Ravrava non Pol lalai ata Rom 11 - Hano Niu Testamen

God mwa Seserai non Hahagavi lalai Sinombu Duluai

¹ I nam hudaligi be: Mwasigi be God nu vohai dagai non sinombu? Sigai! Inau siboku inau vara ata Israel nin varan Ebraham, i varan Benjemen.

² God mwa ḡita lua ata Israel i non atatu amua mwasivora nora vorana, i kea nu hav tau te dagai non atatu. Gam ilo havanau haḡea Ravrava Sabuga mwa bevea huri Elaija, kun hanigi nu tataro lalai God huri alen̄ hahantai non sinombu ata Israel.

³ “Ratahigi,” mwa bevea be, “Kera ran wehi ira nom atatun vevsera, i ran lol bwarebware nom olta n̄oto. Inau n̄an doren atatun vevsera be nam rahu, i kadogaha ram lol ron̄oe be rav wehiau, mulei.”

⁴ Ke God nu vev hano i vwaliun avoana lalai Elaija? Kea nu vevea be, “Take nan lin̄ atatu vasan̄vul vabitu be ram hav tai te hohoi bwatura lalai nun vatu Baal.”

⁵ Take garigi ginau duluai nu dadariha n̄ano. Sinombu n̄an gaiviha ram dogo be God nu gita luara nin non hogoi.

⁶ Kebe vi gita luara nin non hogoi, kea vorate huri ginau be kera ram lolia. Kebe vi loliana be rav vora atat non God gin hano be ran lolia, hogoi non God sihav vora te mwasin hogoi.

⁷ I geki haḡea havanau be nu loli: Ira ata Israel ram lol ron̄oe be rav vavtutu lolmatan God, ram hav lol te dumwia, take kera be God nu gita luara kera haḡe ran vavtutu lolmatan God. Kera dodolua ram lol lolo wasi i ram barihai didi roron̄tai huri avoana non God.

⁸ Kunia be nu ravana lol ravrava sabuga be: “God nu lol binihin atatu mwa sabwebwe huba i kera ram hav gita te batoi ginau. Mwa ḡoro matara i ram hav gita te dum ute, i bwerora i ram hav roron̄tai dumwi. Geki mwa loli radu mwa bot garigi.”

⁹ I Deved mwa bevea be: “Gov lol nora lavet vi vora kun vidi, i be vi vidi muleinira; Gov lol nora lavet be vi lol lolo wasi i silo vevegi vi dum muleinira.

¹⁰ Gov lol matara vi gara be rasav gita te dum ute i gatigura vi mandamanda gin ginau vahala.”

God vi lai Mulei ira Varan Israel

¹¹ Nam hudali avoan hudaligi mulei vwate be: Lol taro be ira Jius ran hovi, nora hovita gea nu salan̄ainira? Sigai! Take huribe ram hovi, varahuva mwa mai lalai ira Lolobon̄i, huribe rav lol ira Jius rav lai binbinihi hantai vai alura.

¹² Vahalana non ira Jius nu lai vatavuha marahi non ureure, i ira Jius ran lai vatavuha marahi lalainira be ira Lolobon̄i. Ureure vi lai vatavuha marahi lol taro be ira Jius ivusi rav mai i lalan̄an atatu be God mwa doronia.

¹³ Kadogaha nam avo mai kimiu be ira Lolobon̄i. Inau nam bora hala non kera ira Lolobon̄i, i kadogaha be nam haḡo rovoga geki, nav lol rovoga geki vi liu.

¹⁴ Nam binihia be nav lol noḡu atatu siboku rav binbinihi hantai, i hala geki vi bului be nav varahu dum tavalura.

¹⁵ Lol taro be God mwa ban burigai nin ira Jius, kea mwa mwemwearu mai ira atat dodolua ata lol ureure. I lol taro be God mwa lai mulei ira Jius, kea mwasigi be ginau gea vi lai mulei rahuana atagun mateana.

¹⁶ Kebe muan tavihen bereti vi laiana lalai God, ke bereti duluai gea nu sabuga. Kebe garongai nu sabuga, ke raran gai mulei gea ran sabuga.

¹⁷ Ke kunia n̄ano be tavalun raran gai nin bwatun gai oliv ran mosi dagatagai. Kimiu ira Lolobon̄i gin kun raran gai oliv turu be nu tarihouana vai la muan bwatuna. Kadogaha kimiu gim hara muramura i rahun muan bwatungai, ira Jius.

