Lalaḡova 15 - Hano Niu Testamen

Ḡoḡoana mwa Dogo Jerusalem

¹ Haḡe atatu rituai ram mai nin Judia vai Antiok ram bagahi sinombu ram bevea be, “Gisav rahu te dumwi vaivotu be vi tav dovon̄ana alumiu kun gabe silo non Moses mwa bevea.”

² Haḡe bwatuna gea Pol mai Banabas ramuru bigaigai maira huri avoana geki, haḡe Pol mai Banabas ramuru binihi tuhi be kera bul mai ata Antiok rituai rai vano vai Jerusalem ba ḡita ira hala rituai mai ira bwatmetua huri ginau geki.

³ Haḡe uloilua mwa horara, i mahavana be ram botui Vonisia mai Samaria, ram bevea lalai sinombu huri halana kunhanigi ira Lolobon̄i ram binihimwasigi God, i roroi geki mwa lai samwarana gaivua lalai ira binihimwasigi duluai.

⁴ I mahavana be ram botu Jerusalem, ira binihimwasigi mai ira hala, i ira bwatmetua ram lai ḡoḡora. Haḡe Pol maira rituai ram bevuri ginau duluai lalainira kunhanigi God mwa lalaḡo sivi nora lalaḡova.

⁵ Haḡe ira binihimwasigi rituai alolora ira Varise ram du amare ram bevea be, “Vi tav dovon̄ana alun ira Lolobon̄i, i tai vagahira be rav huri silo non Moses.”

⁶ Haḡe ira hala mai ira bwat metua ram ḡoḡo bulbulu be ramen binbinihi alun avoan hudaligi geki.

⁷ I ataguna be ram biavo avo aluna mwa n̄ava huba Pita mwa du amare mwa bevea be, “Ira tua, gim iloe be tuai huba God nu uloilua nin kimiu be nan toretore lalai ira Lolobon̄i, huri be rav ron̄oe i rav binihimwasigi.

⁸ I God gabe mwa ilo binihin vataha atatu, mwa seserai non mwasigi gin tabeana alun ira Lolobon̄i, ginia be mwa lai non Vui Sabuga lalainira, kunia n̄an gabe nu laia lalai kamai.

⁹ Nu lolia la hala gea nuhav dolua tehe nin kamai; Kea nu binihi kaburai vurora bwatuna gabe ran binihimwasigi.

¹⁰ Be kunia, huri hano be kadogaha gim doron be giv ruruhi God ginia be gim ibi ira binihimwasigi gin ginau marahi, bwatuna ira sibida sage kamai sibomai mulei gan hav tatal te dum ginau marahi kunia?

¹¹ Gida tam binihi mwasigi i tam rahu gin hogoi non Ratahigi Jisas, kunia n̄au gabe mwa lolia lalainira.”

¹² Haḡe tatan̄an sinombu gaivua duluai gea ram ron̄ vevurin ginau duluai be Banabas mai Pol ramuru lolia huri tagaro i ginau dan̄an̄a gabe God mwa lolia sivinira lalai ira Lolobon̄i.

¹³ I ataguna be ramuru avo vuvuri, Semes mwa av lua mwa bevea be: “Ira tuaku giv ron̄oau!

¹⁴ Saimon mwa siv tugu halana lalai gida kunhanigi God mwa bisirai muana lalai ira Lolobon̄i be men lai dagai tatan̄ana vwate huria sibona.

¹⁵ Avoana non ira atatun vev sera mwa dum ginau duluai geki. Bwatuna be ravrava sabuga mwa bevea be,

¹⁶ ‘Ratahigi mwa bevea be, ataguna geki nav tabagilu mulei, i nav haḡo domarei ute ratahigi non Deved. I nav lol huri mulei wasinia.

¹⁷ I kunia atatu duluai lol ureure rav mai huriau, i ira Lolobon̄i gabe nau uloinira be rai vora bilaku siboku.’

¹⁸ Haḡe Ratahigi, gabe nu vev sera ginau geki tuai huba.”

¹⁹ Semes mwa bev rahurahuinia be, “Geki mwasin noḡu binihiva, be tasav salai te binihiva non ira Lolobon̄i gabe ran tabagilu huba huri God.

²⁰ Take, mwa du higea be tav rava letasi ba bevea lalainira be rasav gan te ginau be nu bibili bwatuna be mwa dataroiana ginia lalai ira nunu buhiga; i rasav togo te deḡeteḡe mai vavine; i rasav gan te boe be mwa davan roto na mwagorona mwa dadaga.

