Taetas 2 - Hano Niu Testamen

Malele huri Vagahi Tavuha

¹ Take giḡo Taetus, gov vev ginau lalai sinombu duluai be rav lolia vi huri silo vagahi mwasigi.

² Gov vagahi ira atat metuaga be rav togonainira sibora, lol binihi marahi, lol mataisao, lol binihimwasigi garagusi, lol lolotabetabe i lol alen̄ara.

³ Kunia n̄an mulei, goi vagahi ira vavin mituaga be rav togo lol togoana be nu sabuga lol alen̄ara

⁴ Vuvuri kera rai vagahi ira vavin gara be rav tabe ahoara i be rav tabe ira nitura,

⁵ be rai mataisaoga i rav melmelo, be rai vora vavinen rovoga tavuha alolon imwara, be rav haḡo alen̄ laiḡoḡo i rav binihi marahi ahoara. Kunia ihei sihav avte dumwi vai alun silo vagahi non God be nu laia lalai gida.

⁶ Kunia mulei giv av dura ira malaḡelo be rav mataisaoga.

⁷ Lol hala duluai gov vora malele huri lalaḡov tavuha duluai. Batena be gom bagahi, gov vagahi gin vavtutu i binihi marahi.

⁸ Goi vev mwasigi huri be rasav av te vai alumwa. Vuvuri kera be ram hun̄ainigo rav busbusi bwatuna be ginau hantai sigai be rai vev dumwia vai aluda.

⁹ Turi rav binihi marahi nora ratahigi ḡorora, tagaro rav lol ron̄oe be rav lol lolora rav samsamwara i rasav vigaigai te maira.

¹⁰ Rasav surai te nora ratahigi take rav lol ron̄oe be rav seserainia lalainira be rav tau dum nora butuana aluna. Lol ginau duluai be ram lolia, ram lol silo vagahi non God varahuda be vi lol dum doroniva non atatu.

¹¹ Hala haḡea gea be mwa du be tav togo maia, bwatuna be hogoi non God nu visirai huba be vi lai varahuva lalai atatu duluai.

¹² Mwa bagahi gida be tasav van te burigai God sa tasav lol te ginau hahantai be ureure mwa doronia. Take, hogoi non God mwa bagahi gida be kadogaha tav togo gin mataisao i lol hal vavtutu i lol hala kea be mwa seserainia be tam lol lalaḡova non God.

¹³ Mwa du be tav togo kunia lol taro be tav hohovi huri be nonda doronhohovi gaivua liu i huri maiana lol sarisari non nonda God holomare hae i varahu Jisas Kraes.

¹⁴ Nu lin̄ia sibona huri gida be vi lol tavwe be vi ribwes gida nin ginau hantai duluai i be vi lol gida tai vora sinombu melmelo be tai vora bilana n̄an gahena. Sinombu be tagaro tam doron be tav lol lalaḡov tavuha.

¹⁵ Vev ginau kera geki i av dura sinombu i vev lua havanau be ran vahala lol rahura, vevea gin roron̄o. Gosav lin̄ te ihei be vi gitago kun be giḡo gom hav vora te atat binihi marahi.