Matiu 4 - Hano Niu Testamen

Vui Hantai mwa Ḡal Jisas

¹ Haḡe Vui Sabuga mwa domuai Jisas vai la vanua vuroi be Vui hantai men lol ron̄oe.

² Jisas nu togo la vanua vuroi huri gubwen̄ n̄avul gaivasi bon̄i mai rani i maro mwa siv gasia.

³ Haḡe Vui hantai mwa mai lalainia, mwa bevea be, “Sivora giḡo Nitun God, gos lol vatu kera geki gi bereti.”

⁴ Haḡe Jisas mwa bwaliua be, “Lol Ravrava Sabuga mwa bevea Kungeki be, ‘Atatu si hav rahu tehe n̄an gin bereti, take vi rahu dum gin hava avoana tehe be mwa mwalue nin God.’ ”

⁵ Haḡe Vui hantai mwa lai Jisas vai Jerusalem, vanua sabuga, i mwa daua la ulun ibwirin Imwa Tataro.

⁶ Haḡe mwa bevea lalainia be, “Be giḡo mwasigi Nitun God, gov burere sibomwa vai ataa. Huri be lol Ravrava Sabuga mwa bevea be, ‘God vi tau maira non enjel ba rav gita ḡorogo. Rav salo luago gin limara huri be gosav taturai te dum bwalagemwa vwate la vatu.’ ”

⁷ Haḡe Jisas mwa bwaliua be, “Ta mulei Ravrava Sabuga mwa bevea kungeki be, ‘Gosav ḡal te God gabe nom ratahigi.’ ”

⁸ Haḡe Vui hantai mwa laia mulei vai la vusi holomare, i mwa bagahia gin ute ratahigi duluai ata lol ureure mai sarisarira.

⁹ Haḡe mwa bevea lalai Jisas be, “Be gov hivbwaubwau ba ḡogonaiau kekadogaha, ute ratahigi duluai uhu be nam bagahigo ginia nav mahin̄ainira lalainigo.”

¹⁰ Take Jisas mwa bwaliua be, “Vis dagai niniau, Setan. Huri lol Ravrava Sabuga mwa bevea be, ‘Gov gogonai God gabe nom Ratahigi, i gov lalaḡo lalainia gaituvwa n̄ano.’ ”

¹¹ Haḡe Vui hantai mwa siv derainia, haḡe ira enjel ram mai ram ḡitaḡoro Jisas.

Jisas mwa Dau Bwatun non Rovoga Kalili

¹² La mahavana be Jisas mwa ron̄ roroi be ram dau Jon Garuhisabuga lol imwa vauvauhi, mwa dabagilu mulei vai Kalili.

¹³ Kadogaha mwa mwalue nin Nasaret, mwa hivo vai Kapanium, lol vanuan Sebulon mai Navtali, ute gea mwa do abena gin numbu gaivua Kalili.

¹⁴ Ginau uhu mwa lol seserai avoana non atatun vevsera Aesaia be nu vevea tuai be,

¹⁵ “Vanuan Sebulon, vanuan Navtali, la matanhalan tahi, haltavalun Jodan, Kalili vanuara len̄len̄aga!

¹⁶ Kera gabe ram dogo radu lol ute meto rav gita dum gigita gaivua. Irahei gabe ram dogo la vanuan mateana, kera rav gita.”

¹⁷ Haḡe Jisas mwa dau bwatuna mwa bev lua non avoana, mwa bevea be, “Kimiu duluai giv binihi leahi nin vuromiu, bwatuna be mahavana mwa abena be Ute Lavoa atamare mwa sosori.”

Jisas mwa Uloinira Atatun Ravrav Ige Gaivasi

¹⁸ Mahavana Jisas mwa lago mwa hivo hurin numbu gaivua mwa uloinia be numbu ata Kalili, mwa ḡita huhugaituvwa gairua, Saemon, ihana vwate Pita, mai tuana Andru. Pita mai Andru ramuru rav gabe lol numbu huri ige.

¹⁹ Jisas mwa uloinira mwa bevea be, “Giru mai ba huriau, kimiru giru vi vora noḡu atatu. Nav lol kimiru giru vi lai atatu huriau.”

²⁰ Haḡe ramuru derai darihou nora gabe, ramuru huri Jisas.

²¹ Haḡe Jisas mwa dagara vai bano, mwa ḡita huhugaituvwa mulei gairua, Semes mai tuana Jon, kera ira nitun Sebedi. Ira tarua uhu ram lol hurihuri nora gabe lol botu vwate mai tamara Sebedi. Jisas mwa uloinira.

²² Haḡe ramuru derai darihou tamara mai nora botu, ramuru huri Jisas.

Jisas mwa Doretore, mwa Bagahi, i mwa Barahu

²³ Jisas mwa lago vataha vanua ririgi Kalili, mwa bagahi lol imwa tataro duluai, i mwa seserai lua Roroi Tavuha huri ute lavoa non God. I mwa lol atatu be ram haro, i rebehira ram hahantai, ram rahu mulei.

²⁴ Haḡe roron Jisas mwa lon̄ahi vanua duluai Siria. Haḡe sinombu ivusi maragai ram datal bilin̄ai ira harova vai abena. Atatu rituai ram haro, rituai rebehira ram ḡagarasira, i rituai vui hantai mwa dogo alolora. Haḡe rituai ram matmateivula, i rituai rebehira ram mate. I Jisas mwa barahu lalan̄an harova duluai gea.

²⁵ Sinombu ivusi maragai ram huri Jisas, ram mai nin vanua Kalili i lol ute mwa uloinia be Vanua Han̄vulu i Jerusalem mai Judia i vanua duluai haltavalun wai Jodan.