1 Hari 11 - Hanunuu

Kay manga Asawa ni Sulumun

¹ Mayamu pag manga babayi balaw Israilita ti kinaibgan ni Hari Sulumun. Purya sa anak hari Ihiptu, may manga asawa waya gid siya manga Muabita, Amunita, Idumita, Sidunita ag Hitiyu.

² Sinabi yi Panginuun sa kanya ti tanan Israilita balaw dapat mag-asawa ginan sa tunda pag manga nasyun dahil imaw lang ti pumaturun sa kanda sa pagsamba sa iba pag manga diyus. Dapat naibug di gid si Sulumun sa inda pag manga babayi.

³ May 700 ka asawa si Sulumun pudu manga anak hari, ag may asawa waya siya 300 ka suruguun. Kay manga asawa imaw ti nagpakarayu sa kanya sa Diyus.

⁴ Pagka gurangun yi siya, nagarya siya niya manga asawa sumamba sa iba pag manga diyus. Unman yi mayad kay magpakiusa sa Panginuun niya Diyus; balaw parihu sa kay ama si Dabid.

⁵ Nagsamba siya sa kan Astarut, sa diyusa manga Siduniyu hanggan sa kan Muluk, ti mayagting pag diyus manga Amunita.

⁶ Sa panab-anan inda, nakabwat si Sulumun kadautan sa magbantay Panginuun. Unman siya nagsunud buu tagipusuun sa Panginuun; balaw ga kay ama ga kan Dabid.

⁷ Nagpabuwat si Sulumun simbahan sa abwat pag rugar, baliwa sa butlakan Hirusalim, para sa kan Kimus, ti daut pag diyus manga Muabita. Nagpabuwat diman siya simbahan para sa kan Muluk, ti mayagting pag diyus manga Amunita.

⁸ Pinabwatan diman niya manga simbahan ti manga diyus-diyusan niya tanan asawa balaw Israilita, ati sida magtuub manga kamangyan ag maghandug para sa kanda manga diyus-diyusan.

⁹ Nagalit ti Panginuun sa kan Sulumun dahil nagpatlikud siya sa Panginuun, ti Diyus Israil, ti nagpakakit sa kanya kadwa ginan.

¹⁰ Una pinaalaman yi niya si Sulumun danga magsunud sa iba pag manga diyus, unman diman nagpaniwala si Sulumun sa kanya.

¹¹ Nakan magkun ti Panginuun sa kan Sulumun, “Dahil unman nimu sinunud kang kasunduan hanggan kang manga sugu, bul-un niku sa kanmu ti kaharian nimu ag ipakaun niku inda sa kanmu manga suruguun.

¹² Dapat dahil sa kanmu ama si Dabid unman niku inda buwatun sa kanmu habang buhi waya kawu. Buwatun niku inda sa panahun paghari nimu anak.

¹³ Dapat unman niku bul-un ti buu kaharian sa kanya, nu unman sawadan niku siya usa ka lahi dahil sa kang suruguun si Dabid ag dahil sa pinili niku ti banwa Hirusalim.”

Kay manga Kalaban ni Sulumun

¹⁴ Ipinahintulut Panginuun may lumaban sa kan Sulumun. Siya si Hadad taga Idum, ginan sa linahi usa ka hari Idum.

¹⁵ Sa kabag-u, pagka nanlaban si Dabid sa manga taga Idum, si Huab ti kumandir manga sundalu ni Dabid inmatag sa Idum hampay ilubung ti manga namatay sa labanan. Pagka ati yi siya, minatay niya hanggan niya manga kaibahan ti tanan lalaki sa Idum.

¹⁶ Unum ka bulan sida ati sa Idum. Unman gid sida nighit tugka sa udwaya natabu namatay ti tanan lalaki ati.

¹⁷ Dapat si Hadad anak waya ati katpung nakapalagiw siya atabug sa Ihiptu kaibahan ti iba ka manugpamahala taga Idum magsirbi sa kay ama.

¹⁸ Nighit sida sa Midyan atabug sa Paran. Kaibahan ti iba ka manga taga Paran, inmatag sida sa Ihiptu ag nagpakihampang sa hari Ihiptu. Pinakan-an hari si Hadad balay, daga hanggan karan-unun.

¹⁹ Kinaibgan hari Ihiptu si Hadad, nakan ipinaasawa niya sa kan Hadad kay bayaw, kay patar-ari niya asawa ni Rayna Tapinis.

²⁰ Sa kadugayun, nanganak lalaki kay asawa ni Hadad ag iningarnan nida Ginubat. Si Tapinis ti nagpadaka sa anak ati sa balay hari. Nangulian ati ti anak kaibahan sa manga anak hari.

²¹ Pagka ati sa Ihiptu si Hadad, nabaritaan niya tigbak yi si Dabid hanggan si Huab, ti kumandir manga sundalu. Magkun si Hadad sa hari Ihiptu, “Pahintuluti aku makauli sa kang nasyun.”

²² Nagpaingana ti hari, “Hayga? Unu waya lugud ti kurang sa kanmu sitay ag gustu waya nimu muli tag sa kanyu?” Sinmagut si Hadad, “Unman duy; basta payagi lang aku makauli.”

