Visirai 20 - Hano Niu Testamen

Taul Vasan̄vulu

¹ Nan gita enjel mwa himai nin amare, i mwa haḡo gaihavan̄i vai lol banoi roro mai gao talai. Haḡe kea mwa bauhi drakon gin gao talai huri taul vasan̄vulu.

² Kea gabe drakon ata tuai gea, be mwa iloana mulei be atmate mai Setan.

³ Haḡe enjel mwa bohai drakon vai lol banoi. I mwa lok batugehi vatuvwainia, huria be taul vasan̄vulu vi nogo, drakon sihav mom dentene tehe lalai sinombu huri taul vasan̄vulu. Take vivora huri mahavana vwelvwele n̄an.

⁴ I nan gita ira tanon togotogon ratahigi, i alun tanon togotogon ratahigi gea kera gabe nu tarira gi ira harahara. I nan gita vuin sinombu gabe ran wehira huribe ran toretore huri roroi non God. Kera geki haḡea atatu gabe ran hav gogonai te ginau rahu mai nun vatu, i ran hav mahin̄a tehe be vi tauana na nora dovon̄a non ginau rahu sage ginau rahu alun limara, sage alun rera. Kera geki rav rahu, i rav tomua mai Kraes huri taul vasan̄vulu.

^5-6 (Atat dodolua be ran mate rasav tomare te mulei nin mateana. Take rav hohovi huri taul vasan̄vulu.) Geki Gairuan tomarean mulei nin mateana. God mwa batavuhainira be ran tomare mulei nin muan tomarean mulei. Gairuan mateana kea nu hav muramuraga tehe alura. Ram dogo gi muai tataroi non God i Kraes, i ram ḡitaḡoro mai Kraes huri taul vasan̄vulu.

Setan mwa hovi

⁷ I atagun taul vasan̄vulu, rav ribwesi Setan nin gao vauvauhi.

⁸ Kea vi vano lol ute duluai be men ruruhi varan sinombu duluai ata lol ureure i non Kok mai Makok, i vi hara ḡoḡo sinombu duluai ata lol ureure be rav bwalo mai atatu non God, i non sinombu gea rav ivusi kun one huri tahi.

⁹ I kera gea rai visirae i rav haravui sinombu duluai ata lol ureure, i rav dalis ute gabe sinombu non God ram du aia, i lol bwatutun vanua gabe God mwa dabe maragainia. Take gabi vi himai nin amare i vi oda kaburai atatun bwaloana duluai.

¹⁰ Haḡe atmate be mwa ruruhira vi vohai kaburainia vai lol numbun wain gabi tabwalue mai salva. I Kea vi togo aia maira ginau rahu turu i ira atatun vevsera tentene, i rav ron̄ḡagarasi bon̄i i rani mosmosianana sigai.

Nogonan Gubwen̄i huri Ureure

¹¹ Nam ḡita tanon togotogo maita kun gabe tanon togotogon ratahigi i atatu vwate mwa dogo aluna. Haḡe ureure mai mahao ramuru lol ron̄oe be raru vi rov maragai, take ute vwat sigai mulei be raru vi hili aia.

¹² I nam ḡita atat mate duluai, be ram du la lolmatan tanon togotogon ratahigi gea. Kera duluai gea be tuai, ran vora ira lavoa mai ira atat hivhivo. Haḡe ira enjel ram bugeri buka rituai, i ram bugeri bukan rahuana mulei. Haḡe mwa bevegira be ran mate gin havanau gabe nu ravan ḡoro lol buka hurin nora lalaḡova.

¹³ I atatu duluai gabe ran mate lol tahi ram mwalue duluai. I atatmate dodolua mulei ram mai. Bwatuna mateana sihav tu te ḡorora. Haḡe wani gea mwa bevegira huri nora lalaḡova be ran lolia tuai.

¹⁴ Atagun vevegi, haḡe enjel mwa bohai kaburai mateana lol tanon mateana vai lol numbun wain gabi tabwalue. (Numbun wain gabi tabwalue geki kea gairuan mateana.)

¹⁵ Haḡe ihei tehe gabe ihana nu hav ravana tehe vai lol bukan rahuana, enjel mwa bohainira vai lol numbun wain gabi tabwalue.