Matiu 16 - Hano Niu Testamen

Ira Varise mai Ira Sadusi Rituai Ram Doron be Ramen Gita Dovon̄a

¹ Ira Varise maira Sadusi rituai ram mai aben Jisas. Ram doron be ramen lol ron̄oe, haḡe ram hudalinia be men lol dovon̄a vwate huri be men seserai muramura non God.

² Take Jisas mwa bwaliura be, “Mahavana be alo mwa hivo gim bevea be, ‘Vaigogo vi alo, bwatuna be lolon mahao mwa memea.’

³ I mabon̄ gaituvwa gim bevea be, ‘Vi uhe, bwatuna be lolon mahao mwa memea i mwa dodoga.’ Giv gita batoi uhe i alo alun mahao. Take gisav gita te batoi dovon̄a ata lol gubwen̄i garigi!

⁴ Kimiu ata lol gubwen̄i garigi be gim doron be giv gita dovon̄a, kimiu ira atat hahantai, gabe gim daleva nin God! Gim hudaliau huri dovon̄a? Sigai! Dovon̄a vi laia lalai kimiu kea n̄an gabe nu loli lalai Jona, atatun vevsera.” Haḡe Jisas mwa derainira, mwa ban dagai.

Gitaḡoro alun Silo Vagahi Vahala

⁵ Mahavana ira roron̄tai ram ban tuhi vai tavalun numbu gaivua, ram binihi malioi be rav lai gara bereti maira.

⁶ Jisas mwa bevea lalainira be, “Giv vugeri matamiu ba ḡita batoi is non ira Varise maira Sadusi.”

⁷ Bwatuna gea, ram biavoavo ginira, ram bevea be, “Mwa bev avoana geki bwatuna be tam hav haḡo te bereti mai gida.”

⁸ Jisas mwa ilo havanau ram bevea, kunia mwa hudalinira be, “Huri hano gim biavoavo gin kimiu bwatuna gim hav haḡo te bereti? Nomiu binihimwasigi garagusi tirigi maragai!

⁹ Matu ke gim hav ilo te ute radu? Gim hav vinihi te dumwia huri mahavana nan viha bora bereti gailima huri sinombu vasan̄vul valima? Gin hogon bamasiri gete gaiviha?

¹⁰ I kun hanigi huri bereti gaibitu huri atatu vasan̄vul vavasi? Gin hogon bamasiri gete gaiviha?

¹¹ Huri hano gim hav vinihi te dumwia be nam hav avo tehe lalai kimiu huri bereti? Giv gita batoi is non ira Varise maira Sadusi.”

¹² Kadogaha ram iloe be mwa hav vevea tehe lalainira be, “Giv gita batoi is huri bereti,” take mwa bevea lalainira be, “Giv gita batoi silo vagahi non ira Varise maira Sadusi.”

Pita mwa Bev Luae be Jisas Haḡea Kraes

¹³ Jisas mwa bano vai la vanua gea aben bwatutun vanua Sisaria Vilipae, i mwa hudalinira non roron̄tai be, “Atatu ram bev haninia huri Nitun Atatu be inau ihei?”

¹⁴ Ram bwaliua be, “Rituai ram bevea be giḡo Jon Garuhisabuga. Rituai be Elaija, rituai be Jeremaia sage atatun vevsera vwate.”

¹⁵ Jisas mwa hudalinira be, “Matu hanigi huri kimiu? Gim beveau be ihei?”

¹⁶ Saemon Pita mwa bwaliua be, “Giḡo haḡea Mesaea, Nitun God varahu.”

¹⁷ Jisas mwa bwaliua be, “Saemon nitun Jon, nu tavuha maragai lalainigo! Bwatuna be mwasigi geki mwa hav mai te lalainigo nin atatu vuroi, take mwa himai rahurahu nin Tamaḡu amare.

¹⁸ Nam bev mwasigi lalainigo, Pita: giḡo vatu, i alun vatu geki nav tari noḡu Uloilua. I mateana si hav rihu te maragai ninia.

¹⁹ Nav lai lalainigo gai havan̄i huri Ute Lavoa atamare. Ginau gabe goi visigai ginia lol ureure geki, vi visigai ginia mulei lol ute atamare. I ginau gabe goi mahin̄ainia lol ureure, vi mahin̄ainia mulei lol ute atamare.”

²⁰ Haḡe Jisas mwa bisigai ginira non roron̄tai be rasav seserainia te lalai hei dolua be kea Kraes.

Jisas mwa Bev Luae be vi Mate, Take vi Tomare Mulei

²¹ Nin mahavana gea Jisas mwa dau bwatuna mwa bev luae lalai non roron̄tai be, “Mwa du be nav hae vai Jerusalem, i nav ron̄ḡagarasi maragai gin hano be ira bwatmetua ira Jius maira muai tataroi maira vagahin Silo rav lolia aluku. Kera rai wehiau, nai mate. Itake atagun gubwen̄ gaitolu God vi lol domarei muleiau.”

²² Pita mwa lai dagai Jisas vai abena, mwa besigai ginia, mwa bevea be, “Vina, Ratahigi! Si hav ḡunia tehe lalainigo!”

²³ Haḡe Jisas mwa ban burigai Pita, mwa bevea be, “Vis dagai niniau, Setan. Gosav lol te daturaiau. Huri be nom binihiva barabe binihiva non God, take binihiva non atatu n̄an.”

Ihei be mwa Huri Jisas mwa Du be vi Tuḡoro Ginau be Kea Sibona mwa Doron

²⁴ Haḡe Jisas mwa bevea lalai non roron̄tai be, “Be ihei mwa doron be vi huriau, wani gea vi derai non doroniva sibona. Haḡe vi haḡo domarei non volovolo ba huriau.

²⁵ Huri be ihei mwa doron be vi varahu rahuna sibona, wani gea vi lin̄ kaburai rahuna. I ihei be mwa lin̄ rahuna huriau, vi habwea.

²⁶ Matu atatu vi lai ginau duluai lol ureure geki, take vi lin̄ kaburai rahuna, kea vi lai dum havanau ninia? Sigai! Ginau sigai be atatu vi lai dumwia be vi lai mulei rahuna.

²⁷ Inau Nitun Atatu nav mai vainon̄oiha mai noḡu enjel lol ginau sarisari non Tamaḡu. La mahavana gea inau nav tavwe vatvataha atatu hurin nora lalaḡova.

²⁸ Nam bev mwasigi lalai kimiu be atatu rituai teti rasav mate te radu, vai votu rav gitau, Nitun Atatu, nav mai kun Ratahigi lavoa.”