Visirai 2 - Hano Niu Testamen

Roroi vai Ivisas

¹ Gov rav noḡu avoana vi vano lalai enjel lol uloilua Ivisas ba bevea be: “Geki noḡu avoana haḡea be nam haḡo visiu gaibitu la mwatuaku, i nam lago lol davolan gaihaḡon bulu gaibitu be gulina kun vatan̄oga.

² Nam ilo alen̄amiu mai havanau be gim lolia Ivisas. I nam iloe be gim lol rovoga hahavwani i gim ron̄ mwa n̄ava lol binihimiu liu. Nam iloe be gim hav samsamwara te n̄an haḡea alun ira atat lete, i nam ilo kimiu huba ira hei gea be ram bevea be kera ira hala take ram dentene, i gin habwera huba be ram dentene n̄ano.

³ Nam iloe huba be binihimiu n̄ava. Atatu ram lol ḡagaras kimiu gim ron̄ mwa hantai lol rebehimiu huri ihaku take binihimiu mwa hav hovi tehe.

⁴ Take nomiu vahalana vwate mwa du ḡoro lol mataku, gim hav mom doron te maragaiau, kunia be gin tabeau la bwativuna.

⁵ Kimiu giv vinihi dum taro be gin togo tuai alolona, mahavana be gin hav hovi tehe radu, i giv vinihi leahi nin vuromiu duluai; i giv togo lol rahuana be gin togo aluna amua. Take be kimiu gisav van te burigai nin vuromiu, kunia inau nai mai mulei huri kimiu, i nav lai dagai tanon nomiu bulu.

⁶ Take ginau vwate be kimiu gim lolia be nu tavuha. Kimiu gim hav doron te be giv haroro alolon vatugigi non ira Nikolas. I kimiu gim ban burigainira kunia n̄an mulei be inau nam ban burigainira.”

⁷ “Atatu be bwerona abena na roron̄tai tavuhai avoana duluai be Vui Sabuga mwa bevea lalai uloilua duluai. I lalainira be ran muramuraga lol bwaloana, nav lai mahin̄ana lalainira be rav gan vwaigain rahuana be mwa mauri alolon ute loloara bilan God.”

Roroi vai Smana

⁸ Gov rav noḡu avoana vi vano lalai enjel lol uloilua Smana ba bevea be, “Geki roroi nin wani be kea muana i nogonana, i gabe nu mate i mwa rahu mulei.

⁹ Nam ilo nomiu vahalana huba la vanua Smana. Nam iloe be kimiu gim hiruga, take mwasigi be kimiu ira ratahigin roso. I nam ilo nora avoan hahantai gea be ram avo vai alumiu. Ram bevera be kera ira Jius, take ram la ram dentene. Nora imwa tataro imwan Setan tavuhai haḡea.

¹⁰ Gisav matagun te havanau tehe gabe mwa abena be men dum kimiu. Giv roron̄tai! Setan vi lol ron̄ kimiu, i vi lolia rituai alolomiu ram togo lol imwa vauvauhi i vi vora kunia huri gubwen̄ han̄vulu. Gisav matagu tehe, son̄o be rav wehi kimiu. I nav lai tavwe lalai kimiu, kun gabe tavwen nomiu garogaroana.

¹¹ Atatu be bwerona abena na roron̄tai tavuhai avoana duluai be Vui Sabuga mwa bevea lalai uloilua duluai!” “Ira hei gabe ram muramuraga lol nora garogaroana, lol taro be mateana vi mai varuana sihav wehi te dumwia.”

Roroi vai Pekamam

¹² Gov rav noḡu avoana vi vano lalai enjel lol uloilua Pekamam ba bevea be, “Geki roroi nin wani be non buan bwaloana mamagani be mata daldali.

¹³ Inau nam ilo tanomiu huba gea lol vanua Pekamam, gabe Setan mwa lolia kun gabe kea ratahigi lavoa ḡoroe huba. Kimiu gim haḡo wasi ihaku radu, i mahavana be kera ram wehi mwasin gaituraku Antibas, mwa mate la bwatutun vanuamiu, gabe Setan mwa domua ḡoroe huba, take alen̄amiu huri binihimwasigi garagusi gisav tahuli te dumwia giniau.

