Ravrava non Pol lalai ata Rom 9 - Hano Niu Testamen

God mai ata Israel

¹ Inau nam dogo alolon Kraes, i nam bev mwasigi lalai kimiu; nam hav tentene tehe. Binihiḡu Vui Sabuga mwa domuai nia, i mwa bevea lalaiau be nam hav tentene tehe.

² Binihiḡu mwa marahi tagaro i nam ron̄ mwa hantai mutaigi.

³ Nam binihia be nas bului ira tuaku ira Jius mai noḡu sinombu. Nan doronia mulei be nas lai vevegi i nas tu dagai nin Kraes i bisata kunia kea si buluira.

⁴ Kera haḡea atatun ute Israel, ira naturirigi gabe God nu gita luara. Kera ran gita sarisarin God, i kera ram haḡo ira dameana be God nu lolia lol davolan non atatu maia sibona. God nu lai ira silo non Moses lalainira mai ira mwasin halan tataroi i non ira tatauleo duluai.

⁵ Kera haḡea varan ira sibida, i kera mulei ran togo lol taron Kraes be nu vora, kea be God ḡoro gida sinombu duluai, tav uloi roroainia vai tuai i tuai! Amen.

⁶ Vorate huria be God mwa hovi la non tatauleo lalainira. Take ata Israel n̄an rituai be kera ira mwasin atat non God,

⁷ i ira varan Ebraham n̄an rituai be kera mwasin ira nitun Ebraham. Take God mwa bevea lalai Ebraham be, “Ira vara be nan tatauleo lalainigo hurira rav mai nin Aisak.”

⁸ Geki binihiva ata alolona be vorate ira varan Ebraham duluai be mwasin ira nitun God. Mwasin nitun Ebraham haḡea kebe ram mai i nitun God bwatun tatauleo be God nu lolia lalai Ebraham.

⁹ Tatauleo non God lalai Ebraham haḡe geki: “Lol mwasin tarona inau nav tabagilu, i Sera naturigi atamwani vi bulusia.”

¹⁰ I kea vorate n̄oto. Ira nitun Rebeka tamara n̄an gaituvwa, tamanda Aisak.

^11-12 Take amua ira naturigi atamwani gairua ram siv vora, God nu vevea lalai Rebeka be, “Tuagai vi lol rovoga lalai tihigi.” Geki nu loli amua ira naturirigi ram siv lol dum ginau tavuha sage ginau hantai. God mwa bevea kun geki be kea be nu gita luana bwatuna lol vatuvwai non God sibona. Kea nu gita luara bwatuna be kea haḡe vwate be God nu doron be vi uloinia, vorate huria be nu lol ginau vwate.

¹³ Kunia ravrava sabuga mwa bevea be, “Nam doron Jekob, take nam hav doron te Iso.”

¹⁴ Ke havanau haḡea tav vev dumwia huri ginau geki? God kea vorate atat vavtutu? Sigai.

¹⁵ God mwa bevea lalai Moses be, “Nav vagahi tavuha lalai atat son̄son̄o lalai ihei be nam doron be nav vagahi tavuha, nav vagahi sine hagavi lalai atatu lalainia be nam doron be nav vagahi sine hagavi”

¹⁶ Alen̄a gea mwa hav huri te ginau be atatu mwa doronia, ḡaoḡao sage be atatu mwa lolia gin non voraivina, take mwa huri alen̄ tavuha non God be ḡaoḡao kea mwa ḡita hagav atatu.

¹⁷ Ravrava Sabuga mwa bevea lalai Vero ratahigi lavoa ḡoro ute Ijip be: “Nam loligo gom bora ratahigi lavoa huri ginau geki: Nav seserai noḡu muramura alolomwa huri be ihaku vi avoiana lol ute duluai.”

¹⁸ I God mwa seserai sine hagavi hala behe be mwa doron be vi seserai lua sine hagavi aia, i mwa lol bwatun sinombu mwa wasi kunia be mwa doron be vi lol bwatura rav wasi.

¹⁹ Bisata vwate nin kimiu vi hudali inau be, “Be si vora kunia, huri hano God mwa bevea be gida tam lol ginau be ran vahala? Atatu vwate sihav tuḡoro te binihin God.”

²⁰ Giḡo atat vuroi n̄ano, i atatu non silo sigai be vi vev avoan hudaligi lalai God. Suspeni vwate sihav hudali te avoan hudaligi lalai atatu be ihei haḡea nu lolia, “Huri hano haḡe gom loliau kun geki?”

²¹ Atatu be mwa lol suspeni nin tan malagoba vi lol dum hano be mwa doron be vi lolia. Kea vi lol dum suspeni gin tan malagoba gaituvwa n̄ano i vi lol vwate vi tavuha liu vwate.

²² Kea alen̄ gaituvwa n̄ano mai God. Kea mwa doron be vi seserainia lalai atatu gin non lol horo i vi lin̄ atatu rav gita non muramura take bwatuna be kea mwa dogo mai binihiv n̄ava i kea mwa dogo maira be mwa lol horoinira atatu be nu lol vatuvwainira be vi vevegia.

²³ Mwa hohovi mai non binihiv n̄ava huri be vi lol sarisarina lalai sinombu be ran lai non sine hagavi. Kea nu lol vatu vurai non sinombu be rav haḡo sarisarina,

²⁴ i gida haḡea sinombu be God nu uloi gida. Nu hav uloi te gida n̄an nin ira Jius take nu uloinira Lolobon̄i mulei.

²⁵ Kunia be ravrava sabuga mwa bevea lol buka non Hosea be: “Nav vevea be, ‘Kimiu haḡe noḡu sinombu’ lalainira be nan uloinira ‘Vorate noḡu atatu.’ I inau nav vagahi noḡu doroniva lalainira be nam hav doronira tehe.

²⁶ I lol ute n̄an gea, be tuai nan vevea lalainira be, ‘Kimiu vorate noḡu atatu,’ nav vevea lalainira be, ‘Inau God be nam rahu, nam dogo vai tuai, i kimiu ira nituku.’ ”

²⁷ I Aesaia mwa avo huri Israel: “Sinombu ata Israel ivusi maragai, kun one be mwa du huri tahi. Take gai vihara n̄ano rav rahu,

²⁸ bwatuna be God vi lai vilvilehi nogonan silo vevegi mai sinombu lol ureure.”

²⁹ Kunia n̄ano be Aesaia mwa bevea be: “Ratahigi be nu muramura liu, nu mahin̄ai tavaluda n̄ano, na ira varada be rav togo rahui. Be sigai gida tas mate vuvuri kun ira bwatun vanua lavoa Sodom i Komora.”

³⁰ I ke ginau duluai geki binihivanana kun hanigi? Kera be ira Lolobon̄i ran hav lol te ron̄ora be ramen vavtutu lolmatan God, take ran vavtutu lolmatan God bwatun nora binihimwasigi garagusi.

³¹ Ata Israel ran lol ron̄oe be ramen huri silo ba lolira sibora be ramen vavtutu lolmatan God. Take ran hav lol te dumwia.

³² Take huri hano? Huribe ram lol ron̄oe take huribe ram hav binihi te mwasigi alun Kraes, ram lol ron̄oe n̄ano be ramen lol alen̄ tavuha. Kera ram daturai la vatu.

³³ Kunia be nu ravana lol ravrava sabuga be: “Nav tau alolon Jerusalem vatu vwate be vi lol atatu rav taturai, vatu be vi lolira rav hovi. Atatu te ihei be vi vinihi mwasiginia sihav busbusi te dumwi.”