Lalaḡova 21 - Hano Niu Testamen

Pol mwa Bano vai Jerusalem

¹ Haḡe gam bev vitulei lalai nira vuvuri gam bano. Ataguna be gam ban tuhi aia la waḡa, gan mai vai la vanua Kos; i mwa rani gam botu la vanua Rots, vuvuri gam ban rahurahu vai Patara.

² I aia gam habwe waḡa vwate be mwa du be vi mwalue vai Vonisia, haḡe gam hivo rahurahu vai aluna i gam mwalue darihou.

³ Haḡe gam mai huri be gav gita vanua gea Saipras, i gam bano gam ḡao la n̄olin vanua i gam ban rahurahu vai Siria. Haḡe kunia gam hae vai aute la vanua Taea be waḡa men tau kaku.

⁴ Haḡe gam habwe ira binihimwasigi rituai i gam dogo bul maira huri wik gaituvwa. Haḡe ram avo gin muramura non Vui ram bevea lalai Pol be sihav vano tehe vai Jerusalem.

⁵ I kadogaha gav derainira i gam bano la halamai. Haḡe kera duluai mai tasalana i ira nituna ram hivo mai kamai vai avare nin bwatutun vanua ram botu lol one. I aia gam sisiabwau i gam dataro.

⁶ Haḡe gam bev vitulei i gam bilin̄lin̄i, i kamai gam bano mulei la waḡa gea, i kera ram dabagilu mulei vai la vanuara.

⁷ Haḡe kamai gam bano rahurahu la halamai nin Taea vai Toleme, i aia ira binihimwasigi ram lai kamai i gam dogo maira huri gubwen̄ duluai.

⁸ Haḡe mwa rani gam derai ute gea gam bano vai la vanua Sisaria i gam hae aute. I gam dogo aia lol imwan Vilip gabe vagahi vwate ninira gaibitu gabe ran gita luara Jerusalem be rav bului lol rovoga non uloilua aia.

⁹ Haḡe ira nitun Vilip vavin daulato gaivasi, ram bev lua avoana non God vataha mahavana.

¹⁰ I mahavana be kamai gam dogo radu aia huri gubwen̄ gaitolu daga mwa botu gaivasi, atatun vevsera vwate ihana Akabas, mwa mai nin Judia mwa botu abemai.

¹¹ Kea mwa mai abemai, mwa lai gaon Pol, mwa bauhi saraḡo limana i bwalagena ginia, mwa bevea be, “Geki haḡea ginau gabe Vui Sabuga mwa bevea be: Wani be gaona geki vi vauhiana la hala geki gin kamai ira Jius la vanua Jerusalem, i rav lin̄ia vai lol liman ira Lolobon̄i.”

¹² I mahavana be gam ron̄ avoana geki, kamai maira rituai gam bisigai gin Pol be sihav vano tehe vai Jerusalem.

¹³ Take mwa bwaliura be, “Gim lol havanau, gim haharigi i gim lol hantai irubwiku? Nam lin̄ muleiau siboku, mwa hav vora te huria be ramen vauhiau Jerusalem, take huri be namen mate aia la ihan Ratahigi Jisas.”

¹⁴ I kamai gasav lol te dumwia, i kunia gam leahi nomai binihiva i gam dataro gam bevea be, “Ratahigi nom doroniva n̄an vi dumwi.”

¹⁵ Haḡe ataguna be gam dogo aia huri mahavana gea, gam lol ḡoḡo nomai vataha ginau i gam derainia vai Jerusalem.

¹⁶ Haḡe ira hala rituai ata Sisaria mulei ram bano mai kamai, i ram lai kamai vai lol imwan wani gabe gav togo bulu ihana Nason kea ata Saepras, kea binihimwasigi vwate lol gubwen̄in Jisas.

Pol mwa Bano huri Semes

¹⁷ Haḡe ira binihimwasigi ram lai kamai gin samwarana mahavana be gam botu Jerusalem.

¹⁸ Haḡe gam dogo aia mwa rani gam bano bul mai Pol be vi gita Semes; i ira bwatmetua ata lol uloilua ram dogo aia mulei.

¹⁹ Haḡe Pol mwa botui nira i mwa bevuri roron ginau duluai gabe God mwa lolia lalai ira Lolobon̄i sivi non rovoga.

²⁰ I ataguna be ram roron̄tainia vuvuri, kera duluai ram uloi roron God. Haḡe ram bevea be “Tuaku Pol, gom ḡita dum sinombu ira Jius vasan̄vul vaviha gabe ram binihimwasigi, i kun hanigi kera duluai ran wasi be rav haḡo Silo.

²¹ Kera ram ron̄oe huba be giḡo gom bagahi ira Jius be ram dogo la vanuan ira Lolobon̄i be rav derai Silo non Moses, i gom bevea lalainira be rasav tav te dovon̄ana alun ira nitura i rav derai silon vanuara rituai ira Jius.

²² I kadogaha rav iloe be gon visirai gom dogo teti. I havanau vi loli kadogaha?

²³ Geki haḡea hala be gov lolia. Atatu gaivasi teti be ran lol nora tatauleo garagusi.

