1 Hari 10 - Hanunuu

Nanabang ti Rayna Shiba sa kan Hari Sulumun

¹ Pagka nasaydan rayna Shiba ti kabantugan ni Sulumun nakapakaun kadayawan sa Panginuun, nag-atag siya sa kan Sulumun hampay subukan kay kadunungan sa panab-anan makuri pag manga paingana.

² Rinmas-ug siya sa Hirusalim may kaibahan mayamu tawu, ag may dara siya manga kamilyu punu manga panlakay, mayamu pag gintu, hanggan mahalaga pag manga batu. Pagka nagsampak siya sa kan Sulumun, pinaingana niya si Sulumun sa tanan niya pagkaibgun ipaingana.

³ Sinagut ni Sulumun ti tanan niya paingana ag unman gid may una di usa ka bagay ti unman niya naipaliwanag sa kanya.

⁴ Pagka napatutuuhanan rayna Shiba ti kadunungan ni Sulumun hanggan ti tungkul sa marinu pag balay kay ipinatindug,

⁵ unman siya makapaniwala. Katida diman igu nakitan niya ti karan-unun sa lamisa hari, ti pagpanguna niya manga may katungkulan, ti pagsirbi niya manga suruguun may marinu pag manga sulung rutay pari-parihu, ti manga manugsirbi kay irinmun, hanggan ti manga handug pagsunugun kay ihinandug sa Balay Diyus Panginuun.

⁶ Magkun siya sa hari, “Tutuu gid maaw kang nabaritaan sa kang nasyun tungkul sa kanmu manga binuwat hanggan kadunungan.

⁷ Unman aku naniwala hanggan di sa nag-ataytabug aku ag nakitan gid ngap niku inda. Sa ungud, unman inda sa katunga niku nasaydan tungkul sa kanmu ti kang nakitan. Kanmu kadunungan ag kayamanan subra waya sa kang nasaydan.

⁸ Mapalad kanmu manga tawuhan! Mapalad kanmu manga manugpamahala magsirbi sa kanmu dahil pirmi nida mag-adnugan kanmu kadunungan.

⁹ Dayawun ti Panginuun nimu Diyus, magbaya sa kanmu ag nagpauli sa kanmu sa kaharian Israil. Dahil unman may katapusan ti pagmahal Panginuun sa Israil, binwat niya kawu hari hampay humari kawu may katuwiran ag katadlungan.”

¹⁰ Bag-u pinakan-an niya si Hari Sulumun manga lima ka tunilada gintu, mayamu pag panlakay hanggan mahalaga pag manga batu. Unman gid may makatupung sa kayamuun panlakay ipinakaun rayna Shiba sa kan Hari Sulumun.

¹¹ (Ti manga barku ni Hiram nandara diman sa kan Hari Sulumun manga gintu, mayamu pag manga kayu almug, hanggan manga mahalaga pag manga batu, ginan sa Upir tanan-tanan.

¹² Ginamit hari ti manga kayu almug sa agdan Balay Diyus Panginuun hanggan sa balay hari, kay iba binwat manga alpa hanggan manga lira para sa manga manugpatunug. Imaw tunda ti pinakamayad pag manga kayu almug dinara sa Israil; taynguna unman yi may makitan parihu sa tunda.)

¹³ Ipinakaun ni Hari Sulumun sa rayna Shiba ti una hintay kay hinagad, tuhay di sa manga pamakaun ipinakaun ni Sulumun sa kanya. Bag-u nuli ti rayna sa kay rugar kaibahan kay manga tawuhan.

Ti Kayamanan ni Sulumun

¹⁴ Kada timpu magtanggap si Sulumun manga 23 ka tunilada gintu,

¹⁵ tuhay di sa manga buwis ginan sa manga manug-ahinti. Magpakaun diman sa kanya manga gintu ag pilak ti tanan hari sa Arabya ag ti manga gubirnadur sa Israil.

¹⁶ Nagpabuwat si Hari Sulumun 200 ka daraka manga panangga, ti kada panangga pinahaklupan manga pitu ka kilu gintu.

¹⁷ Nagpabuwat diman siya 300 ka dariit pag manga panangga, ti kada panangga pinahaklupan manga tulu may tunga ka kilu gintu. Ipinauli niya inda tanan ati baliwa sa balay hari pag-ingarnan Kapuruan Libanun.

¹⁸ Nagpabuwat diman ti hari usa ka daka pag turukawan human sa manga bangkil ilipanti, ag pinakputan inda lunsay gintu.

¹⁹ May unum ka halintang ti turukawan, malidung kay pasalandigan. May paratungbawan takyay sa baliw-baliw saruy, ag may imaw diman histuda liyun matindugan siyun sa kay puun baliw-baliw.

²⁰ May imaw waydi histuda liyun sa kada saruy halintang. Dusi tanan ka histuda sa unum ka halintang. Unman may makaparihu sa inda pag turukawan sa una naan pag kaharian.

²¹ Ti tanan pag irinman ni Hari Sulumun lunsay gintu, ag ti tanan pag kagamitan baliwa sa balay hari pag-ingarnan Kapuruan Libanun pudu diman gintu. Balaw inda binwat sa pilak dahil diit lang kay bili sa pilak sa udas ni Sulumun.

²² May manga barku diman si Sulumun pan-ahinti, pagdaran-un manga tawuhan ni Hiram. Inda pag manga barku mag-uli usa ka bisis sa tulu ka timpu, may dara manga gintu, pilak, bangkil ilipanti, ag daraka ngatay dariit pag kalasi manga amu.

²³ Unman may una si unu pag hari sa kalibutan ti makatupung sa kadunungan ag sa kayamanan ni Hari Sulumun.

²⁴ Ti tanan tawu sa kalibutan maggayak makitan si Sulumun hampay mamatingi sida sa kadunungan ipinakaun Diyus sa kanya.

²⁵ Kada timpu, ti kada usa magsabang sa kanya may dara manga pamakaun — manga bagay binwat ginan sa pilak ag gintu, manga rutay, manga armas, manga pamanglu, manga kabayu, ag manga mula.

²⁶ May 1,400 ka kalisa si Sulumun para sa kay manga kabayu ag manga kalisa. May 12,000 siya ka kabayu ipinauli niya sa manga banwa palaulian niya manga kalisa, ag kay iba ati sa kanya sa Hirusalim.

²⁷ Pagka sa udas siya ti hari, ti pilak sa Hirusalim ga parihu lang sa karaniwan manga batu, ag ti kayu sidru ga parihu ka abunda sa karaniwan pag manga kayu sikumuru sa manga kabantudan sa isalpan.

²⁸ Ti manga kabayu ni Sulumun ginan waya sa Ihiptu ag Silisya. Binili inda sa Silisya niya manga tagabili sa kang-ud pag halaga.

²⁹ Sa ati pag panahun, ti halaga kalisa ginan sa Ihiptu 600 bilug pilak, ag kay kabayu 150 ka bilug pilak. Ipinabili diman nida inda tanan sa hari manga Hitiyu hanggan Aramiyu.