Visirai 21 - Hano Niu Testamen

Ute Atamare Gara i Ureure Gara

¹ I nam ḡita ute atamare gara i ureure gara. Huri muan mahao i muan ureure nu van dagai huba, i tahi mulei sigai.

² I nam gita bwatutun vanua sabuga, Jerusalem Gara, mwa himai nin God lol ute atamare vai ataa. Nu vagaha vatuvwainia kun vavin lagi nu gabuinia huri lagiana i mwa hohovi be vi visogari mai ahoana.

³ Haḡe nan ron̄ silo gaivua mwa mai nin tanon togotogon ratahigi, mwa bevea be, “Gita imwa hauhau non God mai non silo i kea vi togo la imwana maira, i kera rai vora non sinombu, i kea vivora nora God.

⁴ Haḡe God vi man̄ kaburai hun matara duluai nin matara, i mateana mulei sigai, i lolovono mulei sigai, sa deiana, sa gagarasi vainon̄oiha, bwatuna ginau ata amua ram ban dagai kaburai vai tuai.”

⁵ Haḡe kea gabe mwa dogo la tanon togotogon ratahigi mwa bevea be, “Gita nam lol garai ginau duluai.” Haḡe mwa bevea lalaiau be, “Ravae ḡoroe, huri avoana geki mwasin avoana mwasigi.”

⁶ Haḡe nu vevea lalaiau be, “Ginau duluai nu nogo huba. Inau Alva i Omeka, Bwatuna i nogonana. Nav lai vuroinia lalai hei nu mandou mata vuravuran wai rahu lalainira duluai gabe ram mwinua.

⁷ Ihei be nu rihu maragai, vi haḡo houn ginau duluai, i inau nai vora nora God i kera rai vora noḡu sinombu.

⁸ Take nai vevea lalai kimiu huri havanau be vi loli lalai ihei tehe be ram matmatagu; i lalainira be ram lol salil silo, i lalai ira hei be ram lol alen̄ bibili, sage ram wehiwehi bonogai, sage hovita lol bwatigoro, ira hei gabe ram lalaḡoi mateana i mera, i lalai nira be ram ḡogonai nun vatu dodolua, i lalai ira tenteneana. I vi vohainira gea vai lol numbun wain gabi tabwalue mai salva, geki gairuan mateana.”

Jerusalem Gara

⁹ I nam ḡita vwate alolon ira enjel gaibitu be mwa haḡo disi gaibitu be ran masiri gin nogonan ginau gaibitu be ran hahantai. Haḡe enjel mwa mai huriau mwa bevea be, “Mai teti! I nai vagahigo be kea vavine non Sipsip kolo.”

¹⁰ Haḡe gin buluiana non Vui, kea mwa domuaiau vai la n̄alivun vusi holomare. I aia kea mwa bagahiau gin bwatutun vanua sabuga Jerusalem mwa himai amare nin God.

¹¹ Haḡe sarisarin God mwa lol bwatutun vanua mwa ḡigita. Mwa sarisari i nu melmelo kun raumatan vatu be nu legiga maragai.

¹² Haḡe aran bwatutun vanua nu holomare i nu vonoga mai gatavana han̄vul domwa gairua, ira enjel han̄vul domwan gairua be ram du la matmatai ḡoro vataha matgatava han̄vulu domwan gairua. La matgatava han̄vul dowman gairua gea, ram rav ihan ira vara ata Israel han̄vul dowman gairua alura.

¹³ Matgatavan ara gaitolu kera geki vai gin tanon al tomare, i gaitolu la bwatun ureure, i gaitolu mulei la n̄olin ureure.

¹⁴ Vatun sigun bwatutun vanua mwa dariana alun vatu han̄vul domwan gairua. Ihan sipsip gaitutuvwai batvatahara mwa hurin ihan ira hala han̄vul domwan gairua.

¹⁵ Haḡe enjel gabe mwa avo maiau mwa haḡo gai tovtovo be nu loliana gin vatan̄oga be vi tov bwatutun vanua mai ira matgatavana i ute bwatuna.

¹⁶ Bwatutun vanua la gitavanana kun gabe nu dadariha duluai la gaivuanana i holomareanana, bwatuna be la holomareanana i gaivuanana, nu dadariha duluai. Mahavana be enjel mwa dov bwatutun vanua la holomareanana kun mael vasan̄vul vatuvwa vudolu valima, i mael vasan̄vul vatuvwa vudolu valima la gaivuanana dalisia duluai.

¹⁷ Haḡe enjel mwa dov utebwatu, i la nomai tovtovo la holomareanana kun vavarahin bwalage n̄avul gaiono.

¹⁸ Utebwatuna nu loliana gin jaspa, i bwatutun vanua gea ran lolia gin vatan̄oga be nu raraniga, i nu melmelo kun kilasi.

¹⁹ Vataha bwatbwatuna han̄vul domwan gairua vatu legiga. Muana jaspa, gairuana savaea, gaitoluna ahat, gaivasina emerol,

²⁰ I gailimana onigis, i gaionona kanilian, i gaibituna girisolait, i gaivweluna beril, i gaisivona topas, i han̄vuluna girisopereis, i domwan gaituvwana jasin, i domwan gairuana ametis.

²¹ Ira gatav lalavoa han̄vul domwan gairua ran lolia gin beril, matagara gaitutuvwai nu loliana gin beril. Hal gaivua huri bwatutun vanua ran lolia gin vatan̄oga i nu raraniga kun kilasi, nu sarisari kun kilasi.

²² Nam hav mom ḡita imwa tataro lol bwatutun vanua gaivua, bwatuna be God mwasin roron̄o mai Nitui Sipsip haḡea imwa tataro.

²³ Bwatutun vanua mwa hav mom doron te alo sa vula be vi gigitainia. I sarisarin God mwa odae i Nitui Sipsip mwa bora non gigita.

²⁴ Varan sinombu duluai rav lago gin gigitan bwatutun vanua, i ira ratahigi lavoa ata lol ureure rav hagai rosora gi nora hogoi lalainia.

²⁵ I matgatavan bwatutun vanua vi mahavan̄i vataha gubwen̄i duluai i bon̄i sigai.

²⁶ Ira varan sinombu duluai rav hagai rosora duluai gin gogonaiana vai lol bwatutun vanua.

²⁷ I havanau hantai mulei sihav mom haroro vai alolon bwatutun vanua gea. I rahuanan bwatigoro mulei sigai aia, sage tenteneana. Ira sinombu n̄an alolon bwatutun vanua vivora kera duluai gabe ihara nu ravana lol buka non Nitui Sipsip huri rahuana.