Lalaḡova 19 - Hano Niu Testamen

Pol mwa Dogo Ivisas

¹ Haḡe mahavana be Apolos mwa dogo Korin, Pol mwa lago alolon vanua duluai vaivotu be mwa botu Ivisas. Aia mwa habwe ira hala rituai,

² i mwa hudalinira mwa bevea be, “Kimiu mahavana be gin binihimwasigi gin lai Vui Sabuga?” Haḡe ram bwaliua be, “Gan hav mom ron̄oe tehe n̄an haḡea be Vui Sabuga abena.”

³ Pol mwa hudalinira be, matu be kunia, “Hava garuhi sabuga be gin laia?” Haḡe ram bwaliua be, “Garuhisabuga non Jon.”

⁴ Pol mwa bevea be, “Garuhisabuga non Jon hurira gabe ram binihi leahi nin vurora; i nu vevea lalai sinombu ata Israel be rav binihimwasigi alun wani gabe mwa mai ataguna, kea gin binihiva be alun Jisas.”

⁵ Haḡe mahavana be ram ron̄ avoana geki, ram lai garuhisabuga la ihan Ratahigi Jisas.

⁶ Pol mwa dau limana alura, i Vui Sabuga mwa hivo alura; i ram avo gin avoan dodolua i ram bev lua roroi non God.

⁷ Kera duluai han̄vul domwan gairua.

⁸ Haḡe Pol mwa avo wasi lalai sinombu lol imwa tataro gaivua i mwa haḡo ḡoḡoana maira huri vula gaitolu, i mwa suvwai nira be rav iloe huri ute Ratahigi non God.

⁹ Take kera rituai ram hav roron̄tai tehe gin nora binihiva i ram hav binihi te mwasigi, haḡe ram bev avoan hahantai vai alun halan silo vagahi huri Ratahigi lolmatan sinombu duluai.

¹⁰ Haḡe mwa loli kungeki huri taul gairua, huri be atatu duluai be ram dogo lol vanua a Esia, ira Jius mai ira Lolobon̄i duluai ram ron̄ avoana non Ratahigi.

Ira Nitun Skeva

¹¹ God mwa lol Pol, mwa lol ginau dan̄an̄a la hala ivusi.

¹² Vaivotu be susuru gabe mwa man̄ lolmatana ginia i gaisagana be mwa sagae lol taron rovoga, ram laia ram sibweri ira harova ginia i harova ram nogo ninira, i vui hantai mulei ram mwalue ninira.

¹³ Haḡe ira Jius rituai mulei ram lago kunia ram ḡoro lua vui hantai, ram lol ron̄oe be rav avo la ihan Ratahigi Jisas. Haḡe ram bevea lalai Vui hantai be, “Nam ḡoro lua kimiu la ihan Jisas gabe Pol mwa doretore huria.”

¹⁴ Haḡe ira huhu gaituvwa gaibitu, gabe ira nitun Muai Tataroi nora Jius ihana Skeva, kera haḡea be ram lol ginau dan̄an̄a la hala geki.

¹⁵ Take vui hantai mwa bevea lalainira be, “Nam ilo Jisas, i nam iloe huri Pol; take kimiu ira hei?”

¹⁶ Haḡe wani gabe vui hantai alolona mwa muramuraga i mwa wehi hantainira ram dadaga vai votu be mwa haravira duluai. I kera ram mwalue nin imwana ram ḡagarui dagara i gaisagara ran mahehera kaburai.

¹⁷ Haḡe ira Jius mai ira Lolobon̄i gabe ram dogo Ivisas ram ron̄oe huri ginau geki; i kera duluai ram masiri gin mataguana, i ram gogonai maragai ihan Ratahigi Jisas.

¹⁸ I ira binihimwasigi ivusi ram domare ram bev luae be tuai ran lalaḡoi mateana i halan iloute hahantai ivusi.

¹⁹ Haḡe atatu ivusi be ran lalaḡoi gabwaleva mai ginau hahantai ram lai nora buka duluai i ram dun kaburainia lolmatan sinombu, haḡe tovtovon volin buka duluai nu dadariha kun matotobwai vatlegiga vasan̄vul van̄avul gailima.

²⁰ Haḡe avoana non Ratahigi mwa ḡaoḡao i mwa mauri wasigi la hal muramuraga geki.

Vigaigaina vwate lol Vanua Ivisas

²¹ Atagun ginau geki be nu loli, Pol mwa binihi tuhi be vi lago sivi Masedonia, Akaea i vi vano vai Jerusalem. Haḡe mwa bevea be, “Ataguna be nai vano aia, mwa du be nav gita vanua Rom mulei.”

²² Haḡe mwa lai mahavana n̄ava huba lol vanua Esia, kea mwa hora buluina gaivua Timoti mai Erastas vai Masedonia.

²³ Lol mahavana haḡe gea be vigaigai ana gaivua vwate nu togo lol vanua Ivisas, huri Halan Ratahigi.

