Visirai 15 - Hano Niu Testamen

Ira Enjel mai Nogonan Harova

¹ Haḡe nam ḡarere vai lol mahao i nam ḡita ginau dan̄an̄a vwate be enjel gaibitu be nu gitanana nu matmatagui, mai lalan̄an harova gaibitu be gosav tov te dumwia, geki nogonana, bwatuna be kea haḡea nogonan hala gabe mwa dogo alun lolhoro non God.

² Haḡe nam ḡita ginau vwate kun tahi legiga roiroi mai gabi. Nam ḡitara mulei gabe ran muramura ḡoro ginau rahu turu mai nununa, i ram muramuraga ḡoroe be ihana gabe tovtovo. Haḡe ram du hurin tahi legiga, i ram haḡo kita gabe God mwa laia lalainira,

³ i ram lol iboi gabe Moses atatun rovoga non God nu lolia tuai, mai iboi non Nitui Sipsip ram bevea be; “Ratahigi God mwasin roron̄o, nu tavuha i nu vavtutu maragai na nom lalaḡova! Ratahigi Lavoa ḡoro varan sinombu duluai nom lalaḡova i alen̄amwa nu vavtutu!

⁴ God, ihei tehe sihav vinihi te marahinigo? Ihei tehe sihav lol te roroai ihamwa? Giḡo n̄an gon sabuga. Varan sinombu duluai la ureure rav mai ba ḡogonainigo, bwatuna be gon seserai alen̄amwa be alen̄ vavtutu lalai sinombu.

⁵ Ataguna geki nam ḡita imwa tataro gaivua lol ute atamare mwa mahavan̄i, i mai imwa hauhau mwa seserainia be God aia.

⁶ Haḡe ira enjel gaibitu mai lalan̄an harova gaibitu, ram mwalue nin imwa tataro, i ram sagasagae gaisaga maita abwaga, i gao weswesin bwabwara kun vatan̄oga.

⁷ Haḡe vwate alolon ginau rahu gaivasi gea mwa hagai kasbol an̄oga gaibitu gabe ran masiri gin lol horo non God, be mwa dogo tuai vai tuai lalai ira enjel gaibitu.

⁸ Haḡe imwa tataro mwa masiri gin ahu be mwa mai nin sarisarina i muramura non God, i atatu vwate sihav haroro te dum alolon imwa tataro vai votu be harova gaibitu be nu laia lalai ira enjel gaibitu vi haraharai.”