Leo Tavuha gabe Mak nu Ravae 11 - Hano Niu Testamen

Jisas mwa Dalin̄oro Jerusalem i Sinombu Ram Uloi Roroainia

¹ Batena be ram sosori gin Jerusalem, aben bwatutun vanua Betvej mai Betani ram mai vai la Vusin gai Oliv. Haḡe Jisas mwa hora dotomuai non roron̄tai gairua

² mai avoana be: “Giru vano vai la vanua mwa do bavtutu banaia, mahavana be giru vi votu aia giru vi habwe darihou bwaloi don̄ki vwate be ran vagohainia atatu mwa hav togo te aluna radu. Giru vi tugua ba mai maia vai teti.

³ Be ihei tehe vi hudali kimiru, be huri hano gumuru laia, giru vi vevea lalainia be, Ratahigi mwa doronia i vi hora muleinia vilvilehi.”

⁴ I kera ramuru ban ramuru habwe bwaloi don̄ki la hala nu vagohaian batugehi la gatavan imwa. Mahavana be ramuru dugua,

⁵ atatu rituai be ran tu aia ram hudalinira be, “Gumuru lol hano, be gumuru dugu don̄ki kunia?”

⁶ Ramuru bwaliura kun gabe Jisas nu vevea lalainira, i ram lin̄ia.

⁷ Ramuru botu mai don̄ki aben Jisas ram bohai nora koti amare aluna i Jisas mwa do aluna.

⁸ Sinombu ivusi ran lelei nora koti la hala, i atatu rituai ram dai raran gai lol talu ram berevere hala ginira.

⁹ Sinombu gabe ran tomua i kera gabe ram hurira atagu ram dau bwatuna ram haharigi be, “Uloi Roron God! God vi vatavuhainia gabe mwa mai la ihan Ratahigi!

¹⁰ God vatavuhai maiana non Ratahigi lavoa Deved, Tamamai! Uloi Roron God!”

¹¹ Haḡe Jisas mwa haroro Jerusalem, mwa dalin̄oro lol Imwa Tataro mwa ḡarere mwa ḡita vataha ginau duluai. Mahavana gea ute vavagarigi huba, i kea mwa ban maira non roron̄tai vai Betani.

Jisas mwa Av Badadai Bwatun Vig be mwa Hav Vwae Tehe

¹² Haḡe gubwen̄ dolua ram domare nin Betani take maramwaḡas Jisas.

¹³ Kea mwa ḡarere hautu mwa ḡita gai vik rauna ivusi, kea mwa ban vai abena be men gitae be daga mwasina ram du aluna. Take batena be mwa botuinia mwa ḡita rauna n̄an, bwatuna be mwa hav vora te tarona radu be men vwae.

¹⁴ Haḡe Jisas mwa bevea lalai gai vik be, “Ihei tehe sihav gan te vik ninigo mulei!” Non roron̄tai ran ron̄oe be nu vevea.

Jisas mwa Ḡoro Luara ram Lealeahi i ram Bolvoli lol Imwan God

¹⁵ La mahavana be ram botui Jerusalem Jisas mwa dalin̄oro lol Imwan God. Mwa ḡoro luara ram lealeahi i ram bolvoli alolona, i mwa dul burigai nora tebol gabe ram du ram lealeahi homu i mwa bohai kaburai tanora gabe ram salei manbona,

¹⁶ kea mwa hav mahin̄ai te ihei be vi haḡo te hano ba bwihavare maia sivi sara sabuga.

¹⁷ Haḡe kea mwa bagahi sinombu mwa bevea be, “Nu ravae lol Ravrava sabuga be God mwa bevea be, ‘Imwaḡu vi uloiana be imwa tataro huri sinombu lol ureure duluai.’ I take kimiu gim lolia gi imwan atat surasura!”

¹⁸ Ira muai tataroi mai ira vagahin Silo ram ron̄ ginau geki, ram bavora ram hiḡe hala be kunhanigi rav wehi Jisas. Take ram mataguinia, bwatuna be sinombu duluai ram dan̄an̄a gin non silo vagahi.

¹⁹ Batena ute mwa ravravi Jisas mai non roron̄tai ram derai bwatutun vanua.

Silo Vagahi Nin Bwatun Vig

²⁰ Haḡe mabon̄ gaituvwa, batena ram lago la hala, ram ḡita gai bwatun Vig. Nu ḡoru huba nin n̄alivuna vaivotu lol garona duluai.

²¹ Pita mwa binihi mulei ginau gabe nu loli mwa bevea lalai Jisas be, “Gitae Vagahi, gai vik gabe gon av badadainia nu ḡoru!”

²² Haḡe Jisas mwa bwaliura mwa bevea be, “Gov binihimwasigi garagusi alun God.

²³ Nam bev mwasigi lalai kimiu ihei tehe vi vev dumwia lalai vusi geki be, tomare ba bohainigo sibomwa lol tahi. Be gom hav binihi te gairuruai lol lolomwa, take gov binihimwasigi be havanau gom bevea vi loli, kunia vi dumwi lalainigo.

²⁴ Bwatuna hiḡea nam bevea lalai kimiu be: mahavana be gim dataro i gim hudaligi huri havanau tehe, giv binihimwasigi be gin laia huba, i giv lai dum ginau gabe gim hudaligi huria.

²⁵ Mahavana be gim du gim dataro giv vinihi kaburai hava vuro tehe be gim lolia lalai ihei tehe, huria be Tamamiu lol ute atamare vi binihi kaburai vuromiu mulei.

²⁶ Be gim hav binihi te kaburai vurora hei dolua, kunia mulei Tamamiu amare sihav binihi te kaburai dum vuromiu duluai.”

Avoan Hudaligi huri Roron̄o non Jisas

²⁷ Haḡe ram botu mulei Jerusalem. Batena be Jisas mwa lago lol Imwa Tataro, ira muai tataroi, mai ira vagahin Silo, mai ira bwatmetua ram mai vai abena

²⁸ ram hudalinia be, “Gom lai hava roron̄o be gomen lol ginau kera geki? Ihei mwa laia lalainigo?”

²⁹ Haḡe Jisas mwa bwaliura mwa bevea be, “Inau mulei nav hudali kimiu huri ginau gaituvwa, be giv vwaliu dumwiau, haḡe inau mulei nav vev luae lalai kimiu hava roron̄o nam laia be nav lol ginau kera geki.

³⁰ Gin vevea lalaiau, Jon nu lai roron̄o huri garuhisabuga halabehe? Nin God sa nin atatu?”

³¹ Haḡe ram biavoavo mauginira, ram bevea be, “Be tai vevea be, garuhisabuga non Jon mwa mai nin God, kea vi vevea be, ‘Hurihano gim hav vinihi te mwasiginia?’

³² Sa be tas vevea be, mwa mai nin, ‘Atatu n̄an.’ ” (Gida tam matagui sinombu, bwatuna be kera duluai ram binihimwasigi Jon be kea atatun vevsera vwate.)

³³ Haḡe ram bwaliu Jisas be, “Gam len̄a.” Hage Jisas mwa bevea lalainira be, “Be kunia, inau mulei, nasav vevea tehe be nam lai roron̄o be namen lol ginau kera geki halabehe.”