Ravrava non Pol lalai ata Rom 12 - Hano Niu Testamen

Gov lai Rahumwa lalai God

¹ Bwatuna higea, ira tua nu tau bwatuna be God nu lol seserai non hahagavi lalai gida, nam bevea lalainigo be gov lai rahumwa kun gabe hogoi rahu lalainia. Nom hogoi vi vora lalai God n̄ano i vi lol samsamwarainia, kea gabe hala sabuga lalainigo huri gogonaiana.

² Gosav leahigo te sibomwa be goi vora kun ata lol ureure geki, ta gov leahi la hal gara la halan binbinihi. Vuvuri gov vinihi dum hano be God mwa doronia hurigo, gov iloe be havanau nu tavuha i mwa lol dum binihina i havanau nu tavuha be giv lolia.

³ Huribe God nu lai lalaiau hogoi tavuha, nam binihi ginau tavuha vwate be nav vevea lalai kimiu. Gosav vinihi tehe be gon tavuha liua be hiḡo kadogaha. Gov vinihia be hiḡo atat kunhanigi la halan binihimwasigi garagusi be God nu laia lalainigo.

⁴ Rebehida gaitutuvwai mwa du mai vatahanana ivusi, i vatahanana keragea ram du mai nora lalan̄an rovoga ivusi.

⁵ Kunia mulei, gida ivusi, ta alun Kraes, gida n̄oto rebehi gaituvwa n̄ano. Gida duluai tam bul gaituvwa aluda siboda, i kunia be udun rebehi gaituvwa ram bul gaituvwa.

⁶ Gida duluai tam lai hogoi dodolua be God nu laia lalai gida, bwatuna non hogoi tavuha lalai gida. Atatu be God nu lai hogoi lalainia be vi vev seserai non avoana, vi vev luae la tovtovon non binihimwasigi garagusi.

⁷ Ihei be nu lai hogoi huri buluiana vi bului atatu. Ihei be nu lai hogoi huri vagahi, vi vagahi.

⁸ Ihei tehe be nu lai hogoi huri be vi lai avoan dura lalai atatu, kea vi lolia kunia. Ihei be nu lai hogoi be vi hogos atatu dolua, kea vi hogoi vuroinia. Ihei be nu lai hogoi be vi vora tomuai vi n̄aitai lol taro be mwa domua. Ihei be nu lai hogoi huri sine hagavi huri atat dolua vi lolia kunia gin samwarana.

⁹ Nom lolotabetabe vi vora mwasigi. Gov varihai ginau hantai, i gov haḡo wasi havanau be nu tavuha.

¹⁰ Giv tabetabe kimiu gaitutuvwai. Gov lai lalai atat dolua lolotabetabe liu be lalainigo sibomwa.

¹¹ Gosav bwatiḡoruga tehe ta gov lol rovoga hahavwani, gov gogonai God gin lolomwa duluai.

¹² Gov ron̄ mwandavuha huribe nom doronhohov mwa hohovi huri ginau tavuha nin God. Gov lin̄ maḡemu lol taro ririhai, i gov tataro vataha mahavana.

¹³ Gov hogos atat non God be ram do ririhai. Gov lai tausala be ram doron ginau, vai la imwamwa.

¹⁴ Gov lol tavuha lalai ira hei be ram lol hantainigo; gov lol tavuhainira i gosav lol te ḡagarasira.

¹⁵ Gov samwara maira be ram samwara, i gov ron̄ mwahantai maira be ram ron̄ mwahantai.

¹⁶ Giv togo lol tamwata mai kimiu duluai. Gosav ravwega tehe, ta gov mwemwearu mai atat hivhivo. Gosav vinihi tehe be gon mataisaoga nin atat dodolua.

¹⁷ Be atatu vwate vi lol bahala lalainigo, gosav vol te muleinia gin hantai. Gov lol ron̄oe be gov lol ginau be atatu duluai rav gitae be nu vavtutu.

¹⁸ Gov lol ron̄oe be gav togo lol tamwata mai atatu duluai.

¹⁹ Ira tuaku gosav ḡele te hantai take gov hohov God be vi lol ḡagarasira gin non lolhoro. Mwa ravana be: “Nav ḡele hantai, kea noḡu.”

²⁰ Ta hiḡo gov lolia kungeki: “Be nom ivwalu maro mwaḡasia, gov van̄ania; be mwa mandou, lai wai lalainia. Gov lolia kunia vi vora kun abe gom salil beben ginau oda la bwatuna.”

²¹ Gosav lin̄ te ginau hantai vi muramuraga alolomwa, ta gov muramura gin tavuha be vi lol kaburai hantai.