²³ May usa waya ka tawu ti pinahintulutan Diyus kumalaban sa kan Sulumun, si Risun kay anak ni Ilyada. Linmayas siya sa kay amu sa kan Hadadisir taga Suba,

²⁴ siya ti takinan manga tinipun niya maralaban. Pagka natalu ni Dabid ti manga sundalu ni Hadadisir, nag-atag si Risun hanggan kay manga tawuhan sa Damasku. Sinakup nida inda pag rugar ag ati sida pag nangulian.

²⁵ Naghari si Risun taga Aram, bag-u kinalaban niya ti Israil. Kalaban siya Israil habang buhi waya si Sulumun. Dinugangan waya niya kaguluhan binwat ni Hadad sa Israil.

Linabanan ni Hirubuam si Sulumun

²⁶ Usa waya ti nanlaban sa kan Sulumun si Hirubuam, usa sa manga manugpamahala niya. Mag-uli siya sa Sirida sa Ipraim. Kay ama si Nabat tigbak yi, dapat kay ina si Siruya buhi waya.

²⁷ Kaindaay kay nangyari nu hayga siya nanlaban sa hari: Ati katpung pagpatap-ukan ni Sulumun ti ababa pag bahagi banwa niya ama si Dabid, ag ipinahiwat ti manga alad batu.

²⁸ May kakayahan pag tawu si Hirubuam, ag nakitan inda ni Sulumun kay sipag, nakan binwat niya siya manugpanguna sa tanan tawu sa pilitan pagpatarabahuun ginan sa lahi ni Ipraim ag ni Manasis.

²⁹ Pagka sa usa ka sirang, habang magpalwas si Hirubuam sa Hirusalim, sinulang siya ni Purupita Ahiyas taga Silu. Bag-u pag rutay kay sulung ni Ahiyas. Sida lang duwa ati sa ratag.

³⁰ Linukas ni Ahiyas kay rutay panluwas bag-u ginitas niya sa 12 ka bahagi.

³¹ Pagkatapus, magkun siya sa kan Hirubuam, “Bul-a inda kay sampulu ka bahagi, dahil inda ti pagsabihun Panginuun, ti Diyus Israil: ‘Bul-un niku ti kaharian ni Sulumun bag-u ipakaun sa kanmu ti sampulu ka lahi.

³² Dapat dahil sa kan Dabid sa kang suruguun hanggan sa banwa Hirusalim, kang pinili para sa tanan banwa sa Israil, tayakan niku kay usa ka lahi sa kan Sulumun.

³³ Buwatun niku inda dahil binugyahan niya aku ag sinamba niya si Astarut, ti diyus manga Siduniyu, si Kimus, ti diyus manga Muabita, ag si Muluk, ti diyus manga Amunita. Unman siya nagsunud sa kang kagustuhan ag unman nangabuhi matadlung sa kang atubangan. Unman siya nagsunud sa kang manga surundanun ag manga sugu; balaw ga kay ama sa ga kan Dabid.

³⁴ Dapat balaw niku bul-un tanan ti buu kaharian sa kan Sulumun. Maghari siya sa buu niya buhi dahil sa kang pinili suruguun si Dabid, ti nagtupad sa kang manga sugu ag manga surundanun.

³⁵ Bul-un niku ti kaharian ginan sa kay anak umilis sa kanya bilang hari, ag ipakaun niku inda sa kanmu kay sampulu ka lahi.

³⁶ Pakan-an niku usa ka lahi kay anak hampay kay manga linahi ni Dabid pag suruguun pumarargu sa paghari sa Hirusalim, ti banwa niku pinili para galangun aku.

³⁷ Kawu buwatun niku hari sa Israil ag panguluhan nimu ti tanan nimu gustu panguluhan.

³⁸ Nu tupadun nimu ti tanan isugu niku sa kanmu ag sumunud kawu sa kang manga paanyu, hanggan nu bumuwat kawu mayad sa kang pamantay sa panab-anan pagtupad sa kang manga surundanun ag manga sugu parihu sa binwat ni Dabid kang suruguun, mangiba aku sa kanmu. Pumirmaminti sa paghari kanmu manga linahi parihu sa manga linahi ni Dabid. Maapu nimu ti Israil.

³⁹ Dahil sa manga kasalanan ni Sulumun, parusahan niku ti manga linahi ni Dabid, dapat balaw tugka aban.’ ”

⁴⁰ Nakan paghingabtun ni Sulumun matyun si Hirubuam, dapat linmayas si Hirubuam ag inmatag sa kan Hari Sisak taga Ihiptu ag ati siya pag nuli tugka sa namatay si Sulumun.

Ti Pagkamatay ni Sulumun

⁴¹ Ti iba waya ka tultulanun tungkul sa maghari ni Sulumun, ti tanan niya binwat, ag ti tungkul sa kay kadunungan, nisurat sa Ribru manga Binwat ni Sulumun.

⁴² Sa Hirusalim nangulian si Sulumun habang maghari siya sa buu Israil sa sulud upatpulu ka timpu.

⁴³ Pagka namatay siya, ilinbung siya sa banwa niya ama si Dabid. Ag si Rihubuam kay anak ti nag-ublus sa kanya bilang hari.