Visirai 1 - Hano Niu Testamen

Jon mwa Avo huri Buka Geki

¹ Geki hano be Jon nu ravae huri Jisas Kraes be God nu laia lalainia, be vi seserainia lalai ira non atatun rovoga huri havanau be vi loli. I Jisas mwa hora non enjel be rav seserainia lalai non atatun rovoga Jon,

² Mwa bevea huri ginau duluai be nu gitae. Kea avoana non God i ira mwasin ginau be Jisas Kraes nu seserainia.

³ Samwarana lalai ihei be mwa basogo buka geki i vatavuhai ira hei dodolua sage ram roron̄tainia i ram dabea. Tarona mwa sosori be ginau duluai geki vi loli.

Avoan Helheloi lalai Uloilua Gaibitu

⁴ Roroi nin Jon vai lol uloilua gaibitu lol vanua Esia. Nam dataro hogoi i tamwata nin God be mwa dogo tuai, i garigi i be vi mai i nin ira vui gaibitu la lolmatan tanon God.

⁵ Nam dataro be tavuha mai tamwata non Jisas Kraes gabe God du lol domarei muleinia nin mateana i kea haḡea muai ḡoro ira ratahigi lavoa duluai ata lol ureure. Kraes mwa dabe gida, i gin dagana mwa dugu gida nin vuroda.

⁶ Kea Ratahigi Lavoa i mwa lolia be tam mai gi non ira muai tataroi be tamen lalaḡo lalai God Tata. Lalainia roroai i muramura vai tuai vai tuai! Amen.

⁷ Gin gitae! Kea mwa mai mai ten lan̄i. Mata duluai rav gitae, vaivotu gabe kera gabe ran wehia. Ira sinombu ata lol ureure rav dei ba dalan̄lan̄a bwatuna kea. Ginau gea vi loli! Amen.

⁸ Ratahigi God mwa bevea be, “Inau muana i nogonana, inau Alva i Omeka, gabe mwa dogo mwa rahu i mwa mai. Inau God muramura duluai.”

Jon mwa Ḡita Jisas lol Hueri

⁹ Inau Jon, inau tuamiu i roron̄tai vwate non Jisas. Nam bulu mai kimiu lol ira ginau hahantai be ram dum kimiu n̄oto be mwa mai alura n̄oto be ḡogonai Jisas be Ratahigi Lavoa. Ram dau inau la vanua kolo Patmos, huribe nam bev lua avoana non God gin mwasigi be Jisas nu seserai luae.

¹⁰ La gubwen̄in Ratahigi Vui mwa domuaiau, i ataguku nam ron̄ Silo gaivua mwa datan̄i kun silon taiva gaivua be mwa uvwiana.

¹¹ Silo mwa bevea be, “Rava havanau be gom ḡitae alolon buka. I gov horae vai lol uloilua gaibitu kera geki kun Ivisas, Smana, Pekamam, Taeatira, Sadis, Viladelvia i Laodisia.”

¹² Haḡe mahavana be nam ḡarere be nav gita ihei gea be mwa avo maiau. Nam ḡita gaihaḡon bulu kun vatan̄oga gaibitu ram du.

¹³ I aia mai gaihaḡon bulu gaibitu be ram du kun atatu vwate gitavanana kun gabe Nitun Atatu. Kea mwa saga gaisaga n̄ava mwa hivo mwa botu lol bwalagena ataa, i gaisaga vatan̄oga mwa haravui bwabwana duluai.

¹⁴ I bwatuna mai iluna, raru maita kun ilun sipsip sage nu maita kun reren tahi, i matana gairua la gitavanara kun gabi luamea.

¹⁵ Haḡe bwalagena ata nu gigita kun brons be mwa rahaiana be men gigita, i silona mwa daradumwi kun wai saribwatu.

¹⁶ Kea mwa haḡo visiu gaibitu lol bwabwaran̄ona gin mwatuana, i buan bwaloana mata daldali mwa mwalue nin bwan̄ona. Lolmatana nu gigita kun alo ata la abobon alo.

¹⁷ Mahavana be nam ḡitae nam hovi vai lol bwalagena kun atat mate. Take mwa dau mwatuana aluku mwa bevea be: “Gosav matagu tehe! Inau muana, i nogonana.

¹⁸ Inau gabe nam rahu. Nan mate take kadogaha nam rahu mulei vai tuai vai tuai. Nam muramuraga ḡoro mateana ureure non ira atat mate.

¹⁹ Rav havanau be gav gitae, i havanau be mwa du kadogaha, i havanau mulei be rav loli atagun ginau kera geki.

²⁰ I nai vev melmeloi binihivanan ira visiu gaibitu be gom gitae la mwatuaku i gaihaḡon bulu gaibitu be ram du. Ira visiu gaibitu vatan̄oga ram du lol Tanora. Ira visiu gaibitu, kea ira enjel huri ira uloilua gaibitu, i gaihaḡon bulu gaibitu kea ira uloilua gaibitu.”