Visirai 11 - Hano Niu Testamen

Ira Gai Turatura Gairua

¹ Haḡe ram lai gai lalaiau kun gabe tovtovo vai ataa lol tano, i mwa bevea lalaiau be, “Vano ba dov imwa tataro non God i olta i goi vului ira hei gabe ram ḡogonai lol imwa tataro.

² Take aran imwaḡu huri imwa tataro halavare gosav tovoe tehe, bwatuna be nu laiana lalai ira len̄len̄aga, i rav varahi kaburai Bwatutun Vanua Sabuga huri vula n̄avul gaivasi domwan gairua.

³ I nav hora noḡu gaitura gairua be gaisagara nu lolian vatuvwai gin bakin kavura boboga i raru vi seserai lua roroi non God huri gubwen̄i vasan̄vul vatuvwa vudolu varua vena n̄avul gaiono.”

⁴ Ira gaitura gairua gea kun gabe bwatun gai oliv gairua, i gaihaḡon bulu gabe ramuru du la lolmatan Ratahigi ḡoro ureure.

⁵ Haḡe be ihei tehe be vi lol ron̄oe be men lol bwarebwarera, gabi vi mwalue nin lolvwara i vi lol kaburai nora ivwalu; i la hala haḡe geki be ihei tehe be mwa doron be men lol kaburainira wani gea vi mate.

⁶ Nora muramura abena be raru vi goro gatavan mahao huri be sihav mom uhe tehe lol mahavana be raru vi toretore huri roroi non God. I nora muramura mulei ḡoro mata vuravuran wai rovo duluai, be vi lolia rai vogi gi daga; i nora muramura mulei ḡoro ureure be raru vi wehi bagoe ureure gin lalan̄an harova lol hava taro tehe gabe ramuru binihia.

⁷ I mahavana be ramuru bev lua vuvuri nora roroi, ginau rahu gabe ram mwalue nin banoi vi bwalo maira. Kea vi muramura ḡorora i vi wehira,

⁸ i rebehira raru vi la hal gaivua lol bwatutun vanua gaivua, aia gabe ran voha bolvolo Jisas aia. I nunun bwatun vanua gea haḡea Sodom sage Ijip.

⁹ Haḡe sinombu lol ute duluai, i vataha vara duluai mai lalan̄an avoana, i lalan̄an guli rav gitara raru vi en kunia huri gubwen̄ gaitolu i udui rasav tavinira tehe.

¹⁰ Haḡe sinombu ata lol ureure geki rav samsamwara bwatuna mateanan ira tarua geki. Kera rav gan ginau ba samsamwara i rav hora tabeana vatvatahara. Bua be ira atatun vevsera gairua gea ramuru lai gagarasi vai alun atatu duluai.

¹¹ Haḡe gubwen̄ gaitolu i udui mwa nogo, hogoi mambuha rahu mwa himai non God i mwa haroro alolora, i ramuru du amare; i kera duluai be ram ḡitae huira mwa ruru.

¹² Haḡe ira atatun vevsera gairua ramuru ron̄ silo mwa uloinira nin amare, “Giru hamai teti!” I mahavana be nora ivwalu ram dadara, tenlan̄i mwa laira vai lol mahao.

¹³ Haḡe lol mahavan taro tiri gea haḡea; mwa sogai rava; i udun bwatutun vanua mwa masalan̄ai, i mwa wehi sinombu vasan̄vul vabitu. Atatu be ram rahu ram matagu maragai, i ram uloi roroai ihan God be mwa dogo lol ute atamare.

¹⁴ Haḡe gairuan ginau bovonosi mwa nogo, take gaitolun ginau bovonosi mwa bwelvwele haḡea be men visirai!

Gaibitun Taiva

¹⁵ Haḡe gaibitun enjel mwa uv bilan taiva, haḡe sosobweroana gaivua lol ute atamare, ram bato ram bevea be, “Muramura be vi tomuai ḡoro ureure kadogaha vivora non nonda Ratahigi non Wani Vurai, i kea vi tomua vai tuai vai tuai!”

¹⁶ Haḡe ira bwatmetua n̄avul gairua domwan gaivasi ram domahuri la tanon togotogon ratahigi la lolmatan God ram hivbwaubwau ḡoro lol matara ram gogonai God,

¹⁷ ram bevea be: “Ratahigi God mwasin Roron̄o mwa dogo garigi i nu togo tuai! Gam avkarigo be gom lai nom muramura lavoa i gom bwalaonia.

¹⁸ Haḡe ira len̄len̄aga ram lol horo butbutui, huri be taron nom lolhoro mwa sosori, I taron be vi vevegira be ran mate. Tarona mwa sosori be vi lai tavwe lalai nom ira atatun rovoga, mai ira atatun vevsera, i ira nom sinombu duluai, kera gabe ram dau nora binihi marahi alumwa, lalavoa mai ira kokolo mulei. Tarona mwa mai be men lol kaburai ira hei gabe ram lol kaburai ureure!”

¹⁹ Imwa tataro non God lol ute atamare mwa mahavan̄i, i atatu ram ḡita dum gabe bugoron dameana non God mwa dogo alolona. Haḡe mwa bilehi i mwa daradumwi i mwa bwahilo i mwa sogai, i vatvatun uhe ram bihovi.