Ravrava non Pol lalai ata Rom 4 - Hano Niu Testamen

Malele be Ebraham nu Taua

¹ Havanau haḡea tai vev dumwia be Ebraham, taman nonda sinombu, nu huhui halan binihimwasigi?

² Be Ebraham mwa lol bavtutu mwa hurin non lalaḡova, kea nu tavuha be vi sagereinia sibona. Ta geki mwa hav vora te hala be God nu vevea,

³ huribe avoan sabuga mwa bevea be, “Ebraham mwa binihimwasigi garagusi alun God, i God mwa dara alun binihimwasigi non Ebraham, i binihimwasigi gea mwa lolia kunabe mwa bavtutu la lolmatan God.”

⁴ Lol taro be atatu ram lol rovoga, volira mwa hav laiana te kunabe hogoi, ta ginau be atatu mwa lol rovoga hahavwani huria.

⁵ Ta atatu si hav lol te dum rovoga vwate be vi lolira rai vavtutu la lolmatan God. Mwa du maragai be rai binihimwasigi garagusi aluna, be mwa lol atat vuroga ram bavtutu la lolmatana. I God mwa ḡita nora binihimwasigi, i nora binihimwasigi garagusi haḡea mwa lolira ram bavtutu la lolmatan God.

⁶ Deved mwa bev mulei ginau n̄an kunia. Mwa bevebe atatu ram lai vatavuha lol taro be God, mwa hav gita te nora lalaḡova bavtutu, mwa lolira ram bavtutu la lolmatana.

⁷ Mwa bevea be, “Atatu be God mwa binihi kaburai vurona, i mwa lai dagai vurona ninia, kea vi ron̄ mwandavuha.

⁸ Atatu be God mwa hav lol te vurona, kea vi ron̄ mwandavuha.”

⁹ Vatavuha geki mwa laiana n̄ano lalainira be ran tav dovon̄ara huba sage lalainira mulei be ram hav tav te dovon̄ara radu? Tan vevea huba be God mwa dara alun binihimwasigi non Ebraham mwa binihimwasigi garagusi i kunia mwa lolia mwa bavtutu la lolmatan God.

¹⁰ Kun hanigi haḡea be ginau geki mwa loli? God mwa dara alun Ebraham amua sage ataguna be ran tav dovon̄ana? Geki nu loli amua vuvuri ram siv tav dovon̄ana.

¹¹ Ram dav dovon̄an Ebraham be men lol seserainia be nu vavtutu la lolmatan God sivi binihimwasigi garagusi vuvuri ram siv tav dovon̄ana. Ebraham kea tamara duluai gabe ram binihimwasigi, ta ram hav tav te dovon̄ara, kea tamara atat binihimwasigi duluai gabe ram dame be ran vavtutu la lolmatan God.

¹² I Ebraham kea mulei tamara gabe ran tav dovon̄ara i ram dogo alun binihimwasigi garagusi be tamanda Ebraham nu haḡoe amua ram siv tav dovon̄ana.

God mwa lol Tatauleo lalai Ebraham

¹³ Ebraham mai ira vara ata aluna ram lai tatauleo be rav haḡo ureure duluai. Mwa hav lai te tatauleo gea sivi silo, ta sivi non binihimwasigi alun God.

¹⁴ Be atatu vi lai dum hano be God mwa datauleo huria be vi huri silo, kea binihimwasigi garagusi nu hav marahi tehe. I tatauleo non God lalai Ebraham mulei nu hav marahi tehe,

¹⁵ huribe silo vi lai dum lolhoro non God. Ta kebe silo vi vora sigai ginau sigai be vi lolia atatu vi dahae.

¹⁶ Atatu ram lai tatauleo non God be nora binihimwasigi garagusi abena. Geki mwa loli huribe tatauleo vi vora ginau be vi laiana vuroi n̄ano. I ira nitun Ebraham duluai rav haḡo tatauleo geki. Mwa hav vora te hurira n̄ano be ram dogo halaten silo non Moses, ta huri ihei tehe be mwa dogo mai binihimwasigi kun Ebraham, gabe tamanda duluai.

¹⁷ Kunia gabe mwa ravana lol avoan sabuga be, “Nam loligo i taman varan sinombu ivusi.” Geki mwasigi amua la lolmatan God, God gabe Ebraham mwa binihimwasiginia, God gabe mwa lai rahuana lalainira be ran mate i vi lol dum ginau be ram dogo, i rav visirai, i ram du.

¹⁸ Binihiva vwate sigai be Ebraham vi bav dum atatu. Take Ebraham mwa binihimwasigi God i mwa dogo wasigi la binbinihi i mwa mai i taman varan sinombu ivusi. Kunia be God nu vevea lalainia be, “Ata alumwa mulei rai vora ivusi be si hav vuluiana te dumwi.”

¹⁹ Taulun Ebraham mwa abena gin vudolua, mwa botui taro gabe si hav bav te dum atatu, i Sera mwa hav haḡo te dum atatu. Ebraham mwa binihi ginau n̄oto kerageki, ta non binihimwasigi garagusi alun God mwa hav hivo tehe.

²⁰ Mwa hav virururu tehe bereva God gim hav lol te non tatauleo, i non binihimwasigi garagusi mwa dogo wasi vataha mahavana. Mwa binihimwasigi garagusi vataha mahavana i mwa uloi roroai ihan God.

²¹ Ebraham mwa iloe be, God vi lol dum hano gabe nu tatauleo huria.

²² I, “God mwa dara alun binihimwasigi non Ebraham, i binihimwasigi garagusi gea mwa lolia mwa bavtutu la lolmatan God.”

²³ Avoana keragea be, “God mwa dara alun binihimwasigi non Ebraham,” mwa hav ravana te huri Ebraham n̄an gahena

²⁴ ta huri gida mulei. God vi dara alun nonda binihimwasigi mulei huribe tam binihimwasigi aluna be nu tomarei mulei Jisas nonda Ratahigi nin mateana.

²⁵ Jisas nu mai huribe vi mate huri vuroda, i mwa domare mulei nin mateana be men lol gida tamen vavtutu la lolmatan God.