Ravrava non Pol lalai ata Rom 5 - Hano Niu Testamen

Vavtutu Lolmatan God

¹ Batena be tan vavtutu lolmatan God sivi nonda binihimwasigi, gida tan lol tamwata mai God i geki nu loli sivi nonda Ratahigi Jisas Kraes.

² Kea nu lai gida vai alolon hogoi non God be kadogaha tam ron̄ mwandavuha. I tam samsamwara bwatuna be mai nonda doronhohov be tam hara sarisari non God.

³ Tam ron̄ mwandavuha mai nonda ginau vahala, bwatuna be ginau vahala kerageki ram lol togoan ḡoḡonai.

⁴ I togoan ḡoḡonai mwa lol alen̄a, i alen̄a mwa lol doronhohov.

⁵ I doronhohov geki sihav lol te dum lolhoro lalai gida, bwatuna be God nu salil non doroniva be vi vamasiri irubwida. Kea nu lai non doroniva lalai gida sivi non Vui Sabuga, gabe God nu laia lalai gida.

⁶ Lol taro gea be nonda muramura sigai radu be tamen mai gi atat vavtutu la lolmatan God, lol mahavan taro be God nu tovoe, Kraes nu mate be vi varahu atat vuroga.

⁷ Atatu ririgaiviha n̄ano rav mate be ramen varahu rahun atat dolua? Bisata atatu rituai be rav mate dumwi ba barahu atat vavtutu.

⁸ Ta God mwa bagahi non doroniv muramura huri gida la hala geki: Kraes nu mate huri gida lol taro be tan vuroga radu.

⁹ I sivi Kraes gida tav rahu nin lol horo non God, bwatuna be gida tan vavtutu lolmatan God nin dagan mateanan Kraes.

¹⁰ Lol taro be tan vora ivwalu non God, nu mwemwearu mai gida sivi mateanan nituna kadogaha be gida tam bora ira tuana, kea vi varahu gida sivi rahuana non nituna.

¹¹ I vorate kea n̄ano, ta kadogaha gida mulei tam ron̄ mwandavuha maragai mai God sivi nonda Ratahigi Jisas Kraes. Sivinia tam bora ira tuan God mulei.

Adam mai Kraes

¹² Vuro mwa mai vai lol ureure bwatun havanau be, atat gaituvwa nu lolia, i mai vuro mateana mwa mai. Geki haḡea huri hano atatu duluai mwa du be rav mate bwatuna be atatu duluai ram buroga.

¹³ Vuro nu togo lol ureure amua nin ira silo non Moses, take vuro mwa hav vuluiana tehe mai gida be tam bahal avoana non Moses lol taro be silo sigai.

¹⁴ Take lol taron Adam vai lol taron Moses, sinombu duluai mwa du be rav mate, kera mulei be ran hav lol te vuro be ramen vahal avoana non God, kunia be nu haḡoe. Adam nu kun atatu be vi mai atagu.

¹⁵ Take hogoi non God nu hav vora te kun vuron Adam. Sinombu ran mate huri vuron atat gaituvwa. Take hogoi non God nu lavoa liu; sinombu ran lai hogoi non God huri rahuana nin hogoi non atat gaituvwa, Jisas Kraes.

¹⁶ Ataguna be Adam nu vuroga vatuvwa, kea nu vevegiana. Take hogoi non God dolua. Hogoi non God nu mai ata kun vuro ivusi, i mwa lol atatu ram bavtutu lolmatan God.

¹⁷ Vuron atat gaituvwa, i mateana mwa domuai sinombu duluai bwatuna atat gaituvwa. Take kadogaha kera be ram lai sarisari non God mai hogoi gaivua be ram bavtutu lolmatana kera rav lai rahuan mwasigi i atat gaituvwa vi tomuainira, Jisas Kraes.

¹⁸ I kun vuron Adam gaituvwa nu lai vevegin mateana lalai sinombu duluai, malel tavuha vwate be Kraes nu lolia kea nu lol atatu ram vavtutu lolmatan God. I kea mwa lai rahuan tavuha lalainira n̄oto.

¹⁹ Atatu n̄an gaituvwa nu hav ron̄ te God, i ivusi ram mai i atat vuroga. Kunia n̄ano be, atatu n̄an gaituvwa nu ron̄ God, i ivusi rav vavtutu.

²⁰ Silo mwa mai be vi lol vuro vi liu; take la mahavana be vuro mwa mauri mwa liu, hogoi non God mwa ḡaivuaga.

²¹ Vuro nu lol mateana be vi tomuai gida, take mwa lai hogoi non God sivi vavtutu i vi lai rahuana vai tuai sivi Jisas Kraes nonda Ratahigi.