²¹ Bwatuna be Silo non Moses mwa basogoana mwa mai tuai huba vataha gubwen̄ mambuharai lol Imwa Tataro, i mwa doretore huri non avoana vataha bwatutun vanua.”

Ira Hala mai ira Bwatmetua ram Hora Ravrava vwate mwa Bano lalai Uloilua

²² Haḡe ira hala mai ira bwatmetua, i ira binihimwasigi duluai ram binihi tuhi be rav hora lua atatu rituai ninira mai Pol i Banabas vai Antiok. Haḡe ram ḡita lua atatu gairua gabe ira binihimwasigi ram binihi marahinira, Judas, mwa uloinia be Basabas, mai Sailas,

²³ i ram horara mai ravrava geki, i mwa bevea alolon ravrava geki be: “Kamai ira hala mai ira bwatmetua, gabe ira tuamiu, gam hora nomai samwarana lalai kimiu ira tuamai gabe gin vora alolon ira Lolobon̄i take kadogaha kimiu ira tuamai gim dogo lol vanua Antiok, Siria, mai Silisia.

²⁴ Kamai gam ron̄oe be atatu rituai gabe ran matu nin teti ran lol kimiu gim ron̄ mwahantai i binihimiu mwa lalan̄aga gin havanau gabe ran vevea; take gan hav vev te avoana kunia lalainira be ramen matu ba lolia kunia.

²⁵ Haḡe kunia gam haḡo ḡoḡoana i gam dara alun binihiva be gav hora atatu rituai mai avoana lalai kimiu. I raru vi matu bul mai nomai buluana Banabas mai Pol,

²⁶ gabe ramuru lin̄ rahura alun rovoga non Ratahigi gida Jisas Kraes.

²⁷ I gam Judas mai Sailas gin mwasin rebehira be raru vi vevea la lol matamai huri ginau n̄an geki be gam ravae.

²⁸ Haḡe Vui Sabuga i kamai gam dame be gasav tau te ginau marahi mulei alumiu gi tuan silo geki mwa eno huba be nuhav tavuha tehe:

²⁹ be mwa bevea be gisav gan te ginau be mwa dataroi ginia lalai nunu buhiga; i gisav gan te daga; mai buluki be mwa dav n̄andu mwagorona; i gisav togo te deḡeteḡe mai vavine. Nomiu lalaḡova vi tavuha be gisav lol te ginau kera geki. Nomai samwarana gaivua lalai kimiu.”

³⁰ Haḡe uloilua mwa hora lua ira horata ram bano vai Antiok, i aia ram hara ḡoḡo ira binihimwasigi duluai i ram lai ravrava lalainira.

³¹ I mahavana be sinombu ram basogoe, ram masiri gin samwarana huri roroi i avoan dura.

³² Haḡe Judas mai Sailas gabe kera atatun vevsera, ramuru dogo vain̄ava maira ramuru lai avoan dura i ramuru suvwainira be rav muramuraga.

³³ I ataguna be ramuru dogo aia ira binihimwasigi ram hora muleinira lol tamwata vai abera be ran horara.

^34-35 Pol mai Banabas ramuru dogo huri mahavana n̄ava huba Antiok. I aia atatu ivusi ram bulu maira, i ram bagahi, i ram doretore huri avoana non Ratahigi.

Pol mai Banabas ramuru Harabora

³⁶ Haḡe gubwen̄ dolua ataguna, Pol mwa bevea lalai Banabas be, “Mwa du be tai vano ba barahi ron̄ ira tuada mulei vataha bwatutun vanua gabe tan toretore huri avoana non Ratahigi, mulei huri be tamen iloe be ram do te kun hanigi kadogaha.”

³⁷ Haḡe Banabas mwa doron be vi lai Jon Mak bul maira,

³⁸ take Pol mwa binihia be nu hav tavuha tehe be raru vi laia, bwatuna be nu van burigai i mwa lin̄ira tuhi bobon nora lagoana la bwativuna la vanua Pamvilia.

³⁹ Haḡe vigaigaiana gaivua maragai lol davolan Pol mai Banabas, i bwatuna gea ramuru harabora: i Banabas mwa lai Mak i ramuru bano la waḡa vai Saipras,

⁴⁰ i Pol mwa ḡita lua Sailas be vi huria ba raruvi vano, haḡe ira binihimwasigi ram hudaligi sivi tataro be hogoi non Ratahigi vi togo bul maira.

⁴¹ Haḡe ramuru bano vai lol vanua Siria mai Silisia ramuru lol wasi uloilua gin nora avoan dura.