Leo Tavuha gabe Luk nu Ravae 10 - Hano Niu Testamen

Jisas mwa Hora Luara N̄avul Gaibitu Domwan Gairua

¹ Haḡe Ataguna gea Ratahigi mwa ḡita luara atatu n̄avul gaibitu domwan gairua i mwa hora luara gairuruai, be rai van dotomua ninia vai lol bwatutun vanua mai vanua ririgi lol ute gabe kea vi van aia.

² Kea mwa bevea lalainira be, “Gita ginaganiana gaivua maragai lol ara, take atatu gaiviha n̄an ram lol vatuvwai be rav laia vai anvanua. Mwa du be vi hudali mutmutai wani be bilan ute huri be vi mom hora atatu rituai mulei rai van ba mom lai ginaganiana.

³ Giv van! Nam hora lua kimiu nitui sipsip vai lol davolan vwiriu turu.

⁴ Gisav haḡo te tanon homu sage nomiu tan̄a sage sus; gisav mambu tehe be gimen helheloi ihei tehe la hala.

⁵ Mahavana be gim haroro lol imwa vwate, muana giv vevea be, ‘Tamwata na togo lol imwa uhu.’

⁶ Be atatun tamwata aia, nomiu tamwata na togo aluna; be sigai giv lai mulei nomiu tamwata.

⁷ Giv togo lol imwa gea, giv gan ginau i giv mwin wai gabe ram laia lalai kimiu, bwatuna mwa du be atatun rovoga vi lai dum tavwena. Gisav van te nin imwa vwate vai lol vwate.

⁸ Mahavana tehe be gim haroro lol bwatutun vanua vwate i ram lai ḡoḡo kimiu, giv gan hano gabe ram laia lalai kimiu,

⁹ giv lol barahu ira harova lol bwatutun vanua gea, i giv vevea lalai sinombu aia be, ‘Ute Ratahigi gabe God mwa bora Ratahigi Lavoa ḡoro non sinombu alolona mwa sosori gin kimiu.’

¹⁰ Take lol hava bwatutun vanua gim haroro alolona i ram hav lai te ḡoḡo kimiu, giv van lua vai la hal gaivua i giv vevea be,

¹¹ ‘Taniavun bwatutun vanuamiu gabe mwa du la bwalagemai gam darudaruainia ḡoro kimiu. Ta giv binihi dumwia be, mahavana mwa abena gin kimiu huri ute Ratahigi gabe God mwa bora Ratahigi Lavoa ḡoro non sinombu alolona mwa sosori gin kimiu!’

¹² Nam bev mwasigi lalai kimiu be, lol Gubwen̄ Vevegi God vi gita hagav vanua Sodom nin bwatutun vanua kera uhu!”

Binihimasigi Sigai Lol Bwatutun Vanua Rituai

¹³ “E, kimiu ata Korasin, nam hagav maragai kimiu! I kimiu mulei ata Betsaeda, nam hagav maragai kimiu! Huribe lalaḡova muramura gabe nu lolira lol tanomiu daga be atatu vwate si lolia kunia la vanuara Taea mai Saidon, tuai mau sinombu aia ras sagasagai gav buburasiga, i ras bwasai rebehira gin taniavu, huribe men lol seserainia be ram binihi leahi nin vurora.

¹⁴ Lol gubwen̄ vevegi God vi hagav maragai sinombu la vanua Taea mai Saidon liu nin kimiu.

¹⁵ I kimiu mulei, ata Kapanium! Gim doron be vi hagai kimiu sibomiu vai amare? Ta vi vohai kimiu vai lol mateana!”

¹⁶ Haḡe Jisas mwa bevea lalai non roron̄tai be, “Ihei tehe mwa ron̄ kimiu mwa ron̄oau; take ihei tehe mwa barihai kimiu mwa barihaiau; i ihei tehe mwa barihaiau mwa barihai wani gabe nu horau.”

Ira N̄avul Gaibitu Domwan Gairua Ram Dabagilu

¹⁷ Ira n̄avul gaibitu domwan gairua ram dabagilu gin samsamwara gaivua. Ram bevea be, “Ratahigi, vui hantai ram ron̄ silomai batena gam borotainira lol ihamwa!”

¹⁸ Haḡe Jisas mwa bwaliura be, “Nan gita Setan nu hovi nin amare kun vilehi.

¹⁹ Giv roron̄taiau! Nan lai lalai kimiu roron̄o, huri be giv varahi teltele mai bwan̄seresere, i giv muramura ḡoro nomiu ivwalu, i ginau vwate sihav lol te ḡagaras kimiu.

²⁰ Take gisav samwara tehe bwatuna vui hantai ram ron̄ silomiu; ta giv samwara huri be ihamiu nu ravan ḡoro amare.”

Jisas mwa Samsamwara

²¹ Lol mahavan gea Jisas mwa masiri gin samwarana gin Vui Sabuga, i mwa bevea be, “Tata, giḡo Ratahigi ḡoro amare i lol ureure! Nam avkari maragainigo, bwatuna gon lol bisirai lalainira bwaḡele hano gon tahulinia nin ira mataisao. Mwasigi, Tata, geki haḡea halana gon doron be vi loli kunia.”

