Visirai 4 - Hano Niu Testamen

Gogonaiana ata Amare

¹ Atagun ginau kerageki nam hueri mulei vwate, i nam ḡita matgatavan ute atamare mwa mahavan̄i. Haḡe nam ron̄ silo mwa datan̄i kun silon taiva la silo n̄an gea be nan ron̄oe amua mwa bevea be, “Hamai teti i nai vagahigo gin havanau gabe vi loli ataguna geki.”

² Haḡe darihou Vui mwa bwalauau. Aia lol ute atamare tanon togotogon Ratahigi i atatu vwate mwa dogo aluna.

³ Lolmatana nu sarisari kun vatlegiga, i an̄oga, i tabaḡao ḡalḡalana mwa en dalisia.

⁴ Alun tanon togotogon ratahigi be mwa dogo huba, tanon togotogo n̄avul gairua domwan gaivasi ram du dalisia, i alun tanon togotogo gea, ira bwatmetua n̄avul gairua domwan gaivasi ram domahuri aluna gaisagara nu abwaga i gaisosorin bwatura be nu loliana gin vatan̄oga.

⁵ Haḡe mwa bilehi ḡao nin tanon togotogon ratahigi, i mwa maragabaga, i mwa bwahilo. I la lolmatan tanon togotogon ratahigi here gaibitu ram onda ram du ram bula, i geki ira Vui gaibitu be ram mai nin God.

⁶ I mulei lolmatan tanon togotogon ratahigi, ginau vwate gitavanana nu raraniga kun tahi be nu legiga kun kilasi. Dalis tanon togotogon ratahigi mwa bulu, ginau rahu gaivasi, matara ran masiri lol matara i atagura.

⁷ Muana gitavanana kun laion; gairuana gitavanana kun buluk atamwani; gaitoluna lolmatana kun lolmatan atatu; i gaivasina gitavanana nuḡun mala be mwa ḡaga.

⁸ Ginau rahu gaivasi gabaura gaiononoi vatvatahara. I matara ivusi vatvatahara, alolora i avare mulei. I ram hav mambumambu tehe, ram lol iboi, rani i bon̄i, ram bevea be: “Sabuga, sabuga, sabuga, Ratahigi God Holomare Hae, gom dogo tuai huba, i garigi, i vi mai radu.”

⁹ Haḡe ginau rahu gaivasi ram lol iboin avkari i sabuga i lol roroai lalainia gabe mwa dogo la tanon togotogon ratahigi, gabe mwa dogo tuai vai tuai. I mahavana be ram lolia kunia,

¹⁰ ira bwat metua n̄avul gairua domwan gaivasi ram hiv bahudui vai ataa la lolmatana gabe mwa dogo la tanon togotogon ratahigi, i ram ḡogonainia gabe mwa dogo tuai vai tuai. I ram bohai gaisosorin bwatura vai ataa lolmatan tanon togotogon ratahigi, ram bevea be,

¹¹ “Nonda Ratahigi i God! Giḡo gon dadariha be gov lai muramura, i roroa, i sarisari. Huri be gon tau ginau duluai, i gin nom binihiva gon taura i ram du.”