Matiu 20 - Hano Niu Testamen

Jisas mwa Bagahi huri Atatu be mwa Bev Dagara Tasalana

¹ “Ute Lavoa atamare kun geki. Ratahigin talu vwate bilan ute loloara mwa riv taligaon waen alolona, i mwa domare mabon̄i mwa hiḡe atatu be rav lol rovoga lol taluna.

² Mwa datauleo be vi volira gin vatlegiga gaituvwa huri gubwen̄ gaituvwa. Haḡe kunia, mwa horara vai lol taluna.

³ La alo gaisivo mwa bano mulei lol saran volvoligi, i mwa ḡita atatu rituai ram du len̄len̄a radu,

⁴ mwa bevea lalainira be, ‘Nu tavuha be kimiu mulei giv mai ba lol rovoga lol taluku, i nai vol tavuhai kimiu,’

⁵ I Kunia ram bano. Haḡe la alo han̄vul domwan gairua i alo gaitolu mwa lolia n̄an mulei kunia.

⁶ I mwa abena gin alo gailima mwa bano mulei lol saran volvoligi, i mwa ḡita atatu rituai ram du len̄len̄a radu. Haḡe mwa hudalinira be, ‘Huri hano gim du bobonogai teti gubwen̄i duluai?’

⁷ Take ram bwaliua be, ‘Bwatuna be atatu mwa hav hudali te kamai huri rovoga.’ Haḡe kunia, mwa bevea lalainira be, ‘Kimiu mulei giv mai ba lol rovoga lol taluku.’

⁸ “Ute ravravi, ratahigi mwa hora tomuai huri non atatun rovoga be, ‘Gov warera ram lol rovoga rai mai, i goi volira. Gov tau bwatuna ba bolira alura ran tau bwatun rovoga atagu, i vi nogo alura ran tau bwatun rovoga amua.’

⁹ Kera ran tau bwatun rovoga la alo gailima mwa bolira gin vatlegiga gaitutuvwai vatahara.

¹⁰ Haḡe mahavana kera ran tau bwatun rovoga amua ram mai be men volira, ram binihia be rav haḡo tavwe liu. Take kera mulei ram haḡo vatlegiga gaitutuvwai vatvatahara.

¹¹ Kunia, ram lai nora homu i ram dau bwatuna ram ḡurutui nora ratahigi,

¹² ram bevea be, ‘Kera uhu ram lol rovoga mahavan alo gaituvwa n̄an, take gida tam lol rovoga lol alo hahavwani huri gubwen̄ duluai, take gom bolira kun kamai mulei!’

¹³ “Take ratahigi mwa bwaliu vwate ninira, mwa bevea be, ‘Tua, nam hav surainigo tehe. Take gon mahin̄a be gov lol rovoga huri vatlegiga gaituvwa huri gubwen̄ gaituvwa.

¹⁴ Gov lai volimwa ba dabagilu. Nam doron be nav laia lalainira kera geki ram siv mai atagu kunigo mulei.

¹⁵ Matu nasav lol te dum hano gin noḡu homu siboku kun nam doron? Huri hano binihimwa mwa hantai huri be inau nam lalaḡo tavuha mai noḡu homu?’ ”

¹⁶ Haḡe Jisas mwa bevea be, “Irahei gabe tatagui vora tomuai, i irahei gabe ram domua rai vora tatagui.”

Jisas mwa Bevea Vatoluna huri non Mateana i Tomarean Mulei

¹⁷ Jisas mwa lago mwa hae vai Jerusalem. Haḡe mwa lai dagainira han̄vul domwan gairua, mwa bev dahulinia lalainira la hala,

¹⁸ mwa bevea be “Giv ron̄oe. Gida tam hae vai Jerusalem, i aia vi lin̄iau, Nitun Atatu, la limara muai tataroi i ira vagahin Silo, i rai vevegi bamateau.

¹⁹ Haḡe rav lin̄iau la limara ira len̄len̄aga, be kera rav lol leleiau, i rai vivilisiau, i rav voha bolvoloau. Take atagun gubwen̄ gaitolu nav tomare mulei.”

Avoan Hudaligi non Ratahin Semes mai Jon

²⁰ Haḡe tasalan Sebedi mwa mai aben Jisas mai ira nituna gairua, mwa hivbwaubwau lolmatan Jisas, mwa hudalinia huri buluiana.

²¹ Jisas mwa hudalinia be, “Gom doron havanau?” Haḡe mwa bwaliu Jisas be, “Gov tatauleo be ira nituku gairua geki, mahavana gov togo gi Ratahigi Lavoa, vwate vi togo la mwatuamwa i vwate la mwairimwa.”

²² Jisas mwa bwaliura be, “Gimdol hav ilo te havanau gimdol hudaligi huria. Matu giru vi mwinu dum alolon laha nav mwinua alolona?” Haḡe ramuru bwaliua be, “Uwe, garu vi mwin dumwia.”

²³ Jisas mwa bevea be, “Giru vi mwin alolon noḡu laha. Take nasav vev te dumwia be ihei vi togo la mwatuaku i la mwairiku. Tanon togotogo kera gea hurira hei Tamaḡu mwa lol vatuvwainira mahaḡea hurira.”

Mwasin Alen̄a huri Ute Lavoa

²⁴ Mahavana ira roron̄tai han̄vulu ram ron̄oe, ram lolhoroi maragai huhugaituvwa kera geki.

²⁵ Haḡe kunia, Jisas mwa uloinira duluai vai abena, mwa bevea be, “Gim ilo alen̄ara ira lavoa ata lol ira len̄len̄aga, ram ḡita bahirura nora sinombu, i gim iloe be nora tomuai ram lol nora atatu ram dogo halatera.

²⁶ Take alen̄amiu si hav vora te kunia. Be ihei nin kimiu mwa binihi be kea lavoa, vi mai gi nomiu atatun rovoga.

²⁷ I be atatu vwate mwa binihia be kea tomuai, vi vora kun nomiu turin rovoga.

²⁸ Kun inau, Nitun Atatu, nam hav mai tehe be ramen lol noḡu rovoga. Take nam mai be namen lol nora rovoga, i nam lin̄ rahuku be men vol rahun atatu ivusi.”

Jisas mwa Lol Bugeri Matan Matagara Gairua

²⁹ Mahavana ram derai vanua Jeriko, sinombu ivusi ram huri Jisas.

³⁰ Haḡe matagara gairua ramuru dogo la balsin hala, ramuru ron̄oe be Jisas mwa ḡao, i ramuru haharigi be, “Ratahigi, gov hagav kamaru, Nitun Deved!”

³¹ Take sinombu ram lolhoroinira, ram bisigai be raru vi to ḡoḡonai. Take ramuru mom haharigi gin silo gaivua be, “Ratahigi, gov hagav kamaru, Nitun Deved!”

³² Jisas mwa barahi du, mwa uloinira, mwa bevea be, “Gumuru doron be nav lol hano lalai kimiru?”

³³ Ramuru bwaliua be, “Ratahigi, gamuru doronigo be gov lol bugeri matamaru.”

³⁴ Kunia Jisas mwa hagavira, mwa sibweri matara, haḡe darihou ramuru ḡita ute, i ramuru huri daltali Jisas.