Matiu 1 - Hano Niu Testamen

Vevuri huri Vara Gabe Jisas Kraes mwa Hou Aluna

¹ Kungeki haḡea vara gabe Jisas Kraes mwa hou aluna, mwa hou alun varan Deved, i Deved mwa hou alun varan Ebraham.

² Ebraham uhu mwa bav nituna Aisak, i Aisak mwa bav nituna Jekob, i Jekob mwa bav nituna Juda maira tuana rituai mulei.

³ Juda uhu mwa bav nituna gairua, ihan vwate Peres i ihan vwate Sera, ihan ratahira Tama. Peres mwa bav nituna Hesron, i Hesron mwa bav nituna Ram,

⁴ i Ram mwa bav nituna Aminadab. Aminadab mwa bav nituna Nason, i Nason mwa bav nituna Salmon.

⁵ Salmon mwa bav nituna Boas, ihan ratahina Rehab. Boas mwa bav nituna Obed, ihan ratahina Rut. Obed mwa bav nituna Jese,

⁶ i Jese mwa bav nituna Deved, kea gabe Ratahigi Lavoa. Deved mwa bav nituna Solomon, ratahina gabe bweron Uraia.

⁷ Solomon mwa bav nituna Rehoboam, Rehoboam mwa bav nituna Abaija, i Abaija mwa bav nituna Asa.

⁸ Asa mwa bav nituna Jehosavat, Jehosavat mwa bav nituna Joram, i Joram mwa bav nituna Usaia.

⁹ Usaia mwa bav nituna Jotam, Jotam mwa bav nituna Ehas, i Ehas mwa bav nituna Hesekaia.

¹⁰ Hesekaia mwa bav nituna Manase, Manase mwa bav nituna Amon, i Amon mwa bav nituna Josaia.

¹¹ Josaia mwa bav nituna Jekonaia maira tuana rituai. La mahavana gea ran lai sinombu ira Jius vai la vanua Babilon.

¹² Ataguna gabe ram lai vuvuri sinombu ira Jius vai Babilon, Jekonaia mwa bav nituna Sealtiel, i Sealtiel mwa bav nituna Serubabel.

¹³ Serubabel mwa bav nituna Abiud, Abiud mwa bav nituna Eliakim, i Eliakim mwa bav nituna Asor.

¹⁴ Asor mwa bav nituna Sadok, Sadok mwa bav nituna Akim, i Akim mwa bav nituna Eliud.

¹⁵ Eliud mwa bav nituna Eleasa, Eleasa mwa bav nituna Matan, i Matan mwa bav nituna Jekob.

¹⁶ Jekob mwa bav nituna Josep, Josep haḡe uhu gabe ahoan Mere, gabe ratahin Jisas be tam uloinia be Kraes (gabe Wani Vurai).

¹⁷ La mahavana gabe nu tau bwatuna alun Ebraham vai votui Deved vara kun n̄avul gaituvwa domwan gaivasi. I nu tau bwatuna la Deved vai votu be ram laira ira Jius vai Babilon, vara mulei kun n̄avul gaituvwa domwan gaivasi. I ataguna mulei be ram lai ira Jius vai votu maiana non Kraes, vara mulei kun n̄avul gaituvwa domwan gaivasi.

Vorana non Jisas Kraes

¹⁸ Geki vevurin Jisas Kraes Kun hanigi nu vora. Mere ratahina gabe Josep nu lai mahalei huria, ta amua ramuru siv to ute gaituvwa Mere mwa habwea be kea vi haḡo naturigi gin Vui Sabuga.

¹⁹ Josep, gabe nu tatauleo be vi lagi mai Mere, kea atat vavtutu vwate, mwa hav doron tehe be vi lol Mere vi busbusi. Take mwa lol taritari doron be rav tugu dahuli nora datauleo.

²⁰ Mahavana mwa do mwa binihia kunia, enjel non God mwa bisirai abena lol maturubore. Enjel mwa bevea lalainia be, “Giḡo Josep, varan Deved, gosav matagu tehe be gomen lai Mere uhu gi tasalamwa. Bwatuna be Vui Sabuga mahaḡea mwa hogoi naturigi lalainia.

²¹ Mere vi haḡo nituna atamwani. Gov huri ihana gi Jisas, bwatuna be kea vi varahu non sinombu nin vurora.”

²² Ginau duluai geki mwa bisirai be men lol seserai hano be Ratahigi nu vev daua lalai atatun vevsera tuai be,

²³ “Daulato vwate be mwa hav ilo te atamwani radu, vi ros atatu. Vi haḡo nituna atamwani i rav huri ihana gi Emanuel.” Iha gea Emanuel binihiva be “God mwa dogo mai gida.”

²⁴ Mahavana Josep mwa mamata, mwa lolia kun enjel non God nu vevea lalainia. Mwa lai Mere gi tasalana.

²⁵ Take mwa hav bulu te radu maia vai votu Mere mwa bav nituna atamwani. I Josep mwa huri ihan naturigi gi Jisas.