1 Hari 12 - Hanunuu

Nanlaban ti Israil sa kan Rihubuam

¹ Inmatag si Rihubuam sa Sikim, nu naan nagtipun ti manga Israilita para piliun siya hari.

² Pagka nabaritaan inda ni Hirubuam kay anak ni Nabat, binmalik siya sa Israil. (Dahil ati katpung, ati siya mag-uli sa Ihiptu, nu naan pag nalagiw siya sa kan Hari Sulumun.)

³ Ipinatawag buu nasakupan Israil si Hirubuam ag inmati sida sa kan Rihubuam ag sinabi,

⁴ “Mabuyat ti manga ipinatupad nimu ama sa kanmi. Dapat nu pagaanun nimu inda, sirbihan kawu nimi.”

⁵ Sinmagut si Rihubuam, “Palugiti dap niyu aku tulu ka sirang hampay pag-isipan niku tunda, bag-u pagbalik maan kamu sa kangku.” Nakan nuli ti manga tawu.

⁶ Nanpasampak si Hari Rihubuam sa manga manugpamahala magsirbi sa kay ama sa kan Sulumun sa kay buhi waya inda. Nagpaingana si Rihubuam sa kanda, “Unu kanyu maipayu sa kangku tungkul sa tunda pag manga tawu sa kanda paghagadun sa kangku?”

⁷ Sinmagut sida, “Nu ipakakit nimu taynguna kanmu kaayadan sa kanda, ipakaun kanda paghagadun, sumirbi sida sa kanmu tugka aban.”

⁸ Dapat unman sinunud ni Rihubuam kanda patigayun. Bagkus ngap, nanpasampak siya sa manga kaidad baliwa niya pag manugsirbi.

⁹ Nagpaingana siya sa kanda, “Unu kanyu maipayu sa kangku tungkul sa tunda pag manga tawu sa kanda paghagadun sa kangku? Paghagadun nida sa kangku kuntay paalwana kang ama pag-ipatupad sa kanda.”

¹⁰ Sinmagut ti manga kaidad baliwa niya pag manugsirbi ni Rihubuam, “Kaindaay kanmu sabihun sa tunda pag manga tawu: ‘Kang itanggigis daka waya sa awak niku ama.

¹¹ Kang ibug sabihun, mas mabuyat waya kang ipatupad sa kanyu kaysa pag-ipatupad niku ama sa kanyu. Nu binakul latigu kamu niku ama, bakulun diman niku kamu latigu may tarum baul.’ ”

¹² Pagkalawuy tulu ka sirang, binmalik si Hirubuam hanggan ti manga tawu atabug sa kan Hari Rihubuam, angay sa sinabi hari sa kanda.

¹³ Dapat balaw tinupad ni Rihubuam ti patigayun manga manugpamahala. Bagkus ngap, binagawan niya mabuyat ti manga tawu

¹⁴ angay sa ipinatigayun sa kanya manga kaidad waya baliwa niya pag manga manugpamahala. Magkun siya, “Mabuyat ti ipinatupad niku ama sa kanyu, dapat mas mabuyat waya kang ipatupad sa kanyu. Nu binakul kamu niku ama latigu, bakulun diman niku kamu may patarum baul.”

¹⁵ Nakan unman pinakidnugan hari ti manga tawu, ipinahintulut inda Diyus hampay matupad kay pagsabihun sa kan Hirubuam, kay anak ni Nabat, sa panab-anan ni Ahiyas taga Silu.

¹⁶ Pagka naalaman manga Israilita kuntay unman sida pinatingihan hari, magkun sida sa hari, “Unman kami may labut sa kanmu, lahi ni Dabid, anak ni Isai! Bahala kawu sa kanmu kaharian! Abala yi kamu manga Israilita, muli yi kita!” Nakan nuli ngani ti manga Israilita.

¹⁷ Ti manga Israilita lang mag-ulian sa manga banwa Huda ti pinamahalaan ni Rihubuam.

