Lalaḡova 23 - Hano Niu Testamen

¹ Pol mwa ḡarere lolmatan kansel mwa bevea be, “Ira tua ata Israel! Noḡu binihiva i lalaḡova mai God alun rahuku la hala be nam dogo vaivotu lol gubwen̄ garigi, nu vavtutu n̄ano.”

² Haḡe Ananias gabe Muai Tataroi mwa bevea lalainira gabe ram du sosori Pol be rav rabasia la bwan̄ona.

³ I Pol mwa bevea lalainia be, “Mwasigi God vi rabasigo, bwatuna be giḡo kun uli n̄an vuroi la ute bwatu! Gom domahuri aia be goi vevegiau hurin Silo, take giḡo sibomwa gom lol salil silo ginia be gom horara be rav rabasiau!”

⁴ Haḡe atatu be ram du sosori Pol ram bevea lalainia be, “Gom bev avoana gea nuhav tavuha tehe lalai Muai Tataroi non God!”

⁵ Pol mwa bwaliua mwa bevea be, “Ira tua ata Israel, nam hav iloe te n̄an haḡea be kea Muai Tataroi. Bwatuna rav rava sabuga mwa bevea be, gosav lai te avoan hantai lalai tomuai huri nom sinombu.”

⁶ Pol mwa ḡitae be atatu rituai lol sinombu gea kera Sadusi i tavalura kera Varise, haḡe mwa av lua lol nora Kansel mwa bevea be, “Ira ata Israel! Inau Varise, bwatuna inau nitun Varise vwate. I inau lol silo vevegi teti kadogaha bwatuna, noḡu doronhohov be nai vevea, sage nam bevea be mateana vi tomare huri rahuana.”

⁷ Haḡe mahavana be mwa bev vuvuri avoana geki, ira Varise mai ira Sadusi ram dau bwatuna ram bigaigai, i ram harabora nin tatan̄ana.

⁸ (Huri be ira Sadusi ram bevea be atatu mwa mate sihav tomare tehe mulei huri rahu ana, i ira enjel mai vui mulei sigai; take ira Varise ram binihimwasigi alun ginau gaitolu kera gea.)

⁹ Haḡe batoana i haharigiana i batoana mwa hae amare, i ira vagahin Silo rituai gabe ram huri tatan̄ana non ira Varise ram du amare ram bev lua didini nia be: “Gasav habwe te dum vahalana alun wani geki! Bisata vui sage enjel vwate mwa avo lalainia!”

¹⁰ Haḡe vigaigaiana mwa wasi maragai vaivotu be tomuai ḡoro atatun bwaloana mwa matagu maragai huri be bereva ram biviha Pol la mahava n̄an kunia. Haḡe bwatuna gea mwa hora non atatun bwaloana ram hivo lol sinombu ram lai dagai Pol ninira, i ram lagoi dagainia vai lol vwavwan imwa wasi.

¹¹ Haḡe lol bon̄i gea Ratahigi mwa bisirai aben Pol mwa bevea be, “Gosav matagu tehe! Gon lai nom gaitura huba lalaiau teti Jerusalem, i gov lolia n̄an mulei kunia lol vanua Rom.”

Ira ata Israel rituai ram Dari halana be rav Wehia

¹² Haḡe mwa ran mabon̄i ira Jius rituai ram ḡoḡo gaituvwa ram lol taritari vwate. I kera ram lol tatauleo garagusi vwate be rasav gan te ginau sa wai vaivotu be rav wehi Pol.

¹³ Atatu kun n̄avul gaivasi duluai be ram lol taritari huria.

¹⁴ I ataguna ram siv vano vai aben muai tataroi mai ira bwat metua ram bevea be, gam lol nomai tatauleo garagusi be gasav gan te ginau vaivotu be gai wehi Pol.

¹⁵ Haḡe kadogaha, kimiu mai kansel giv hora avoana vi hae lalai tomuai ḡoro atatun bwaloana ata Rom be vi lai Pol vai himai huri kimiu, i giv tentene be gim doron be giv ilo didininia mulei huri ginau duluai be nu vevera. Take tav vatuvwai be tav wehia amua vi siv vot teti.

¹⁶ Take mahavana be aloan Pol mwalaḡelo mwa ron̄ avoana gea; kea mwa haroro lol vatugin atatun bwaloana, i mwa bevea lalai Pol.

