Ravrava non Pol lalai ata Rom 10 - Hano Niu Testamen

¹ Ira tuaku, ginau be nam doron maragai be Israel rav rahu n̄oto. Kea haḡea noḡu tataro lalai God.

² Nav vev dum ginau geki hurira: Ram lol ron̄oe mwasigi be ramen huri God, ta ram hav ilo te mwasin halana.

³ Huribe ram hav ilo te halana be God mwa lol atatu ram bavtutu maia, ram lol ron̄oe be ramen lolira sibora ram bavtutu la nora hala. I ram hav dara tehe alun hala be God mwa lol atatu ram bavtutu.

⁴ Kraes mwa lol nogonogoi silo huribe atatu duluai gabe ram binihimwasigi rav vavtutu mai God.

⁵ Moses nu ravae huri kun hanigi atatu vi vavtutu be vi huri silo. Mwa bevea be, “Atatu be vi tabe ginau kera geki vi rahu huribe ginira.”

⁶ Ta geki haḡea hano be avoan sabuga mwa bevea huria, kun hanigi atatu mwa lol bavtutu sivi binihimwasigi garagusi: “Gosav vevea tehe lalainigo sibomwa be, ‘Ihei vi hae amare aben God?’ ” (Kea gin binihiva be, “Ihei vi hae vai amare ba lai Kraes ata vai lol ureure?”)

⁷ I gosav vevea tehe be, “Ihei vi hivo vai lol ureure ata?” (Kea gin binihiva be, “Ihei vi hivo ba lai lua Kraes nin mateana?”)

⁸ Geki haḡea hano be avoan sabuga nu vevea be: “Avoana mwa dogo abemwa; mwa dogo lol bwan̄omwa i lol irubwimwa.” Kea haḡea silo vagahi huri binihimwasigi garagusi be gam bevea.

⁹ Kebe gov vevea gin bwan̄omwa be, “Jisas kea God,” i kebe gov binihimwasigi lol irubwimwa be God nu lol tomarei mulei Jisas nin mateana, kea gov rahu.

¹⁰ Tam binihimwasigi garagusi lol irubwida, i tam lol bavtutu mai God. I tam bevea gin bwan̄oda be tam binihimwasigi, i kea haḡea tam rahu.

^11-12 Kunia be avoan sabuga mwa bevea be, “atatu vwate” huribe nu hav dolua tehe lol bwaralolon kera be ira Jius i ira Lolobon̄i. God n̄an gea be nonda God duluai i mwa lai hogoi lalainira gabe ram binihimwasiginia,

¹³ kunia be avoan sabuga mwa bevea be, “Ihei be mwa ulo la ihan God kea vi rahu.”

¹⁴ Ta amua atatu ram siv hudali God huri buluiana, kera rav binihimwasigi aluna; i amua ram siv binihimwasigi aluna, rav ron̄ avoan sabuga kaburai huria; i lalainira be rav ron̄ avoana huri God, atatu vwate vi vevea lalainira;

¹⁵ i amua atatu vwate gim siv vano be men vevea, atatu gea haḡea be rav horae. Kunia be mwa ravana be, “Ginau geki nu tavuha maragai be atatu vi lago vi mai be men vev Roroi Tavuha lalai gida.”

¹⁶ Ta mwa hav vora te ira Jius n̄oto be ram dara alun Roroi Tavuha. Aesaia mwa bevea be, “God, ihei mwa binihimwasigi ginau be gan vevea lalainira?”

¹⁷ I binihimwasigi garagusi mwa mai ninia be mwa ron̄oana na Roroi Tavuha, i atatu ram ron̄ Roroi Tavuha lol taro be atatu vwate mwa bevea lalainira huri Kraes.

¹⁸ Ta nam hudaligi be: Atatu ram hav ron̄ te Roroi Tavuha? Uwe, ram ron̄oe kunia be ravrava sabuga mwa bevea be: “Nora roroi mwa bano vataha ureure duluai; nora avoana mwa lon̄ahi ureure duluai.”

¹⁹ Mulei nam hudaligi be: Ata Israel ram hav ron̄ te batoia? Uwe, ram ron̄ batoia. Muana Moses nu vevea be, “Nav haḡo kera be ram hav vora te ata la bwatun vanua lavoa huribe ram loligo gom binbinihi hantai. Nav haḡo ute gabe ram hav ilo te halana be rav loligo gov lolhoro.”

²⁰ Aesaia nu dadariha be vi vevea be, “Kera gabe nan hav hudalinira tehe huri buluiana kera haḡea ran buluiau. Kera be ran hav siroau tehe, kera haḡea nam lolira ram iloau.”

²¹ Ta huri Israel God mwa bevea be, “Ute ran duluai nam du vatuvwai be nav dara alun atatu gabe ram hav binihi te marahiau, i ram avo hahantai vai lol ihaku.”