Lalaḡova 20 - Hano Niu Testamen

Pol mwa Bano lol Vanua Masedonia mai Kris

¹ Haḡe ataguna be avoana mwa hivo ata, Pol mwa uloi ira binihimwasigi ute gaituvwa mwa bev non vitulei lalainira i mwa av durara. Haḡe mwa derainira mwa bano vai Masedonia.

² I kea mwa bano lol ute ivusi i mwa av dura sinombu alun avoana ivusi. Vuvuri mwa mai vai Akaia,

³ i mwa dogo aia huri vula gaitolu. Kea mwa lol vatuvwai be vi vano vai Siria i mwa habwea be ira Jius ram binihia be rav wehia; i kunia mwa binihia be vi vano mulei vai Masedonia.

⁴ Haḡe Sopata, gabe nitun Berehas nin vanua Perea kea mulei mwa bano bul maia; i kera gaivua mulei nin Tesalonaeka ramuru huria Aristaikas mai Sekandas; Kaias nin Debe; Taikikas mai Trovimas nin ute vwate Esia; mai Timoti.

⁵ Kera geki ram ban dotomua ram hohov kamai Troas.

⁶ Gam mwalue la waḡa nin Vilipae atagun Samsamwaran Bereti Vatuga, haḡe gubwen̄ gailima ataguna gam botui nira la vanua Troas, i gam dogo aia wik gaituvwa.

Nogonan Lagoana Non Pol La Vanua Troas

⁷ La Sarere ute ravravi gam ḡoḡo ute gaituvwa huri gina ganian bulbulu. Haḡe vi rani Pol gim bano, i kunia kea mwa avo mai sinombu ute ravravi vaivotu abobon bon̄i.

⁸ Haḡe kandel ivusi lol vwavwan imwa be gam ḡoḡo aia.

⁹ Take mwalaḡelo vwate ihana Iutikas mwa dogo la windo, i mahavana be Pol mwa avo vain̄ava mwa ban abobon bon̄i. Iutikas mwa daibwatihi mwa maturu maragai vaivotu be mwa hovi nin gaitolun rum amare mwa hiv mwa bora lol tano. Haḡe ram lai luae, take nu mate huba.

¹⁰ Take Pol mwa hivo mwa sara bolvolo aluna mwa avin̄ai wasinia, mwa bevea be, “Gisav ron̄ te mwahantai, kea mwa rahu radu!”

¹¹ Haḡe kea mwa hae mulei lol vwavwan imwa amare, mwa biha bereti mwa ḡania. Haḡe mwa avo maira vaivotu alo mwa hae, kea mwa siv vano ninira.

¹² Kera ram lai mulei mwalaḡelo gea vai la vanua ara, mwa rahu huba, i kera ram ron̄ mwa davuha maragai huria.

Kera ram Mwalue nin Troas ram Bano vai Maelitas

¹³ Haḡe gam bano la waḡa vwate vai la vanua Asos, huri be gav lai Pol aia, kea nu vano aute.

¹⁴ I mahavana be mwa habwe kamai Asos, gam laia la waḡa gam bano vai Mitilin.

¹⁵ Haḡe gam mwalue nin aia, i mwa rani gam siv votu la vanua Kios. I gubwen̄i rituai ataguna, gam mai vai la vanua Samos, i mwa rani ataguna gam siv votu la vanua Miletas.

¹⁶ Pol mwa binihia be vi ḡao avare aben vanua Ivisas, huri be sihav sabwelei te mahavana lol vanua Esia. Kea mwa bilvilehi be vi votu Jerusalem be si dumwi, gim siv vora gubwen̄ Pentikos.

Avoan Vitulei non Pol Lalai ira Bwatmetua Ivisas

¹⁷ Pol mwa hora avoana nin Maelitas vai Ivisas, mwa hudali ira bwatmetua lol uloilua aia be vi gitara.

¹⁸ I mahavana be ram botu kea mwa bevea lalainira be, “Gim iloe huri mahavana duluai be nan togo mai kimiu, nin muan gubwen̄i be nan votu lol vanua Esia.