¹⁸ Kimiu gisav gita te hantai ira rara be ran mosi huba. Kebe giv gita hantainira, giv vinihi dumwia be gim hav tura te garona, take garona haḡea mwa durago.

¹⁹ Giḡo gov vevea be, “Rara ran hovi kaburai huria be inau nav tarihou mai bwatura.”

²⁰ Kea mwasigi. Take rara keragea ran mosi kaburai bwatuna be ram hav binihi te mwasigi, i giḡo gom ḡaroinia gom bora vatahanan bwatungai gea huria be gom binihimwasigi. Gosav rav ravwega tehe, ta gov matagu.

²¹ Huribe kebe God si vevegi ira vara ira Jius be kun mwasin raran oliv tavuha gea, take kea vi vevegi dum kimiu mulei.

²² Giḡo gom ḡitae be God kea mwa davuha maigo i nu wasi mulei kea mwa bevegira be ram lin̄i ram hav huria tehe. Take God kea vi tavuha maigo, kebe gov garoinia gov huri non tavuha. Kebe gosav lolia tehe, giḡo gov taian dagai nin bwatun gai gea.

²³ Kebe ira Jius rav binihimwasigi mulei God, kea vi dame i vi lai muleinira. God vi tau muleinira vai la bwatungai lol ute be tuai ran togo aia. God vi tarihou mulei ira rara malea la bwatungai gea.

²⁴ I kimiu ira Lolobon̄i gin kun rara be mwa daian dagai nin bwatun oliv turu i mwa dari houana mai bwatun gai tavuha. Take maia be ira Jius ran kun rara be ram mauri nin bwatun gai tavuha, ke vi tari houan mulei mai bwatun bilara gai sibora mulei.

God mwa Ḡita Hagav Atatu

²⁵ Nam doron be kimiu giv ilo tavuhai gina dauhiligi geki, ira tuaku, i kimiu giv iloe be gim hav ilo te didinini ginau n̄oto. Udun Israel ram lol bwatwasi, take kea vi leahi kebe ivusi ira Lolobon̄i rav mai aben God.

²⁶ I kea haḡea kun hanigi ira Jius rav rahu. Nu ravana lol ravrava sabuga be: “Varahu vi mai nin Saion kea vi lai lua lalaḡov hantai nin ira varan Jekob.

²⁷ I nav lol dameana mai sinombu lol taro be nav lai dagai vurora.”

²⁸ Ata Israel ram barihai didi damei Roroi Tavuha, ira Jius ram bora ivwalu non God huribe kimiu ira Lolobon̄i. Take ira Jius ram bora atat gita lua non God radu, i kea mwa dabe mutainira mwa hurin nora tatauleo be nu lolia mai ira sibira.

²⁹ God mwa hav leahi te hohoi binihina mai non sinombu be nu uloinira i vataha ginau be nu laia lalainira.

³⁰ Lol gubwen̄i vwate kimiu ira Lolobon̄i ran varihai didi ron̄ God, take kadogaha giḡo gon lai sine hagavi, bwatuna be sinombu kera gea ran varihai didi roron̄tai.

³¹ I kadogaha ira Jius ram hav doron te didi roron̄tai, bwatun be God nu lai sine hagavi lalai kimiu. Take ginau geki nu loli bwatun be kera mulei rav lai sine hagavi ninia.

³² God nu lai sinombu duluai liu nora bwatwasi huri be vi lai sine hagavi lalainira n̄oto.

Samsamwara Lalai God

³³ Uwe, ute ratahigi non God nu lavoa maragai, i non mataisao i iloute si hav nogo te dumwi! Atatu vwate si hav hahara te dum vataha ginau be God mwa binihia sage vi ilo tavuhai non hala.

³⁴ Ravrava sabuga mwa bevea be, “Ihei mwa ilo binihin ratahigi, sa ihei haḡea vi lai dum avoan hahara lalainia?

³⁵ Atatu vwate mwa hav lai te ginau vwate lalai God be mwa du maragai be vi vol muleinia.”

³⁶ Uwe, God nu lol ginau duluai, i ginau duluai mwa du mwa loli sivinia i lalainia. Lalainia sarisari vai tuai! Amen.