²⁴ Atatu vwate mwa dogo aia mwa lol vataha ginau alun vatlegiga, ihana Demetrias. I aia, atatu ivusi ram ḡogonai tagaro vwate gabe vavine, ihana Atemis. Haḡe Demetrias mwa lol imwa kokolo la vatlegiga, kokolo kun imwa tataro huri Atemis. I mahavana be mwa saleinira kea mai non atatu ram lai homu gaivua.

²⁵ Haḡe mwa uloi non atatu duluai mai atat dodolua mulei gabe nora rovoga ran dadariha mwa bevea lalainira be, “Kimiu duluai gim iloe be rosoda duluai mwa mai alun rovoga n̄au kera geki.

²⁶ I kadogaha gim ḡitae i gim ron̄oe sibomiu huri ginau gabe atatu tiri geki Pol mwa lolia. Mwa bevea be tagaro be tanon liman atatu barabe mwasin tagaro, kea mwa leahi binihiva non atatu ivusi i mwa rav atatu ivusi, lol ute gairua teti Ivisas, i mwa abena be vanua Esia duluai.

²⁷ Vivora ute hantai gea be, nonda rovoga duluai vi hovi. I mwa hav vora te kea n̄au, take imwa tataro non tagaro vavine Atemis vi vora ginau vuroi n̄au, i non tanon lavoa vi masalan̄ai lalai atatu duluai lol vanua Esia mai ureure duluai!”

²⁸ Haḡe mahavana be sinombu ram ron̄ avoana geki, lolora mwa horo maragai ram dau bwatuna ram bato amare, ram bevea be, “Hurei lalai Atemis ata Ivisas!”

²⁹ Haḡe sinombu gaivua lol bwatutun vanua ram dau bwatuna ram haharigi. Haḡe ram haḡo batugehi ata Masedonia gaivua Kaias mai Aristakas, gabe ram lago mai Pol, haḡe ram ravara vai lol tanon ḡoḡoana.

³⁰ Pol mwa doron be vi avo mai sinombu, take ira binihi, mwasigi ram do ḡoroe.

³¹ Haḡe ira lalavoa rituai gabe ira buluana non Pol, ram hora avoana lalainia ram hudalinia be sihav lol te bisirainia lol tanon ḡoḡoana.

³² Haḡe sosobwero ana gaivua mwa du, i atatu rituai ram avo la avoana gaituvwa, i tatanan̄a vwate mwa avo la avoana gaituvwa, bwatuna be atatu ivusi ram hav iloe tehe be ram mai bulbulu huri hano.

³³ Atatu rituai ram bevea la nogonan nora avoana be Aleksanda haḡe bwatun ginau gea, i bwatuna gea ira Jius ram sogainia mwa hae lolmatan sinombu. Haḡe Aleksanda mwa hagai limana amare mwa borotai sinombu be rav tu ḡoḡonai, i mwa lol ron̄oe be vi tu ḡorora gin non avoana.

³⁴ Take batena be ram ḡita batoia be kea Jiu vwate, ram haharigi amare kunia mulei huri aowa gairua ram bevea be: “Hurei lalai Atemis ata Ivisas!”

³⁵ Haḡe atat lavoa vwate ata lol bwatutun vanua mwa lol sinombu ram du ḡoḡonai gin non avoana, mwa bevea lalai sinombu be, “Kimiu ata Ivisas?” “Atatu duluai ram iloe be bwatutun vanua Ivisas mwa du lol limanda be tav gitaḡoro imwa tataro non Atemis gabe nu sabuga maragai, i vatu sabuga gabe nu hovi amare nin mahao.

³⁶ Atatu vwate mwa hav lol te salil silon ginau kera geki. Haḡe kunia mwa du be nomiu binihiva vi to mahurigi, i gisav lol te hantai ginau vwate.

³⁷ Gim lai ira taru geki ramuru mai teti, take ramuru hav lol te hantai ginau vwate lol nonda imwa tataro, sage ramuru hav av te hantai vai alun nonda tagaro gabe vavine.

³⁸ Matu, be Demetrias mai non atatun rovoga ram lol vain avoana mai ihei tehe, atatu abena i gubwen̄ina abena be rav haḡo harahara maira: i vi dumwi kunia.

³⁹ Take be ginau te mulei amare aluna be gim doronia, mwa du be vi tau ana sivi ḡoḡoana non mwasin ata teti.

⁴⁰ Huri be atagun ginau gabe mwa lol i teti garigi, ute hantai mwa en huba aia i nu maron̄ron̄o be rav tau gida lol imwan harahara huria. I ḡolanana sigai be men tuḡoro ginau geki i tasav lai te dum avoana vwate gi ḡolanana be nu tavuha.”

⁴¹ Haḡe ataguna be mwa avo vuvuri, mwa ḡoro gatavan avoana.