²⁴ Goi van rahurahu vai abera ba bulu maira lol nora tataro huri be vi lol ira rav melmelo lolmatan God. I goi vol sipsip be mwa du be rav wehia huri tataroi; i kunia rav siv hiri melmeloi dum bwatura. I la hala geki atatu duluai rav iloe be mwasigi sigai huri ginau duluai be ram bevea vai alumwa, take giḡo sibomwa gom haḡo silo non Moses radu.

²⁵ Take huri ira Lolobon̄i gabe ram binihimwasigi huba, gam hora letasi lalainira gam bev serae be kamai gam binihi tuhi be rasav gan te ginau be mwa dataroi ana ginia lalai nun vatu, sage daga, sage sipsip be rebehina mwa bibili huba, i rav gitaḡoro rebehira gin togoan teḡeteḡe alun rebehin vihogoi.”

²⁶ Haḡe kunia Pol mwa lai kera gaivasi gea ram bano. I mwa rani kea mwa bulu maira, ram lol tataroi huri lol melmeloi be rav melmelo lolmatan God. Haḡe Pol mwa haroro lol imwa Tataro be vi vev luae lalai ira tataroi, be gubwen̄ gaiviha mwa dogo radu be rav nogoi tataroi huri lol melmeloi. Huri be ira tataroi rav wehi sipsip gaivasi batahara kera gaivasi, be ran lol tuhi taron nora togoana be mwa haraharai.

Ram haḡo Batugehi Pol lol Imwa Tataro

²⁷ Take mwa abena huri nogonan gubwen̄i huri wik gaituvwa, ira Jius gabe ram dogo lol vanua Esia ram ḡita Pol lol imwa Tataro. I ram lol loḡeloḡe sinombu duluai, i bwatuna gea ram ban burigai Pol.

²⁸ Haḡe sinombu ram haharigi ram bevea be, “Ata Israel! Giv bului! Wani haḡea geki be mwa bano vataha ute mwa bagahi sinombu, i la non silo vagahi mwa ban burigai sinombu ata Israel, vaivotu silo non Moses, mai Imwa Tataro geki mulei. I kadogaha mwa lai ira Lolobon̄i rituai mulei vai teti alolon imwa Tataro ram lol bibili ute sabuga!” (

²⁹ Ram bev avoana geki bwatuna ram ḡita Trovimas ata Ivisas mai Pol alolon bwatutun vanua, i ram binihia be Pol nu laia vai alolon Imwa Tataro.)

³⁰ Haḡe tenteneana mai viavoavoana mwa lon̄ahi ute duluai lol bwatutun vanua, haḡe sinombu duluai ram rovo vai ute gaituvwa, ram bohai kaburai Pol avare nin imwa Tataro. Haḡe darihou n̄au gatavan imwa Tataro mwa ḡoro.

³¹ Haḡe vatugin sinombu gaivua ram lol ron̄oe be rai wehi Pol, kunia avoana mwa botu i Tomuai ḡoro vatugin bwaloana non ata Rom be kera ata Jerusalem ram bwalo.

³² Darihou n̄an Tomuai ḡoro vatugin bwaloana mwa lai ira lalavoa mai ira atatun bwaloana rituai ram rihu vilvilehi ram haroro alolon vatugin sinombu gaivua. I mahavana be sinombu ram ḡita dumwia mai ira atatun bwaloana, ram derai Pol ram hav mom wehia tehe.

³³ Haḡe tomuai ḡoro atatun batoana mwa bano sosori Pol mwa bevea lalai atatun bwaloana be rav haḡo batugehi Pol ba bauhia gin sen gairua. I kea mwa hudaligi be, “Ihei geki, i kea nu lol havanau?”

³⁴ Atatu rituai alolon vatugin sinombu ram bato alun avoana gaituvwa, i atatu rituai mulei ram batoi avoana dolua. Haḡe tenteneana mwa mwalue aia, i tomuai ḡoro atatun bwaloana mwa hav habwe te bavtutuinia be havanau vi loli, i kunia mwa bevea lalai non atatu be rav lai Pol vi hae.

³⁵ Haḡe ram laia vai hae la muan sin̄ado, i ira atatun bwaloana ram dataloe leahira bwatuna be sinombu ram lol horo maragai.

³⁶ I kera duluai ram hamai ataguna ram haharigi ram bevea be “Wehi bamatea!”

Pol mwa bev Halan non Avoana lalainira

³⁷ Mwa abena be ira atatun bwaloana ramen lai haroroi Pol vai lol ute wasi, kunia Pol mwa hudali tomuai ḡoro atatun bwaloana mwa bevea be: “Nai vev dum ginau abemwa?” Tomuai ḡoro atatun bwaloana mwa hudalinia be, “Matu gom avo la avoan ata Krik?”

³⁸ “Matu giḡo gom hav vora te ata Ijip gea, be tuai gon tomuai atatun bwaloana vasan̄vul vavasi vai la vanua vuroi?”

³⁹ Pol mwa bwaliua mwa bevea be, “Inau Jiu, nan vora Tasas la vanua Silisia, atatu vai la mwasin bwatutun vanua. I nam doron maragai be nav avo lalai sinombu.”

⁴⁰ Haḡe tomuai ḡoro atatun bwaloana mwa bev serae lalai sinombu, haḡe Pol mwa du amare mwa rarau mwa borotai sinombu gin limana be rav to gogonai. I mahavana be ram do gogonai, Pol mwa avo lalainira la avoana ata Hibru mwa bevea be.