan aku sa may linubngan suruguun Diyus, pagdurut-an kami.

³² Dahil ti manga sinabi Panginuun sa kanya tungkul sa harandugan sa Bitil hanggan sa manga simbahan sa abwat pag rugar sa Samarya pihu gid mangyari.”

³³ Una nangyari inda, unman waya gid nagbag-u si Hirubuam sa kay daut pag ugali. Parargu di gid siya sa kay magpili manga tawu hampay sumirbi bilang manughandug sa manga simbahan sa abwat pag rugar. Una si unu ti magkaibug sumirbi bilang manughandug, pag-italaga niya.

³⁴ Inda pag binwat ni Hirubuam imaw ti pinun-an kasalanan niya magtal-anakan hanggan ti nagdara sa kanda sa kadamhakan.