¹⁸ Taynguna, ipinaatag ni Hari Rihubuam sa manga Israilita si Aduram, ti manugpamahala manga tawu magtarabahu sapilitan, hampay makipagkasundu sa kanda. Dapat binintuk siya manga Israilita tugka sa namatay. Nagdali-dali sakay si Rihubuam sa kay kalisa, ag linmayas siya atabug sa Hirusalim.

¹⁹ Tugka taynguna, maglaban di ti manga Israilita sa manga linahi ni Dabid.

²⁰ Pagka nabaritaan tanan Israilita kuntay nakauli yi si Hirubuam, ipinatawag nida siya sa usa ka tiripun ag binwat nida siya hari sa buu Israil. Kay lahi lang ni Huda ti nagpirmaminti tapat sa paghari manga linahi ni Dabid.

Pinasamdaman ni Simaya si Rihubuam

²¹ Pagras-ug ni Rihubuam sa Hirusalim, tinipun niya ti mahusay pag sundalu ginan sa manga lahi ni Huda ag ni Binhamin. Nakatipun siya 180,000 sundalu hampay manlaban sa nasakupan Israil ag hampay bawiun ti kaharian niya.

²² Dapat magkun ti Diyus sa kan Simaya sa kay suruguun,

²³ “Sabiha nimu sa kan Hari Rihubuam taga Huda, kay anak ni Sulumun, ag sa iba waya pag manga tawu ati

²⁴ indaay kang pagsabihun: ‘Danga kamu maglaban sa kanyu ka dugu Israilita. Pag-uli kamu, dahil kagustuhan niku inda tanan.’ ” Sinmunud sida sa Panginuun ag nuli angay sa isinugu Panginuun.

Nagpabuwat manga Gintu Baka si Hirubuam

²⁵ Pinasangputan ni Hirubuam alad batu ti banwa Sikim sa kabantudan Ipraim ag ati siya pag nangulian. Sa kadugayun, nag-ati siya sa Pinwil ag ipinahiwat niya inda.

²⁶ Magkun siya sa kay sadili, “Barang maibalik ti kaharian sa lahi ni Dabid

²⁷ nu parargu ti manga tawu mag-atag sa Hirusalim para manhandug ati sa Balay Diyus Panginuun. Mahimu mibuyu maan kanda sadili sa kan Hari Rihubuam taga Huda. Ag nu mangyari tunda, matyun nida aku ag bumalik sida sa kan Rihubuam.”

²⁸ Nakan pagka natapus napayuhan si Hirubuam tungkul siyun, nagpabuwat siya duwa ka gintu baka. Magkun siya sa manga tawu, “Manga Israilita, makuri yi para sa kanyu ti umati sa Hirusalim. Atay di kanyu diyus ti nagpalwas sa kanyu sa Ihiptu.”

²⁹ Ti usa ka gintu baka, ipinauli niya sa Bitil ag kay usa sa Dan.

³⁰ Inda pag binwat ni Hirubuam imaw ti pinun-an kasalanan manga Israilita. Una ti Dan inatag diman nida hampay sumamba ati.

³¹ Nagpabuwat waya si Hirubuam manga simbahan sa abwat pag rugar hanggan nagpili siya manga tawu hampay sumirbi bilang manughandug, una balaw sida ginan sa lahi ni Libi.

³² Nagpaumpisa diman siya pista pag-idaus kada 15 pag sirang sa ikawalu pag bulan, parihu sa pista sa Huda. Sa tunda pag sirang, nanhandug siya manga handug sa harandugan para sa manga gintu baka kay ipinabwat ati sa Bitil. Ag ati siya pag nagpili manga manughandug hampay itigana niya sumirbi sa manga simbahan sa abwat pag rugar kay ipinabwat.

³³ Sa tunda pag sirang nanhandug siya sa kay ipinabwat pag harandugan sa Bitil, inumpisahan niya ti pista para sa manga Israilita. Siya ti nagpili pitsa, sa 15 pag sirang sa ikawalu pag bulan para sa inda pag pista.