Visirai 7 - Hano Niu Testamen

Sinombu ata Israel Vasan̄vul Vatuvwa Vena N̄avul Gaivasi Domwan Gaivasi

¹ Ataguna geki nan gita enjel gaivasi, ran tu bataha sigun ureure duluai, ram haḡo ḡoro halan lan̄i gaivasi, huri be lan̄i sihav herei te ureure sa tahi sa gai.

² Haḡe nam ḡita enjel vwate mwa mwalue nin tanon al tomare mai tigoro non God rahu. Kea mwa ulo amare gin silo gaivua lalai ira enjel gaivasi gabe God nu lai muramura lalainira be rav lol hantai tahi mai ureure.

³ Haḡe enjel mwa bevea be, “Gisav lol te hantai ureure mai tahi i gai duluai, vaivotu be gai bul dovon̄ana alura gabe atatun rovoga non nonda God gin dovon̄a alun rera.”

⁴ I mwa bevea lalaiau be, dovon̄an atatu gabe mwa bul dovon̄ana alun rera gin dovon̄a non God kun vasan̄vul vatuvwa vena n̄avul gaivasi domwana gaivasi (144,000). Kera nin varan Israel han̄vul domwan gairua,

^5-8 Vasan̄vul vahan̄vul domwan gairua nin vataha vara duluai kun Juda, Ruben, Kad, Asa, Navtali, Manase, Simion, Livae, Aisaka, Sebulon, Josep mai Benjemen.

Tatan̄an Sinombu Tari

⁹ Atagun ginau geki nam ḡarere i nam ḡita dum tatan̄an sinombu be atatu vwate sihav vului te dum sinombu duluai! Kera nin vataha lalan̄an atatu be gulira dodolua, i vanua i varan sinombu, i avoana, i ram du la lolmatan tanon togotogon ratahigi mai nitui sipsip, ram sagasagai gaisaga maita, i rauniuniu la limara.

¹⁰ Ram haharigi amare gin silo gaivua, ram bevea be: “Varahuva mwa mai nin nonda God, gabe mwa dogo la tanon togotogon ratahigi, i alun nitui sipsip!”

¹¹ Ira enjel ram du dalis tanon togotogon ratahigi, mai ira bwat metua, i ginau rahu gaivasi. Haḡe ram hiv bahudui gin lol matara ḡoro tanon togotogon ratahigi i ram gogonai God,

¹² ram bevea be, “Amen! Roroa, roron̄o, rihumaragai avkariana, gogonai, i muramura, i vuhun̄ana non nonda God vai tuai vai tuai! Amen!”

¹³ Haḡe bwatmetua vwate mwa hudaliau mwa bevea be, “Sinombu gabe gaisaga nu maita kera ira hei, i ram mai behe?”

¹⁴ “Nam bwaliua be, ratahigi nam hav iloe tehe, giḡo gom iloe.” Kea mwa bevea lalaiau be, “Geki haḡea sinombu gabe ran ron̄ ḡagarasi i ram wehira huri nora binihimwasigi. Mwa bwaga melmeloinira gin dagan nitui sipsip.

¹⁵ Kea haḡea bwatuna be ram du la lolmatan tanon togotogon ratahigi God, i ram ḡogonainia boni i rani lol non Imwa Tataro. Kea gabe mwa dogo la tanon togotogon ratahigi vi varahura ginia sibona.

¹⁶ Maro sihav gas te dumwira, i rasav mandou te mulei; i gigitan alo sage ute hahavwani sihav dumwira te mulei,

¹⁷ bwatuna be, nitui sipsip gabe mwa du bora lolon tanon togotogon ratahigi, vivora nora radaiḡoro, i vi tomuai nira vai la matavuravuran wai rahu. God vi man̄ dagai matarua duluai nin matara.”