1 Hari 1 - Hanunuu

Ti Uryan pag manga Sirang ni Hari Dabid

¹ Gurangun yi gid si Hari Dabid, una pakumutan waya siya madamul pag manga kumut pagramigun di siya.

² Nakan magkun sa kanya kay manga manugsirbi, “Mahal Hari, pasnui duy nimu kami manhanap anak daraga mangalaga sa kanmu. Mangulid siya sa kanmu hampay balaw kawu ramigun.”

³ Nakan nanhanap ngani sida marinu pag daraga sa buu Israil, ag nakitan nida si Abisag taga Sunim, ag dinara nida siya sa hari.

⁴ Marinu gid si Abisag, siya ti manug-alaga sa hari. Dapat unman gid naggaraw ti hari sa kanya.

Magkaibug Humari si Aduniyas

⁵ Taynguna, si Aduniyas kay anak ni Dabid sa kan Hagit magpadayaw siya ti dumasun pag hari. Nakan nag-alistu siya manga kalisa, manga kabayu, hanggan 50 ka tawu mag-una sa kanya kay taga guwardiya.

⁶ Ginan sa kabag-u pagpabay-anan lang siya ni Dabid ag balaw siya pagtamyawun sa kay manga pagbuwatun. Makurasug gid si Aduniyas imaw kay sunud sa kan Absalum kay patar-ari.

⁷ Nagpakihampang siya sa kan Huab kay anak ni Siruya hanggan sa kan Manug-asiwa Abyatar tungkul sa kay gayak humari, bag-u nagpasnu inda pag duwa hampay awatan siya.

⁸ Dapat unman napabliwa sa kanya si Manug-asiwa Saduk hanggan si Binaya anak ni Hihuyada, katunda diman si Purupita Natan, ag si Simiy, hanggan si Riy, hanggan diman ti manga guwardiya ni Dabid.

⁹ Pagka sa usa ka sirang, nag-atag si Aduniyas sa Batu Suhilit arani sa In Rugil, bag-u naghandug siya ati manga karanidu, manga baka, hanggan pinatabul ibun baka. Binan-awan niya ti harus tanan niya patar-ari lalaki manga anak ni Dabid, bag-u harus ti tanan takinan sa Huda.

¹⁰ Dapat unman niya binan-awan si Purupita Natan hanggan si Binaya, ag ti manga sadili guwardiya hari hanggan si Sulumun kay patar-ari.

¹¹ Nag-atag si Natan sa kan Batsiba sa kay ina ni Sulumun ag nagpaingana, “Unman aw lugud nimu alam kay anak ni Hagit si Aduniyas binwat hari kay sadili, ag unman may alam si Hari Dabid?

¹² Nu gustu nimu maribri kanmu buhi hanggan ti buhi nimu anak si Sulumun, sunda kang patigayun.

¹³ Ataga si Hari Dabid ag sabihun nimu sa kanya, ‘Mahal Hari, unman aw lugud nagtaratu kawu sa kangku kanta anak si Sulumun imaw ti umilis sa kanmu bilang hari? Bati hayga si Aduniyas ti hari?’

¹⁴ Habang maghampang kawu sa hari, sumulud aku ag patutuuhanan niku kanmu pagbagawun.”

¹⁵ Nakan nag-atag si Batsiba sa sulud-sulud hari. Masyadu gurangun yi gid ti hari ag si Abisag taga Sunim imaw ti manug-alaga sa kanya.

¹⁶ Nagyuk-ub si Batsiba bilang paggalang sa hari. Pinmaingana sa kanya ti hari, “Unu duy kanmu kailangan?”

¹⁷ Nagsagut si Batsiba, “Mahal Hari, nagtaratu kawu sa kangku sa ngaran Panginuun nimu Diyus kanta anak si Sulumun imaw ti umilis sa kanmu bilang hari.

¹⁸ Dapat taynguna si Aduniyas yi ti hari, unman gid nimu inda alam.

