Visirai 13 - Hano Niu Testamen

Ginau Rahu Turu Gairua

¹ Haḡe nam ḡita ginau rahu turu be mwa mwalue nin tahi. I bwatuna gaibitu i mauana han̄vulu; i bataha mauana duluai gaisosorin bwatu duluai batvatahara, i alun bwatu duluai iha nu ravana alura i mwa av hantai vai alun God.

² Haḡe ginau rahu gabe gitanana nu ḡun lepad, i bwalagena la gitanana nu ḡun bea, i bwan̄ona kun laion. Haḡe drakon mwa lin̄ non muramura sibona lalai ginau rahu gea, i non tanon togotogon ratahigi, i non tomuai.

³ Nam ḡita ginau rahu gea dovon̄a aluna halan ginau be nu wehia la bwatuna vwate, halan ginau kun be vi wehi bamat kaburainia. Take halana mwa lulu tavuhai mulei. Haḡe sinombu duluai lol ureure ram dan̄an̄a maragai i ram huri ginau rahu gea.

⁴ I sinombu duluai ram ḡogonai drakon gea bwatuna be nu lai tanon tomuai i muramura lalai ginau rahu gea. Ram ḡogonai ginau rahu mulei ram bevea be, “Ihei haḡea kun ginau rahu geki? Ihei vi bwalo dum maia?”

⁵ Ginau rahu gea nu muramuraga huri vula n̄avul gaivasi domwan gairua. Ginau rahu gea mwa av dum ravravwega i mwa av hantai lalai God.

⁶ Haḡe ginau rahu gea mwa av hantai vai alun God, lol ute be mwa dogo aia, bul maira gabe ram dogo aia bul mai God.

⁷ I mwa mahin̄ainia be vi bwalo bul mai sinombu non God, i vi muramura ḡorora, i mwa lai muramura lalainia ḡoro tatan̄an sinombu, mai varan sinombu, i avoana i lalan̄an atatu be gulira dodolua.

⁸ Ira sinombu duluai be ram dogo lol ureure rav gogonainia, take barabe atatu gabe nu ravan ḡoro na ihara lol bukan rahuana, gabe buka non Nitui Sipsip gabe nu wehiana.

⁹ “Kimiu gabe bweromiu abena giv roron̄tai.

¹⁰ Ihei tehe gabe mwa binihia be vi vwirihiana vai lol gao vauvauhi, na vwirihiana vai lol gao vauvauhi; i ihei tehe gabe mwa binihia be vi mate gin buan bwaloana, vi mate gin buan bwaloana. Kimiu atatu non God, bwatuna gea giv tu wasigi, i nomiu binihimwasigi garagusi vi tu wasigi alun God.”

¹¹ Haḡe nam ḡita ginau rahu vwate mulei be mwa mwalue nin tano, i mauana gairua kun mauan nitui sipsip, i mwa avo kun drakon.

¹² Kea mwa avo gin muramura non muan ginau rahu gea la lolmatana. Haḡe mwa ḡaroinia mwa bevea lalai ureure maira duluai be ram dogo alolona be, rav gogonai muan ginau rahu gabe gitanana kun be ran wehia, take halana mwa lieni huba.

¹³ Haḡe gairuan ginau rahu geki mwa lol ginau dan̄an̄a gaivua liu; mwa lol gabi mwa himai nin mahao vai lol ureure la lolmatan sinombu.

¹⁴ Haḡe mwa ruruhi sinombu duluai be mwa dogo lol ureure, ginia be God mwa mahin̄ainia mwa lol ginau dan̄an̄a i tagaro la lolmatan muan ginau rahu gea. I kea mwa bevea lalainira be rav tai nunu vwate gabe nunun muan ginau rahu gabe ran saria gin buan bwaloana take mwa rahu mwa dogo radu, be kera rav gogonainia.

¹⁵ Haḡe mwa mahin̄ai gairuan ginau rahu vi mambuhai rahuana vai alolon muan ginau rahu, huria be nunun ginau rahu vi avo dumwi i non muramura abena be vi wehi bamate ira hei gabe ram hav gogonainia tehe.

¹⁶ Haḡe ginau rahu mwa ḡaroi sinombu duluai atatu kokolo mai atatu lalavoa mai ira ratahigi mai ira hiru, atat rahurahu mai ira turin rovoga, be rav lai dovon̄a alun limara la mwatua sage alun rera.

¹⁷ Atatu vwate sihav volvoligi te dum sage sihav salei te dum non ginau vaivotu be dovon̄a geki aluna, kea gabe ihan ginau rahu sage dovon̄a gabe mwa du kun ihan ginau rahu.

¹⁸ Ginau gea atatu vi mataisaoga huria be vi iloe. Atatu gabe nu mataisaoga, vi habwe dum binihiva huri tovtovon ginau rahu gea, huria be tovtovo gea, dovon̄an ihan atatu vwate. Geki haḡea tovtovo gabe vudolu vaono vena n̄avul gaiono domwan gaiono (666).