Lalaḡova 4 - Hano Niu Testamen

Pita mai Jon ramuru du lolmatan Kansel

¹ Pita mai Jon ramuru avo radu mai sinombu mahavana be ira tataroi, mai tomuai ḡoro Imwa Tataro, mai ira Sadusi ram bivisirai.

² Kera geki nora binihiva mwa biaroi maragai bwatuna be ira hala gairua ramuru bagahi sinombu ramuru bevea be Jisas nu tomare nin mateana, i mwa eno gi mwasigi, be Jisas nu tomare mulei i mwa rahu.

³ Haḡe kunia ram haḡo batugehira ram daura lol imwa vauvauhi vaivotu mabon̄i, bwatuna be tarona mwa bavahala huba.

⁴ Take atatu ivusi mahavana be ram ron̄ roroi ram binihimwasigi, atamwani duluai nudadariha kun be vasan̄vul valima.

⁵ Haḡe mwa rani gubwen̄ dolua, ira Lavoa ira Jius mai ira bwatmetua, i ira vagahin silo ram ḡoḡo Jerusalem.

⁶ Kera ram ḡoḡo mai ira Muan tataroi Annas bul mai Kaiavas, Jon i Aleksanda, i kera dodolua rituai mulei la varara Muai Tataroi.

⁷ Haḡe ram darira ira hala ram du lol matara ram hudalinira ram bevea be, “Gim lol ginau geki la hava hala? Gim lol ginau geki la hava muramura, sage gim lol ginau geki lol ihan ihei?”

⁸ Haḡe Pita mwa masiri gin Vui Sabuga, mwa bwaliura mwa bevea be, “Tomuai ḡoro sinombu mai ira bwat metua

⁹ be kimiu gim hudaligi garigi huri lalaḡov tavuha be nu loliana lalai luḡu i kun hanigi be kea mwa rahu,

¹⁰ kunia mwa du be kimiu duluai gis iloe, i sinombu duluai ira Jius ras iloe be wani geki mwa du lol matamiu mwa rahu didinigi sivi muramura gin ihan Jisas Kraes ata Nasaret gabe gi voha bolvoloe i kea God nu lol domareinia nin mateana.

¹¹ Jisas kea atatu gabe ravrava sabuga mwa bevea huria be, ‘Vatu gabe kimiu ira haḡohaḡo imwa gin vev dagarae mwa mai gi muana alolora duluai.’

¹² Vi habweana na varahuva sivinia n̄an gaituvwa i lol ureure duluai atatu vwat mulei sigai gabe God nu horae be vi varahu dum gida.”

¹³ Haḡe kera rituai ata lol Kansel ram dan̄an̄a maragai bwatuna be Pita mai Jon ramuru hav matagu tehe i ram iloe be kera atatu vuroi n̄an raru hav sikulu tehe. I kera ram siv ilo batoia be kera lol tatan̄ana gaituvwa mai Jisas.

¹⁴ Take ginau sigai mulei be ramen mom bevea, bwatuna be ram ḡita wani be nu lol barahua mwa du mai Pita i Jon.

¹⁵ Haḡe kunia ram bevea lalainira be rai bwihavare, i kera ram siv biavoavo mwa gahera aluna.

¹⁶ Haḡe ram hudaligi ram bevea be, “Tav lol hano lalai atatu kera geki? Atatu duluai Jerusalem ram iloe be kera ramuru siv lol ginau dan̄an̄a geki, i tasav siehi te dumwira.

¹⁷ Take huri be tamen tuḡoro ginau geki, bereva rorona gim lon̄ahi sinombu, tai vev daua lalai ira tarua geki be raru sihav mom avo te lalai ihei tehe la ihan Jisas.”

¹⁸ Haḡe kunia ram uloi muleinira ramuru haroro ram bevea lalainira be raru sihav mom avo tehe la hava hala te mulei be raru men vagahi la ihan Jisas.

¹⁹ Take Pita mai Jon ramuru bwaliura ramuru bevea be, “Kimiu sibomiu gin vevegia be kehibehe nu vahala lalai God, be garu vi tabe kimiu sage garu vi tabe God?

²⁰ Huri be garu sihav lin̄i tehe be garu vi avo huri havanau be gamuru ḡitae i gamuru ron̄oe.”

²¹ Haḡe kunia Kansel mwa borotai maragai muleinira i mwa hora dagainira. Ram ḡitae be sihav dumwi tehe be rai vevegira, bwatuna be sinombu ram lol roroai God huri ginau be nu gabe loli.

²² Wani gabe nu lol tagaro geki lalainira tauluna kun n̄avul gaivasi.

Ira Binihimwasigi ram Dataro

²³ Mahavana be Pita mai Jon ramuru bwihavare ramuru dabagilu huri nora vatugigi ramuru bevuri huri ginau gabe ira muai tataroi mai ira bwatmetua ran vevea.

²⁴ Mahavana be ira binihimwasigi ram ron̄oe, kera duluai ram bulu ute gaituvwa lol tataro lalai God, ram dataro ram bevea be, “Vagahi gon tau ute atamare, i lol ureure, i tahi i ginau duluai alolona.

²⁵ Gin Vui Sabuga gon avo sivi nom atatun Rovoga Deved, i mwa bevea be, Huri hano ira Lolobon̄i ram lol horo maragai? Huri hano be sinombu ram dari hala hantai?

²⁶ Haḡe ira ratahigi lavoa ata lol ureure ram lol vatuvwainira sibora, i ira lavoa ram ḡoḡo bulbulu be rav bwalo mai Ratahigi i Wani Vurai nona.

²⁷ Bwatuna mwasigi be Herod mai Pontus Paelat ramuru ḡoḡo bulbulu ute gaituvwa lol bwatutun vanua mai ira Lolobon̄i i ira sinombu ira Jius be rai bwalo mai Jisas, nom atatun rovoga Sabuga, gabe gim lolia Wani Vurai.

²⁸ Ram ḡoḡo be rav lol ginau duluai gabe giḡo, gin non muramura i binihiva, gon vinihi daua be vi loli.

²⁹ God holomare, gov vului nora loliana hantai be ram lolia lalai kamai.

³⁰ Gov sogai lua limwamwa ba barahu, i gam dataro be tagaro i ginau dan̄an̄a vi dumwi gin liman nom atatun rovoga Jisas.”

³¹ Haḡe mahavana be ram dataro vuvuri ute be ram ḡoḡo aia mwa rihu. Kera duluai ram masiri gin Vui Sabuga i ram dau bwatuna ram seserai lua avoana non God gin muramura.

Ira Binihimwasigi ram Hara nora Vataha Ginau

³² Ira binihimwasigi ram dogo gin binihiv gaituvwa mai lolora duluai. Atatu vwate sigai alolora be mwa uloi non ginau sibona be nona gahena, take ram hara ginau be nora sibora batvatahara.

³³ Haḡe ira hala ram muramura maragai gi gaitura huri tomarean mulei non Ratahigi Jisas, Haḡe God mwa salil bamasiri non vatavuha alura duluai.

³⁴ Atatu vwate sigai alolon tatan̄ana gea be mwa rihai ginau. I kera gabe bilara ute loloara sage imwara abena ram saleinia i ram lai homuna

³⁵ ram laia lalai ira hala, i homu mwa harana batvatahara huri nora doroniva.

³⁶ Haḡe kunia Josep, kea ata la varan Livae nu vora Saipras, kea gabe ira hala ram uloinia be Banabas. Gin binihiva be, “Atatu be non avoana mwa hau lua binihiva non atatu.”

³⁷ Kea mwa salei bilan ute loloara i mwa lai homu lalai ira hala.