¹⁹ Naghandug siya mayamu pag manga tudu baka, pinatabul ibun baka, hanggan manga karanidu, bag-u binan-awan niya ti tanan nimu anak lalaki, purya lang sa kan Sulumun kanmu manugsirbi. Binan-awan diman niya si Manug-asiwa Abyatar hanggan si Huab ti kumandir nimu manga sundalu.

²⁰ Taynguna, Mahal Hari, mag-alagad ti manga Israilita sa kanmu paanyu nu si unu ti umilis sa kanmu bilang hari.

²¹ Nu balaw kawu manpaanyu, aku hanggan kang anak si Sulumun ipaparihu nida sa manugdaya nu tigbak yi kawu.”

²² Habang maghampang waya si Batsiba sa hari, rinmas-ug si Purupita Natan.

²³ May sinmabi sa hari kuntay rinmas-ug si Natan, nakan ipinatawag siya hari. Pagsulud ni Natan nagluhud siya bilang paggalang sa hari,

²⁴ bag-u magkun, “Mahal Hari, sinabi aw nimu kuntay si Aduniyas ti umilis sa kanmu bilang hari?

²⁵ Taynguna pag sirang, naghandug siya mayamu pag manga tudu baka, pinatabul ibun baka, hanggan manga karanidu. Ag binan-awan niya harus ti tanan nimu anak lalaki, ti kumandir nimu manga sundalu, hanggan si Manug-asiwa Abyatar. Magkaran-an sida mag-irinuman taynguna, bag-u magkun, ‘Mabuhi si Hari Aduniyas!’

²⁶ Dapat aku kanmu suruguun unman niya binan-awan hanggan si Manug-asiwa Saduk, si Binaya anak ni Hihuyada ag si Sulumun kanmu manugsirbi.

²⁷ Inda aw duy ti pasya nimu, Mahal Hari, unman nimu sinabi sa kanmi nu si unu ti umilis sa kanmu bilang hari?”

Pinili ni Dabid si Sulumun bilang Hari

²⁸ Magkun si Hari Dabid, “Sabihi si Batsiba pag-ataytag sa kangku.” Nakan nag-atag si Batsiba sa hari.

²⁹ Bag-u nagsumpa si Hari Dabid, “Magsumpa aku sa buhi pag Panginuun, ti nagribri sa kangku sa tanan pag kadamhakan,

³⁰ tupadun niku taynguna kang isinumpa sa kanmu sa ngaran Panginuun, ti Diyus Israil, si Sulumun kanta anak imaw ti kailis niku bilang hari.”

³¹ Rargu linmuhud si Batsiba bilang paggalang sa hari, ag magkun, “Mahal Hari Dabid, mana mabuhi kawu dugay!”

³² Magkun si Hari Dabid, “Paataytagan si Manug-asiwa Saduk, si Purupita Natan, ag si Binaya anak ni Hihuyada.” Nakan nag-atag ngani sida sa hari,

³³ bag-u magkun ti hari sa kanda, “Pasakyan niyu kang anak si Sulumun sa kang mula, ag daran-a niyu siya hanggan kang manga manugpamahala tag sa Gihun.

³⁴ Nu rumas-ug kamu ati, Saduk hanggan si Natan, kamu ti humaplas lana ulibu sa ulu ni Sulumun sa pagpakakit siya ti pinili pag hari sa Israil. Bag-u patunuga niyu ti budyung pagringgit, ‘Mabuhi si Hari Sulumun!’

³⁵ Pagkatapus ibahi niyu siya sa pagbalik sitay, bag-u tumukaw siya sa kang tukawan ag umilis sa kangku bilang hari. Siya ti pinili niku manugpanguna sa buu Israil hanggan sa Huda.”

³⁶ Nagsagut si Binaya anak ni Hihuyada, “Buwatun nimi inda! Mahal Hari, mana ti Panginuun nimu Diyus ti pumatutuu inda.

³⁷ Ag nu kabitay nag-iba sa kanmu, Mahal Hari, ti Panginuun, mana umiba diman sa kan Sulumun, ag buwatun niya mas marinu kay maghari kaysa kanmu maghari.”