¹⁷ Haḡe Pol mwa uloi atatu vwate ninira tomuai mwa bevea lalainia be, “Gov lai mwalaḡelo geki vai aben tomuai ḡoro atatun bwaloana i kea mwa doron be vi vev ginau vwate lalainia.”

¹⁸ Haḡe tomuai gea mwa laia, vai aben tomuai ḡoro atatun bwaloana mwa bevea lalainia be, “Pol gabe mwa dogo radu lol gao vauvauhi mwa bevea be nav lai mwalaḡelo geki vai abemwa, bwatuna kea mwa doron be vi vev ginau vwate lalainigo.”

¹⁹ Haḡe tomuai ḡoro atatun bwaloana mwa dulei limana, i mwa lai dagainia ramuru bano gahera mwa hudalinia be, “Havanau be gom doron be goi vevea lalaiau?”

²⁰ Haḡe mwalaḡelo mwa bevea be, “Ira Jius ran vinihi tuhia be vaigogo rav hudalinigo be gov lai Pol vi hivo lalai ira Kansel, i rav tentene be ram doron be rav ilo didinini muleinia huri ginau duluai be nu vevea.

²¹ Take gosav vinihi te mwasiginira, bwatuna be ran tari vatuvwai atatu n̄avul gaivasi be rav hilinia ba wehia ḡoro hala mahavana kea hautu radu nin vanua. Ran tatauleo garagusi be rasav gan te ginau sage rasav mwin te wai vai votu be rav wehia. Kera ram hohovi huba kadogaha, take ram hohov nom avoana n̄ano.”

²² Haḡe tomuai ḡoro atatun bwaloana mwa bevea lalainia be, “Gosav vevea tehe lalai hei be gon vev ginau geki lalaiau.” I vuvuri kea mwa hora dagai mwalaḡelo gea.

Mwa Hora Dagai Pol Huri Tomuai Vevev Vilikis

²³ Haḡe tomuai ḡoro atatun bwaloana mwa uloi non tomuai gairua mwa bevea lalainira be, “Giru vi lol vatuvwai atatun bwaloana vudolu varua huri be giv vano vai Sisaria, i atatu n̄avul gaibitu la hos, i atatu vudolu varua huri sari, i giv lol vatuvwai huri be giv vano la alo gaisivo garigi bon̄i.

²⁴ I giv lol vatuvwai hos rituai huri Pol be vi lago tavuhai aluna lol tamwata vai votu i tomuai vevev Vilikis.”

²⁵ Haḡe tomuai ḡoro atatun bwaloana mwa rava letasi mwa bevea kun geki be:

²⁶ “Inau Klodias Lisias, nam rav ravrava lalainigo Tomuai vevev Vilikis: gin samwarana gaivua.

²⁷ Ira Jius ran haḡo batugehia be ramen wehi bamatea. I nam habwea be kea mwa dogo aten vilak ata Rom, i kunia nam bano mai noḡu atatun bwaloana nam lai luae.

²⁸ Nan doron be nav iloe be ran tul tenteneana vai aluna huri hano, i kunia nam laia vai hivo lol nora kansel.

²⁹ I aia nan habwea be ginau sigai be vi vevegi bamatea huria sage vi tau ana lol imwa vauvauhi; take vigaigaiana be nu tu maia huri avoan hudaligi mai nora silo n̄ano.

³⁰ I mahavana be avoanana mwa botuiau, nam binihia n̄an darihou be nav horae hurigo. Nam bevea lalainira be ran lol horoinia be, rai vev lua vahalana be ram iloe huria abemwa.”

³¹ Haḡe ira atatun bwaloana ram lolia hurinia be nu vevea. Ram lai Pol ram hivo ram botu la vanua Antipatris.

³² Mwa rani ira atatun bwaloana be ram lago gin bwalagera ram dabagilu i kera be ram lago la hos n̄ano ram hivo bul maia.

³³ Ram lagoinia vai votu Sisaria, i ram lai letasi lalai tomuai vevev i ram lin̄ Pol lalainia.

³⁴ Haḡe tomuai vevev mwa basogo letasi vuvuri mwa hudali Pol be kea mwa dogo lol ara huri hava vanua. Take mahavana be mwa habwe luae be kea lol ara non vanua Silisia,

³⁵ mwa bevea be, “Nav roron̄tai mulei nom avoana mahavana be nom ivwalu rai votu.” Haḡe mwa dau avoana lalai ira matmatai ḡoro be rav gita ḡoroe la bwatun vanuan tomuai vevev.