Lalaḡova 14 - Hano Niu Testamen

Pol mai Banabas lol Vanua Ikoniam

¹ Mwa lol n̄an mulei kunia lalainira lol vanua Ikoniam. Pol mai Banabas ramuru bano vai lol imwa Tataro ramuru avo la hala be ira Jius rituai mai ira Lolobon̄i ram ron̄ora ram binihimwasigi.

² Take ira Israel rituai gabe ram hav binihi te mwasigi ram lol loḡeloḡe ira Lolobon̄i i ram ban burigai ira binihimwasigi.

³ Haḡe ira hala ram dogo aia huri mahavana n̄ava, i ram avo wasigi huri Ratahigi. Ratahigi mwa lol bisirainia be nora avoana mwasigi huri non hogoi ginia be mwa lai muramura lalainira huri tagaro i ginau dan̄an̄a.

⁴ Haḡe sinombu lol bwatutun vanua ram harabora tavalura ram huri ira Jius i tavalura mai ira hala.

⁵ Haḡe ira Jius rituai mai ira Lolobon̄i, mai nora tomuai duluai, ram binihi tuhia be rav wehi bamat ira hala, rai vohara gin vatu.

⁶ Take mahavana be ira hala ram iloe, ram rov maragai vai la bwatutun vanua ata Listra mai Debe la vanua Likonia.

⁷ I ramuru doretore huri Roroi Tavuha.

Pol mai Banabas la Vanua Listra mai Debe

⁸ Atatu vwate rebehina mwa rihu holhole lol mahavan non vorana la vanua Listra i mwa hav lago te dum sibona.

⁹ Kea mwa dogo aia mwa roron̄tai avoana non Pol. I Pol mwa ḡitae be kea mwa binihimwasigi, i vi rahu dumwi, i kunia mwa ḡita mamaragainia

¹⁰ mwa bevea lalainia gin silo gaivua be, “Tomare ba du bavtutu!” Haḡe atatu gea mwa du amare darihou i mwa lago.

¹¹ Haḡe sinombu gaivua maragai mwa gita ginau gabe Pol mwa lolia, ram dau bwatuna ram haharigi la mwasin nora avoana ata Likonia ram bevea be, “God mwa bora atatu i mwa himai ataa huri gida!”

¹² Haḡe ram dari ihan Banabas be Sias, i Pol kea Homis, bwatuna kea mwa bora tomuai huri avoana.

¹³ Haḡe tataroi non god Sias, gabe non imwa tataro mwa dogo atagun bwatutun vanua avare, kea mwa lai buluki mai virangai be nu sosoria ginia i mwa laia vai la matgatavan bwatutun vanua, bwatuna be kea mai sinombu duluai gea ram doron be rav tataroi lalai ira hala.

¹⁴ I mahavana be Banabas mai Pol ramuru ron̄oe huri havanau be ram doron be ramen lolia, i ramuru hehera gaisagara ramuru rovo vai alolon sinombu bora vora tumu ramuru haharigi amare ramuru bevea be,

¹⁵ “Hurihano be gim lol ginau kungeki? Kamaru sibomaru atatu vuroi n̄an kun kimiu! Kamaru teti kadogaha huribe garumen seserai Roroi Tavuha, i be rav men lol kimiu be giv taleva nin ginau vurovuroi huri mwasin God, gabe nu tau ute atamare, mai tahi i ureure duluai i ginau duluai gabe mwa du alolona.

¹⁶ Tuai maragai kea nu lol sinombu be rav tomuainira sibora.

¹⁷ Take vataha mahavana kea mwa lol seserainia be kunhanigi rahuna alun vataha ginau tavtavuha, mwa lol uhe mwa uhe nin ute atamare i mwa lol ute loloara ram mwasiga lol mwasin tarona. I kea mwa hogoi ginaganiana lalai kimiu, i mwa lol kimiu gim samsamwara lol nomiu binihiva.”

¹⁸ Len̄len̄a be ramuru bev avoana geki mwa abena be ira hala raru men hav tu te ḡoro dum sinombu be ram doron be rav tataroi lalainira.

¹⁹ Haḡe ira Jius rituai ram mai nin Antiok lol vanua Pisidia, i nin vanua Ikoniam, i sinombu gaivua ram bulu maira, haḡe ram boha Pol gin vatu i ram rav kaburainia nin bwatutun vanua, ram binihia be kea nu mate huba.

²⁰ Take mahavana be ira binihimwasigi ram bivisirai ram dalisia kea mwa domare i mwa haroro mulei lol bwatutun vanua. Haḡe gubwen̄ dolua ataguna, kea mai Banabas ramuru bano vai la vanua Debe.

Pol mai Banabas ramuru Dabagilu mulei vai Antiok lol Vanua Siria

²¹ Pol mai Banabas ramuru doretore huri Roroi Tavuha la vanua Debe i ramuru lai atatu ivusi ram bora ira hala. Haḡe ramuru bano mulei vai Listra, lol vanua Ikoniam, i ramuru ban rahurahu vai Antiok lol vanua Pisidia.

²² Ramuru lol wasi ira binihimwasigi i ramuru av durara be rav tu wasi alun nora binihimwasigi garagusi. Haḡe ramuru bevea be, “Mwa du be tai van sivi ute ririhai ivusi vuvuri tam siv van lol Rahuan gara gabe God mwa bora ratahigi alolona.”

²³ Haḡe ramuru ḡita lua tomuai vataha imwa tataro, i ramuru dataro gin maro gagasi huria lalai Ratahigi gabe ram binihi mwasigi aluna.

²⁴ Haḡe ataguna be ramuru ban sivi utuhin Pisidia, ramuru botu Pamvilia.

²⁵ I aia ramuru doretore lol vanua Beka i ramuru ban rahurahu vai Atalia,

²⁶ i nin aia ramuru bano mulei la waḡa vai Antiok, geki ute gabe atatu ran tataro lalai God, huri be vi lai hogoi lalainira be kadogaha raru men lol haraharainia.

²⁷ Haḡe mahavana be ramuru botu Antiok, ramuru hara ḡoḡo sinombun uloilua duluai ute gaituvwa, i ramuru bevea lalainira huri ginau duluai gabe God nu lolia bul maira, i kun hanigi kea nu havan̄ hala huri ira Lolobon̄i be rav binihimwasigi.

²⁸ Haḡe ramuru dogo aia Huri mahavana n̄ava mai ira binihimwasigi.