Matiu 3 - Hano Niu Testamen

Toretore non Jon Garuhisabuga

¹ Lol mwasin mahavana Jon Garuhisabuga mwa mwalue vai la vanua vuroi vwate ata Judia, mwa dau bwatuna mwa doretore,

² mwa bevea be, “Kimiu duluai giv binihileahi huri vuromiu, bwatuna be Ute Lavoa atamare mwa sosori.”

³ Jon geki atatun vevsera Aesaia nu vevea tuai be, “Atatu vwate mwa ulo la vanua vuroi be, ‘Giv lol vatuvwai halan Ratahigi. Giv lol bavtutui hala huria.’ ”

⁴ Jon nu sagasagai vinun kamel, gaona vinun buluki. Nu vora gan ginau gagalu mai ginau mwa uloinia be hani be sukabak mwa daua.

⁵ Haḡe sinombu ata Jerusalem mai sinombu duluai ata Judia mai vanua duluai dalis wai Jodan, ram bano duluai vai aben Jon,

⁶ ram seserai vurora vuvuri, i Jon mwa siv garuhisabugainira lol wai Jodan.

⁷ Take mahavana Jon mwa ḡitae be ira Varise maira Sadusi ram mai be vi garuhisabugainira mwa bevea lalainira be, “Kimiu kun teltele! Ihei mwa bevea lalai kimiu be giv romaragai dum nin silo vevegi non God gabe mwa abena be men mai?

⁸ Be kimiu gim binihileahi mwasigi, giv dovon̄ainia alun nomiu lalaḡova.

⁹ Mulei gisav ravravwega tehe, kunia be gim bevea tagaro lalai kimiu sibomiu be, ‘Gida ira nitun Ebraham.’ Nam bev mwasigi lalai kimiu be God vi lol dum vatu kera geki ram du rai vogi gi ira nitun Ebraham!

¹⁰ Talai mamagani mwa en dautau be men tai dul gai lol garona. Gai duluai be ram hav vwae te tavuha, vi taian kaburai, ba bohaiana lol gabi.

¹¹ Inau nam ḡaruhisabugai kimiu gin wai, bwatuna be gim binihileahi huri vuromiu. Take atatu vwate abena vi mai radu ataguku. Wani gea lavoa liuau, i inau siboku nam hav dadariha tehe be nav haḡo non sus. Wani gea vi garuhisabugai kimiu gin Vui Sabuga i gabi.

¹² I mulei mwa haḡo non gai gosi lol limana kun atatu mwa ḡos niu, mwa lai lua mwasina nin bwalana, i mwa hara ḡoḡo mwasina vai la mwasin batana, take mwa bohai kaburai tabwelahana vai lol gabi gabe mwa oda, mosmosianana sigai.

Jon mwa Ḡaruhisabugai Jisas

¹³ Lol mahavana gea Jisas mwa domare nin Kalili, mwa bano vai la wai Jodan huri be Jon men garuhisabugainia.

¹⁴ Haḡe Jon mwa lol ron̄oe be Jisas vi leahi binihina, i mwa bevea be, “Mwa du be giḡo gov garuhisabugaiau. Take gom mai vai abeku.”

¹⁵ Haḡe Jisas mwa bwaliua be, “Gov lin̄ia vi vora kunia magea. Nu vavtutu be tav lolia kunia, huri be tav lol dum doroniva non God duluai.” Haḡe Jon mwa siv mahin̄a be vi garuhisabugainia.

¹⁶ La mahavana be Jisas mwa ḡaruhisabuga vuvuri, mwa mwalue nin wai, i mwa ḡita ute atamare mwa mahavan̄i lalainia i Vui non God mwa hiv aluna kun manbona.

¹⁷ Haḡe silo mwa himai nin ute atamare, mwa bevea be, “Geki haḡea Nituku gabe nam dabea, i nam doron maragainia.”