Ravrava non Pol lalai ata Rom 14 - Hano Niu Testamen

Gosav Vev te Bahivoi Atatu Dolua

¹ Giv samsamwara be giv lai ḡoḡo atatu gabe non binihimwasigi garagusi nu mandamanda, gisav vigaigai tehe huri nora vahalana.

² Atatu rituai ram binibe nu tavuha be vi ganiana na lalan̄an ginaganiana n̄oto. Take rituai be ran mandamanda, ram binihimwasigi garagusi be nu vavtutu be vi ganiana n̄ano na ginaganiana be mwa rivuana lol ute loloara.

³ Atatu be ram iloe be nu vavtutu be vi ganiana na ginaganiana dedeorai, rasav vev te bonogai kera gabe ram ḡan ginagania ata loloara n̄ano. I kera gabe ram ḡan ginagania ata loloara n̄ano rasav vinihi tehe be kera gabe ram ḡan ginau n̄oto ram bahala, huribe God mwa dara la atatu gea.

⁴ Gosav vevegi te dum turin rovoga non atatu dolua. Non ratahigi mahaḡea vi vevea be non turi gea mwa lol bavtutu sa sigai. I atatun rovoga non God vi lol vavtutu huribe God mwa buluia mwa lol vavtutu.

⁵ Atatu rituai ram binibe gubwen̄i vwate nu sabuga nin gubwen̄i rituai, i rituai ram binibe gubwen̄i n̄oto dadariha n̄ano. Atatu n̄oto rav ilo tavuhainira lol binihira.

⁶ Atatu be ram binibe gubwen̄i vwate nu sabuga nin rituai, ram lolia kunia huri God. I kera gabe ram ḡan ginau n̄oto, ram lolia kunia huri God, i ram lai avoan avkari lalai God. Rituai be ram barihai didi gan ginau rituai, ram lolia kunia lalai God, i ram lai avkari lalai God.

⁷ Tam hav togo tehe sa tasav mate tehe huri gida siboda.

⁸ Kebe tam rahu, tam rahu huri God, i kebe tav mate, tav mate huri God. I tav rahu sa tav mate, tam dogo la ihan God.

⁹ Kraes nu mate i mwa domare nin mateana be men vora ratahigi non kera gabe ran mate, i kera gabe ram rahu.

¹⁰ I huri hano gom bevegi ira tuamwa? I huri hano gom binibe gon tavuha liura? Gida n̄oto tav tu lolmatan God huri vevegi,

¹¹ Huribe mwa ravana lol ravrava sabuga be: “God mwa bevea be, ‘Nam bev mwasigi, atatu n̄oto rav hivbwaubwau lol mataku; atatu n̄oto rai vevea be inau God.’ ”

¹² I gida duluai tav lai avoan vwaliu lalai God.

Gosav lol te Atat Dolua be vi Vuroga

¹³ Bwatuna gea, tav mambu gin vevegi gida gaitutuvwai. Tav taua lol binihinda be ta sav lol te ginau be vi lol atatu vi hovi lol vuro.

¹⁴ Nam dogo lol Ratahigi Jisas, i nam iloe be ginaganiana vwate nu hav hantai tehe be vi ganiana. Take be atatu rituai rav vinihi mwasigi be ginau vwate nu vahala, kea nu vahala huria sibona.

¹⁵ Kebe gov varihai binihimwasigi non tuamwa, huribe huri ginau be gom ḡania, gom hav huri te mwasin silon lolotabetabe. Gosav lol te kaburai binihimwasigi non atat dolua be gov gan ginau be kea mwa binibe nu hantai, huribe Jisas mwa mate huria.

¹⁶ Gosav lin̄ te havanau be gom binibe nu tavuha be vi mai gi havanau atatu dolua mwa bevebe nu hantai.

¹⁷ Lol ute ratahigi non God, ginaganiana i wai mwinu varate ginau gaivua. Ginau n̄ano be nu marahi, kea be gom lol vavtutu lalai God, tamwata, i samwarana lol Vui Sabuga.

¹⁸ Atatu be mwa lol rovoga non Kraes, be mwa dogo la rahuana geki, kea haḡea mwa lol samsamwarai God, i atatu dodolua rav dara aluna.

¹⁹ I tav lol ron̄oe be tav lol hano be mwa lol tamwata i mwa bului gida gaitutuvwai.

²⁰ Gosav lol te ginaganiana be vi lol kaburai rovoga non God. Ginaganiana duluai nu tavuha be vi ganiana, ta nu hav tavuha tehe be vi ganiana na ginaganiana be mwa dau atatu dolua lol vuro.

²¹ Nu hav tavuha tehe be vi ganiana na bigi sa vi mwinuana na waen sa vi loliana na ginau be vi tau tuamwa lol vuro.

²² Nom binihimwasigi huri ginau kerageki ras tu dahuligi lol bwaralolomiru mai God. Atatu ram samwara, kebe rav lol dum hano be ram binibe nu vavtutu i ram hav ron̄oe tehe be nu vahala.

²³ Ta kera gabe ram ḡan ginau be ram len̄a be nu vavtutu, kera ram bahala huribe ram hav binihimwasigi garagusi tehe be nu vavtutu. Havanau tehe be mwa loliana be gom hav binihimwasigi garagusi be nu vavtutu, kea vuro.