Leo Tavuha gabe Luk nu Ravae 17 - Hano Niu Testamen

Vuro

¹ Haḡe Jisas mwa bevea lalai non roron̄tai be, “Ginau gabe ram lol atatu ram buroga mwa du mahaḡea be rav loli, take vi hantai lalai wani gabe mwa lol ute kera uhu ram loli!

² Nu tavuha lalai wani gea be vi ligoana na vat marahi la mwagorona i vi vohaiana kaburai lol tahi roro ninia gabe si lol naturigi vwate uhu be men vuroga.

³ Kunia giv gitaḡoro kimiu!” “Be tuamwa si vuroga, visigai ginia, be kea mwa binihi leahi, gov binihi kaburai vurona.

⁴ Be kea si vuroga lalainigo vabitu lol gubwen̄ gaituvwa i mahavana be mwa lolia lalainigo kunia mwa mai duluai vai abemwa mwa bevea be, ‘Nam binihi leahi,’ gov binihi kaburainia.”

Binihimwasigi Garagusi

⁵ Haḡe ira hala ram hudali Ratahigi ram bevea be, “Gov lol gavuai nomai binihimasigi garagusi.”

⁶ Haḡe Ratahigi mwa bwaliura mwa bevea be, “Be sivora nomiu binihimwasigi garagusi gaivua kun birin ramute gis vev dumwia lalai gai mataboe be, ‘Mwalue sibomwa nin tanomwa ba rivugo sibomwa lol tahi!’ i kea vi ron̄ silomwa.”

Lalaḡova non Atatun Rovoga

⁷ “Be si vora ihei nin kimiu non atatun rovoga abena be si vutuvutu lol ute loloara sa si gitaḡoro sipsip, mahavana gabe mwa dabagilu loloara gosav vev te dumwia lalainia be men vilvilehi ba ḡan gan ginau!

⁸ Gosav vev te dumwia lalainia kunia! Take, gov vevea lalainia be, ‘Lol vatuvwai gaku ginau, i gov saga ḡorogo gin gaisagan ginaganiana i gov lai gaku ginau vai abeku; nav mwinmwin ba ḡangan amua gom siv gan gamwa.’

⁹ Mwasigi be atatun rovoga mwa hav tu tehe be vi lai silo avkari huria gabe mwa dabe silon tomuai?

¹⁰ Nuḡunia n̄an lalai kimiu; batena be gim lol haraharai ginau duluai gabe ran vevea lalai kimiu be giv lolia, giv vevea be, ‘Gida atatun rovoga vuroi duluai; tan lol haraharai hano gabe mwa du be tav lolia.’ ”

Jisas mwa Lol Melmeloi Ira Lepa Han̄vulu

¹¹ Batena Jisas mwa lago vai Jerusalem, kea mwa ban lol davolan Samaria mai Kalili.

¹² Haḡe mwa ban be vi dalin̄oro lol vanua tirigi vwate i ira lepa han̄vulu ram bisogari maia. Kera ran tu hautu

¹³ i ram haharigi amare ram bevea be, “Jisas! Vagahi! gov hagav kamai!”

¹⁴ Haḡe Jisas mwa ḡitara i mwa bevea lalainira be, “Giv van aben ira tataroi ba rav gita rebehimiu.” Mahavana be ram ban radu la hala ram melmelo.

¹⁵ Haḡe vwate ninira mwa ḡitae be manugana ram lieni mwa dabagilu mulei mwa uloi roron God gin silo gaivua.

¹⁶ Kea mwa hivbwaubwau ḡoro Jisas hurin bwalagena mwa avkaria. Atatu gea ata Samaria.

¹⁷ Haḡe Jisas mwa avlua amare mwa bevea be, “Kera han̄vulu gabe harova nu nogo ninira, kera gaisivo behe?

¹⁸ Huri hano tausala geki mwa dabagilu mwa lai avoan avkari lalai God?”

¹⁹ Kunia Jisas mwa bevea lalainia be, “Tomare ba dabagilu; nom binihimwasigi garagusi sibomwa mwa barahugo.”

Maiana non Rahuan Gara

²⁰ Varise rituai ram hudali Jisas be, baten hano Rahuan Gara gabe God mwa Ratahigi alolona vi mai. Kea mwa bwaliura be, “Rahuan gara non God sihav visirai te dum kun ginau be vi gitana.

²¹ Ihei tehe sihav vev te dumwia be, ‘Gitae geki!’ sa ‘Kahaḡa haḡea!’; bwatuna Rahuan Gara gabe God mwa Ratahigi alolona mwa dogo lol davolamiu.”

²² Haḡe mwa bevea lalainira non roron̄tai be, “Mahavana vi mai gabe giv binihi hohov huri gubwen̄ vwate gabe Nitun Atatu vi mai alolona, take gisav gita te dumwia.

²³ Atatu rituai rai vev dumwia lalai kimiu be, ‘Giv garere vai kahaḡa!’ sa ‘Giv garere vai teti!’ Take gisav huri te avoana kera gea.

²⁴ Vi ḡun vilehi gabe mwa ḡigita n̄andu mahao nin tavaluna vai tavaluna, vi loli kunia la gubwen̄in Nitun Atatu.

²⁵ Take amua nin kea, kea vi ron̄ ḡagarasi i sinombu ata lol gubwen̄ garigi rai varihainia.

²⁶ Kunia n̄an be nu loli lol gubwen̄in Noa, vi loli mulei kunia lol gubwen̄in Nitun Atatu.

²⁷ Atatu ran tu ram ḡan ginau i ram mwin wai, atamwan mai vavine ran lagi, vaivotu gubwen̄ gabe Noa nu haroro lol waḡa, i wailuluvi mwa haravui sinombu i ram mate duluai.

²⁸ Vi ḡunia n̄an be nu loli lol gubwen̄in Lot, sinombu ran tu ram ḡangan, ram mwinmwin, ran volvoli i ram salei vataha ginau, ran ririvu i ram haḡo imwa.

²⁹ Lol gubwen̄i be Lot nu Tomare nin Sodom, taniavun gabi mai vatu nu himai kun uhe nin amare i nu wehi sinombu duluai.

³⁰ Vi loli n̄an mulei kunia lol gubwen̄i gabe Nitun Atatu vi visirai alolona.”

³¹ “Lol gubwen̄ gea atatu gabe vi togo la ibwirin imwa amare kea sihav hivo te mulei vai ata vai lol imwa be men lai non viloḡoana gabe mwa du alolon imwa, kunia mulei atatu gabe nu van lol ute loloara sihav tabagilu te mulei vai la imwa.

³² Vinihi dum tasalan Lot!

³³ Ihei mwa lol ron̄oe be vi varahu rahuna sibona vi mate; haḡe ta be ihei mwa lin̄ rahuna huri mateana vi varahua.

³⁴ Haḡe lol bon̄i n̄an kea nam bev lalai kimiu be, atatu gairua raru vi maturu la bata gaituvwa: vi lai dagai vwate i tuana vi eno.

³⁵ Vavine gairua raru vi lol ginaganiana utegaituvwa: vi lai dagai vwate i tuana vi togo.

³⁶ Atamwani gairua raru vi lol rovoga lol talu, vi lai dagai vwate i vwate vi tu.”

³⁷ Haḡe non roron̄tai ram hudalinia be, “Behe Ratahigi?” Haḡe Jisas mwa bwaliura be, “Behe be rebehin ginau mate vi eno mala rav ḡoḡo aia.”