²² “Tamaḡu nu lai ginau duluai lalaiau atatu vwate mwa hav iloe tehe, be Nitui ihei take Tata, n̄an. Haḡe atatu vwate mwa hav iloe te be Tata ihei, take Nitui n̄an, i irahei Nitui mwa doron be vi lol bisirainia lalainira.”

²³ Haḡe Jisas mwa ban burigai hurira non roron̄tai mwa bevea lalainira be, “Giv ron̄ mwandavuha maragai, huri ginau kera geki gabe gim ḡitara!

²⁴ Nam bevea lalai kimiu be, ira atatun vevsera ivusi mai ira ratahigi lavoa ran doron be rav gita havanau gabe gim ḡitara, ta ram hav ḡitara tehe, i rav ron̄ te hano gabe gim ron̄ora, ta ram hav ron̄oe tehe.”

Avoan Dalogai Huri Atat Tavuha Ata Samaria

²⁵ Haḡe Vagahin Silo vwate mwa mai mwa lol ron̄ Jisas gin avoan hudaligi be, “Vagahi nav lol hano te n̄an be nav haḡo dum rahuana vai tuai?”

²⁶ Haḡe Jisas mwa bwaliua mwa bevea be, “Havanau Ravrava Sabuga mwa bevea? Gom basogo haninia?”

²⁷ Haḡe atatu mwa bwaliua be, “ ‘Gov tabe nom Ratahigi gabe nom God gin lolomwa duluai, i gin atmatemwa i gin nom muramura duluai, i gin binihimwa duluai’; gov ‘Tabe ata la vanuamwa kunigo sibomwa.’ ”

²⁸ Haḡe Jisas mwa bwaliua mwa bevea be, “Gom bwaliu tavuhainia, gov lol kunia i gov rahu.”

²⁹ Take Vagahin Silo mwa doron be vi lol bavtutui binihina duluai, mwa hudali Jisas be, “Ta ihei be ata la vanuaḡu?”

³⁰ Haḡe Jisas mwa bwaliua mwa bevea be, “Atatu vwate lol gubwen̄ vwate mwa hivo nin Jerusalem vai Jeriko, i atat surasura ram haḡo batugehia, ram dagahi dagai gaisagana ram wehi bagoea, i ram derainia mwa abena be men mate.

³¹ I ataguna gea Tataroi vwate mwa hivo la hala mwa ḡita atatu i mwa daleva dagai vai haltavalun hala.

³² La hala n̄an gea ata la varan Livae vwate mwa mai aia mwa ḡitae mwa daleva dagai vai haltavalun hala.

³³ Take ata Samaria vwate mwa lago la hala n̄an gea batena mwa habwe atatu gea, binihina mwa masiri gin sine hagavi huria.

³⁴ Mwa ban sosoria mwa salil hun wai sasavi mai waen la halan gai vivilisi i mwa bauhi ḡorora, mwa haḡo luae mwa daua alun bilan don̄ki i mwa laia vai lol imwa tausala, aia mwa ḡita ḡoroe.

³⁵ Haḡe gubwen̄ dolua kea mwa lai vatlegiga gairua mwa hagainia lalai wani gitaḡoro imwa, mwa bevea lalainia be, ‘Gov gitaḡoro wani uhu, mahavana gabe nav tabagil mulei vai teti nav siv vol lua hano tehe mulei gabe gon lolia lalainia.’ ”

³⁶ Haḡe Jisas mwa bev nogonogoinia be, “Lol binihimwa, behe ninira gaitolu nu vora ata la vanuan wani gabe atat surasura ran wehia?”

³⁷ Haḡe Vagahin Silo mwa bevea be, “Kea gabe nu buluia.” Haḡe Jisas mwa bwaliua be, “Goi vano, ba lol kunia.”

Jisas mwa Atei Mata mai Mere

³⁸ Batena ram darihou nora lagoana, kea mwa dalin̄oro lol vanua vwate aia mwa habwe vavine vwate ihana Mata mwa lai ḡoḡo Jisas vai lol imwana.

³⁹ Tuana gabe Mere nu togo ata hurin bwalagen Ratahigi mwa roron̄tai non avoan vagahi.

⁴⁰ Take Mata lolona mwa bovonosi gin rovoga duluai gabe mwa lolia; mwa mai mwa bevea be, “Ratahigi, matu gom hav vinihia te be tuaku mwa lin̄ ginau duluai lalaiau be namen lolira gaheku? Vevea lalainia na mai ba buluiau!”

⁴¹ Take Ratahigi mwa bwaliua be, “Mata, Mata! gom n̄ala bonogai gin binihivanan ginau ivusi, haḡe ta ginau gaituvwa n̄an nu dadariha.

⁴² Mere nu gitalua ginau tavuha gabe sihav lai te dagai dumwia ninia.”