³⁸ Nakan linmakaw sida ni manughandug Saduk hanggan si Purupita Natan, ag si Binaya anak ni Hihuyada, bag-u ti manga alalay ni Dabid manga Kiritiyu ag Pilitiyu. Ipinasakay nida si Sulumun sa mula ni Hari Dabid ag dinara sa Gihun.

³⁹ Pagras-ug nida ati, bin-ul ni Saduk sa banal pag turda ti lana masukadan sa sungay pag palaulian, bag-u hinaplasan niya si Sulumun sa ulu. Ipinatunug nida ti budyung ag nagringgit sida tanan, “Mabuhi si Hari Sulumun!”

⁴⁰ Si Sulumun itinibu manga tawu maghuruyawan sa kabayaan ag magpatunug manga palawta nuli sa Hirusalim. Ga magkatandug ti daga sa kanda iringayan.

⁴¹ Nasaydan inda ni Aduniyas hanggan niya manga bisita habang patapus yi kanda handaan. Pagka nadnugan ni Huab ti budyung, namaingana siya, “Hintay nguna ti nangyari, hayga masyadu maingay sa banwa?”

⁴² Habang magbagaw waya siya, rinmas-ug si Hunatan anak ni Manug-asiwa Abyatar. Magkun si Aduniyas, “Pagsaka, dahil mayad kawu pag tawu pihu may dara kawu mayad pag barita.”

⁴³ Nagsagut si Hunatan, “Balaw mayad pag barita, dahil binwat hari ni Hari Dabid si Sulumun.

⁴⁴ Ipinaatag niya sida sa Gihun kaibahan si Manug-asiwa Saduk, hanggan si Purupita Natan, ag si Binaya anak ni Hihuyada, bag-u kay manga alalay manga Kiritiyu ag manga Pilitiyu. Ipinasakay waya nida si Sulumun sa mula hari.

⁴⁵ Pagras-ug nida sa Gihun, hinaplasan lana ulibu siya ni Saduk ag ni Natan sa pagpakakit siya ti pinili pag hari. Bag-u lang sida nakabalik, nakan ngani maghuruyawan ti manga tawu sa banwa. Imaw tunda pag iringayan kanyu mag-asaydan.

⁴⁶ Bag-u taynguna, si Sulumun yi ti matukawan sa turukawan bilang hari.

⁴⁷ Nag-atag waya sa kan Hari Dabid kay manga manugpamahala hampay manpasalamat sa kanya. Magkun sida, ‘Mana buwatun nimu Diyus mas bantug kaysa kanmu si Sulumun, ag buwatun niya mas marinu kay maghari kaysa kanmu maghari.’ Nanyuk-ub rargu si Dabid sa kay parahuwayan sa pagsamba sa Panginuun,

⁴⁸ ag magkun, ‘Dayawun ti Panginuun, ti Diyus Israil, ti nagpahintulut sa kangku makakit taynguna pag sirang sa pag-ublus niku anak bilang hari.’ ”

⁴⁹ Pagka nasaydan inda manga bisita ni Aduniyas, nagtirindug sida sa masyadu pag kadalaan, ag nagkanya-kanya sida lakaw.

⁵⁰ Nadala diman si Aduniyas sa kan Sulumun, nakan nag-ati siya sa banal pag turda ag nanhiyaput sa manga ga sungay pag manga suuk harandugan.

⁵¹ Taynguna may nagtultul sa kan Sulumun, “Nadala duy sa kanmu si Aduniyas, ag nanhiyaput siya taynguna sa manga ga sungay pag manga suuk harandugan. Paghagadun niya pagsumpa kawu kuntay danga nimu siya pagmatya.”

⁵² Magkun si Sulumun, “Nu balaw siya mandaya sa kangku, balaw gid siya maunu. Dapat nu mandaya siya pihu mamatay.”

⁵³ Bag-u ipinab-ul ni Hari Sulumun si Aduniyas ati sa harandugan, pagkaras-ug ni Aduniyas, linmuhud siya bilang paggalang sa kan Hari Sulumun. Magkun si Sulumun sa kanya, “Pag-uli yi kawu.”