¹⁴ Take ginau ivusi gim lolia be ran hav vavtutu tehe lol mataku. I atatu rituai lol tatan̄an gaituvwa bul mai kimiu, rituai ram huri avoana non atatun vevsera gea Balam tuai. Atatun vevsera gea mwa dogo mwa bagahi halan Ratahigi lavoa Balak be men saruruhi ata Israel huri be ramen hovi lol bwatigoro. I kera ram ḡan bigi gabe ran tataroi ginia huba lalai God dolua, i ran vahala lol halan lagiana mai atat dolua.

¹⁵ Kunia n̄an mulei, lol tatan̄ana be gim dogo alolona, atatu rituai gabe ram huri avoana non tatan̄ana gabe non Nikolas.

¹⁶ Giv van burigai nin vuromiu duluai! Be gisav vinihi te leahi, sihav n̄ava tehe, nai mai mulei huri kimiu i nai bwalo mai sinombu kera gea gin buan bwaloana gabe mwa mwalue nin lolvwaku.”

¹⁷ “Atatu be bwerona abena, na roron̄tai tavuhai huri havanau gabe Vui mwa bevea lalai uloilua duluai!” “Lalainira gabe ran muramuraga lol bwaloana, nav lai ginaganiana mwa du dahuligi be mana. Nav lai vatu maita lalainira batvatahara mulei gabe iha gara mwa ravana aluna be atatu vwate mwa hav iloe tehe vaivotu be atatu n̄an gabe mwa laia lalainia.”

Roroi vai Taeatira

¹⁸ Gov rav noḡu avoana vi vano lalai enjel lol uloilua Taeatira ba bevea be, “Geki roroi nin Nitun God, gabe matana nu ḡun gabi oda, be bwalagena ataa ran gigita ḡun vatmerameraga be ram man̄ia gin bolis mwa legiga.

¹⁹ Nam ilo havanau be gom lolia nam ilo nom lolotabetabe, i nam iloe be gim bului maragai sinombu, i nomiu binihiva mwa du wasigi n̄avaigi, mwa hav hovi tehe, i nam iloe nomiu rovoga kadogaha mwa davuha nin amua.

²⁰ Take geki ginau gabe nai van burigai kimiu aluna: take gim lin̄ia vavine gea mwa dogo radu mai kimiu, gabe kea kun vavine gea be nu togo tuai Jesebel, kea nu togo mwa bagahi be kea horata non God. I lol non silo vagahi kea mwa salai noḡu atatun rovoga la hala be atatu mwa lol bahala lol halan lagiana, i ram ḡan bigi gabe mwa dataroi ginia huba lalai nun vatu.

²¹ Nam lai taro lalainia be vi vinihi leahi lol non vahalana alun bwatigoro take mwa barihai didi binihi leahi nin vurona.

²² I nai vohainia vai ataa la bata vwate aia be kera ran bulu maia lol bwatigoro rav ron̄ ḡagarasi liu. Nav lolia n̄an kadogaha vai votu be kera rai vinihi leahi nin vurora be ran vahala la halan lagiana.

²³ Inau nai wehi non virangai mulei, i kunia uloilua duluai vi iloe be inau haḡea be nam ilo binihin atatu duluai mai nora doroniva. Nav lai tavwe lalai gaitutuvwai i vatvataha kimiu hurin hava lalaḡova be kea nu lolia.”

²⁴ “Take kimiu duluai lol vanua Taeatira gim hav huri te silo vagahi bahala geki; kimiu gim hav huri te vahalana gea gabe ram uloinia be mwasin avoan tavuha non Setan be binihivanana mwa du dahuligi, i inau nam haḡo nomiu avoana mulei. Nam doron be nav tau ginau marahi rituai mulei la isibwamiu,

²⁵ take nam doron be kimiu giv haḡo wasi alen̄a gea be mwa en alumiu vaivotu be nai mai mulei.

^26-27 Lalainira be rav muramuraga lol bwaloana vaivotu nogonana, inau nav lai muramura gea lalainira be tata nu laia lalaiau. Nav lai muramura lalainira ḡoro varan sinombu duluai la ureure, i rav lavoa ḡorora. I nora bwatan bwaloana be dovon̄an ihara be ihan tanon lavoa, i kea nu ḡun aian be nu dadariha be vi wehi bora rebehin atatu lol ute duluai, kunia be aian vi tal momogai bwalgulu n̄oto i vi maverovero,

²⁸ i nav lai mahoe mulei lalainira.

²⁹ Atatu gabe bwerona abena na roron̄tai tavuhai huri havanau gabe Vui mwa bevea lalai uloilua duluai.”