Ravrava non Pol lalai ata Rom 7 - Hano Niu Testamen

Malelen Lagiana

¹ Ira tuaku, kimiu duluai gim ilo tavuhai silo non Moses. I kimiu giv iloe be silo mwa domuai ḡoro sinombu n̄ano lol taro be ram rahu radu.

² Kun geki, vavine mwa du be vi togo mai ahoana lol taro be kea mwa rahu. Take kebe ahoana vi mate, kea mwa ribwesi nin silon lagiana.

³ Take kebe kea vi lagi mai atamwan dolua lol taro be ahoana mwa rahu radu, silo mwa bevea be kea mwa lol hantai ahoana. Kebe ahoana vi mate, kea nu mwa ribwesi nin silon lagiana. I kebe vavine vi lagi mai atamwan dolua, kea vorate mwa lol hantai ahoana.

⁴ Lol hala n̄an gea, ira tuaku, huria be kimiu gin tarihou huba mai Kraes lol rebehina, nu kunia n̄ano be gin mate huba mai. Geki mwa loli bwatuna be kimiu gis vora non atat dolua kea be nu tomare nin mateana i be gida tav lol rovoga tavuha non God.

⁵ Take tuai, lol taro be tan huri alen̄an atatu n̄ano, Silo gea nu lolia tam doron maragai ira ginau hahantai be binihinda mwa doronia. Haḡe bwatun ginau geki, tam do tam lol rovoga non mateana n̄ano.

⁶ Amua, silo nu haḡo gida kun atat vauhi, take rebehida be rebehi malea nu mate, i kadogaha gida tan ribwesi nin silo. I kadogaha tam dataro lalai God la hal gara mai vui, i vorate lol hal malea mai silo be nu ravana.

Nonda Bwaloana vai alun Vuro

⁷ Giḡo bere gom binihia be nam bevea be vuro mai silo avoan gaituvwa. Kea vorate mwasigi, take silo kea hala n̄ano be nav iloe be hano haḡea vuro. Nasav iloe tehe havanau haḡea binihiva be nav doron be namen lai ginau non atat dolua kebe silo vorate mwa bevea, “Gosav doron te ginau non atat dolua be gomen laia.”

⁸ Take alen̄a be atatu mwa lol vuro take kebe silo sigai, vuro non muramura sigai.

⁹ Nan rahu amua i nan ilo silo. Take kebe avoanan silo mwa mai abeku, ke vuro mwa dau bwatuna mwa dogo,

¹⁰ i nam mate. Avoana binihivanana be vi lai rahuana, take huriau mwa lai mateana.

¹¹ Vuro nu habwe hala be men vataltaleau nu haḡo avoana be vi loliau nav mate.

¹² Silo nu sabuga, i avoana nu sabuga nu tavuha i nu vavtutu.

¹³ I kea mwa haḡo ginau be nu tavuha n̄ano, i mwa wehi bamateau be men seserai luae alen̄a vwat be nu hantai. Huribe alen̄an vuro mwa haḡo avoanan silo, mwa hantai maragai.

Bwaloana mai Gida

¹⁴ Gida tam iloe be silo God nu taua, take nam hav sabuga tehe nu tau bwatuna be vuro nu tomuaiau kunia be nan vora non turin rovoga.

¹⁵ Nam hav ilo te dum vataha ginau be nam lolira. Nam hav lol te ginau be nam doron maragai be nav lolia, i nam lol ginau be nam hav doronia tehe.

¹⁶ I kebe nam lol ginau be nam hav doron te didi lolia, kea binihivanana be nam dame be silo nu tavuha.

¹⁷ Bwatuna ginau geki, barabe inau mwasigi be nam do nam lol vuro kerageki.

¹⁸ Uwe, nam iloe be gina tavuha sigai be mwa du aloloku binihivanana be gina tavuha vwat sigai be mwa du la rebehiku be nav lol alen̄ tavuha. Nam doron be nav lol alen̄a be ran tavuha, take nam hav lolia tehe.

¹⁹ Nam hav lol te alen̄ tavuha kebe nam doron be nav lolia, ta nam lol alen̄ lete be nam hav doron te didi lolia.

²⁰ Kebe nav lol alen̄a be nam hav doron te didi lolia, ke vorate inau be nam lol ginau kerageki. Kea vuro be mwa du aloloku be mwa lol ginau kerageki.

²¹ I inau nan huhui silo kerageki: lol taro be nam doron be nam lol ginau tavuha, lalaḡo hantai mwa do maiau aia.

²² Lol binihiḡu, nam ron̄ mwa davuha mai silo non God.

²³ Take nam ḡita silo dolua mwa lol rovoga alolon rebehiku, kea haḡea mwa lol bwaloana mai silo be rebehiku mwa dara aluna. Silo dolua be mwa lol rovoga lol rebehiku kea silo huri vuro, i mwa loliau gi non atat to vauhi.

²⁴ Kunia, hava atatu haḡea be nam hav ron̄ te mwandavuha! Ihei haḡea vi varahuau nin rebehi geki be mwa lai mateana lalaiau?

²⁵ Nam avkari God huri be nu varahuau sivi Jisas Kraes nonda ratahigi! I lol binihiḡu nam bora atat vauhi huri silo non God, take lol noḡu rebehi vuroga na bora atat vauhi lalai silo huri vuro.