¹⁹ Nam lol rovoga kera gea bwatuna be inau atatun rovoga n̄an vuroi non nonda Ratahigi, be binihiḡu mwa do tirigi. I vataha mahavana mataruaku mwa rovo huri kimiu. I vataha mahavana taro lalaiau nu hav tavuha tehe, bwatuna be ira Jius ram dari halana be rav lol hantaiau.

²⁰ Gom iloe be nam hav haḡo te dau havanau be vivora buluiana lalainigo, kunia be nam doretore i nam bagahi huria lol ute bulbulu i la imwamiu.

²¹ Lalai ira Jius mai ira Lolobon̄i be rav van burigai nin vurora lalai God i rav binihimwasigi alun nonda Ratahigi Jisas.

²² I kadogaha nai vano vai Jerusalem, i nam hav ilo te havanau be vi loli lalaiau aia. Take nam lin̄ian siboku la muramura non Vui Sabuga.

²³ Nam iloe n̄ano be lol bwatutun vanua duluai, Vui Sabuga mwa lol bisirainia lalaiau be nav togo lol imwa vauvauhi i nav ron̄ ḡagarasi.

²⁴ Take nam binihi rahuku kun be ginau vuroi n̄an vwate lalaiau siboku; ita noḡu doroniva n̄ano be tatan̄an lalaḡova be inau alolona mai noḡu rovoga gabe Ratahigi Jisas nu horau huria vi hara harai, be nav seserai Roroi Tavuha huri hogoi non God.”

²⁵ “Nan vano vataha ute duluai abemiu, nam doretore huri Ute Ratahigi non God. I Kadogaha nam iloe be vwate nin kimiu sihav mom ḡita te muleiau.

²⁶ Haḡe bwatuna gea nam bev luae lalai kimiu lol gubwen̄ garigi; be ihei tehe vi sala, mwa hav vora te bwatuna inau.

²⁷ Huri be nam hav sigi te dum ginau vwate gin kimiu gabe mwa du be nai vevea, take nav seserai ginau duluai gabe God mwa doronia.

²⁸ Giv gita ḡoro kimiu sibomiu, i giv gita ḡorora gabe Vui Sabuga nu taura la limamiu. Kimiu giv vora radaiḡoro huri uloilua non God, gabe kea nu lolia huria sibona sivi mateanan Nituna.

²⁹ Nam iloe be, la mahavana be nai vano, viriu turu rav mai atagumiu ba ḡan n̄oton̄oto sipsip.

³⁰ Tarona vi mai be atatu rituai n̄an mulei alolomiu rav tentene ba domuai letei ira binihimwasigi be rav hurira.

³¹ Giv gita ḡoro maragai bwatuna be, nan vagahi kimiu duluai huri taul gaitolu i mataruaku mwa rovo huri kimiu bon̄i i rani.”

³² “I kadogaha nam lin̄ kimiu ta aten muramura non God i gin avoana huri non hogoi, gabe vi lol kimiu giv mauri wasigi, i vi lai lalai kimiu vatavuha God mwa laia huri non sinombu.

³³ I nau nam hav doron te vatlegiga non atatu mai vatan̄oga i gaisaga.

³⁴ Kimiu sibomiu gim iloe be nam lol rovoga hahavwani gin limaḡu gairua kera geki huri vataha ginau be inau maira be gam lol rovoga ute gaituvwa gam doronia.

³⁵ Nam lol seserai hala duluai lalai kimiu huri rovoga hahavwani la hala geki be tav buluira gabe ram rihu holhole, i gin vinihi dum avoana be Ratahigi Jisas Sibona nu vevea be, ‘Samwarana liu huri ginau be gom hogoinia ninia be atatu mwa hogosigo ginia.’ ”

³⁶ Mahavana be Pol mwa avo vuvuri, mwa sisiabwau bul maira ram dataro.

³⁷ Kera duluai ram dei maragai ram rimrimia i ram bev vitulei lalainia.

³⁸ Kera ram ron̄ mwahantai liu bwatuna be nu vevea lalainira be rasav mom ḡita te mulei nai. Haḡe ram hivo bul maia la waḡa.