Visirai 17 - Hano Niu Testamen

Vavin Rovrovoi Homu Roroa

¹ Haḡe vwate alolora enjel gaibitu be ram haḡo disi gaibitu mwa hamai abeku mwa bevea be, “Hamai, i nai vagahigo huria be kun hanigi vavin rovrovoi homu vi lai silo vevegi, nu dadariha mai bwatutun vanua gaivua gea be nu tomareana lol davolan wai rov lalavoa ivusi.

² Ira ratahigi lavoa ata lol ureure ram lol bwatigoro bul mai rebehina, i wai mwa wehi sinombu ata lol ureure gin wai mwinmwinun waen huri non bwatigoro.”

³ Haḡe vui mwa domuaiau i enjel mwa domuaiau vai la vanua vuroi. I aia nam ḡita vavine mwa dogo alun ginau rahu turu memea mai iha gabe mwa av hantai vai alun God, be nu ravan seserai alun rebehina duluai. Ginau rahu turu gea mauana gaibitu i bwatuna han̄vulu.

⁴ Vavine gea nu sagasagai gav tarabehiga mai memea raraniga, i nu gabuian bamasiri gin vatan̄oga, rau matan vatu, mai ginau bibili i ginau hahantai, kun gabe vwaliun non bwatigoro gabe nu lolia.

⁵ Iha vwate nu ravana la bwatuna binihivanana mwa hili, i mwa bevea be: “Inau bwatutun vanua Babilon, ratahin bwatigoro duluai mai ginau hantai ata lol ureure.”

⁶ Nai vev dumwia be vavine mwa wehi maragai gin wai, huribe mwa mwinmwinu alun dagan sinombu non God gabe ram lin̄ rahura huri Jisas. Ginau geki mwa lolia nam dan̄an̄a,

⁷ i enjel mwa bevea be: “Hurihano gom dan̄an̄a maragai? Nai vev melmeloinia huri halana be mwa du dahuligi huri vavine geki i huri ginau rahu be kea mwa dogo aluna mai bwatuna gaibitu i mauana han̄vulu.

⁸ Ginau rahu be gon gitae amua nu rahu take kadogaha mwa hav mom dogo tehe. I sihav n̄ava tehe vi mwalue nin banoi roro, n̄an huri be men lol Kaburai. I atatu gabe ihara nu hav ravan te ḡoro alun bukan rahuana la bwativun ureure radui, rav masiri gin binihiv lalan̄aga i dan̄an̄a. Rav gita ginau rahu geki be nu rahu amua take kadogaha mwa hav mom rahu tehe, take vi mom mai mulei vatuvwa.”

⁹ “Ihei be nu mataisaoga vi lol ron̄oe be vi habwe binihiva ata lol avoana gea kera gea. Bwatu gaibitu gabe vavine mwa dogo aluna mwa du huri vusi gaibitu. I binihiva mulei huri bwatu gaibitu mulei geki be ira ratahigi lavoa gaibitu.

¹⁰ Ira ratahigi lavoa gailima ran mate huba. I gaituvwa mwa domua radu kadogaha, i gaituvwa mwa hav mai te radu. Take mahavana be vi mai vi tomua huri mahavana vwelvwele n̄an.

¹¹ Ginau rahu gea be nu rahu amua kadogaha mwa hav mom rahu tehe. Ginau rahu gea vwate alolon ira ratahigi lavoa gaibitu gabe vi mai mulei kun gabe gaivwelun ira ratahigi lavoa, take n̄an huria be men lol kaburai.

¹² Haḡe mauana han̄vulu be gon gitae, kea ratahigi lavoa mulei gaibitu, be ram hav lai te tanora radu lol tanon tomuai, i rav tomua mai ginau rahu huri mahavan vwelvwele.

¹³ Kera duluai binihira gaituvwa i rav lai nora muramura i tomuai lalai ginau rahu.

¹⁴ Ira ratahigi lavoa kera geki, rav bwalo mai nitui Sipsip. Sipsip gea mai ira non hala nu gita luara i ran vavtutu rav rihu maragai lol bwaloana. Bwatuna kea Ratahigi nin ratahigi duluai, i Ratahigi Lavoa ḡoro ratahigi lavoa duluai.”

¹⁵ “Ulun wai duluai gabe gom ḡitae be vavin rovrovoi homu mwa domahuri aluna, kea vatugin sinombu nin vataha lalan̄an guli mai lalan̄an avoana.

¹⁶ Haḡe mauana han̄vulu mai ginau rahu rav tau bwatuna ba barihai vavinen rovrovoi homu. Rav tagahi kaburai gaisagana ba derainia vuroi. I ran gan rebehina la mavuvuna duluai i ram bohainia vai lol gabi.

¹⁷ God mwa dau muramura lol irubwira be rav lol ginau n̄oton̄oto be God mwa doronia. Ira ratahigi lavoa han̄vulu gea ram lai nora muramura duluai mwa bano lalai ginau rahu. I mwa ḡitaḡoro vaivotu havanau be God nu vevea vi visirai.”

¹⁸ “Vavine be gom ḡitae kea bwatutun vanua gabe mwa domuai ḡoro ira ratahigi lavoa duluai ata lol ureure.”