Lalaḡova 11 - Hano Niu Testamen

Avoana non Pita lalai Uloilua Jerusalem

¹ Haḡe ira hala mai ira binihimwasigi lol vanua Judia duluai ram ron̄oe be ira Lolobon̄i mulei ram lai dum avoana non God.

² I mahavana be Pita mwa bano vai Jerusalem, ira binihimwasigi be ram doron be rav lol tav dovon̄ana alun ira Lolobon̄i ram hun̄ainia ram bevea be,

³ “Giḡo gom dogo la vanuara Lolobon̄i gabe mwa hav tav te dovon̄ana alura radu, vaivotu be gom ḡan ginau bul maira.”

⁴ Haḡe kunia Pita mwa bevuri lalainira huri ginau duluai gabe nu loli la bwativuna mwa bevea be,

⁵ “Mahavana be nam dataro la bwatutun vanua Jopa, i nam hueri. I nam ḡita ginau mwa himai nin ute atamare kun be bwabwabwan̄i gaivua mwa lin̄iana mwa hivo i mwa haḡo wasiana la siguna gaivasi dalisia i mwa hivo vaivotu mwa mambu abeku.

⁶ I mahavana be nam ḡarere sosoria vai alolona i nam ḡita lalan̄an vataha ginau van̄ani mai boe i man turu.

⁷ Haḡe nam ron̄ silo mwa bevea lalaiau be, ‘Pita, wehi ginau kera gea ba ḡania.’

⁸ Take nam bevea be, ‘Sigai len̄len̄a, Ratahigi. Ginau be nu hav tavuha tehe, i ginaganian bibili mwa hav haroro tehe lolvwaku.’

⁹ Haḡe silo mwa avo mulei nin ute atamare mwa bevea be, ‘Gosav vev te dum ginau be God nu lolia mwa melmelo huba, be nu bibili.’

¹⁰ Ginau geki mwa loli vatolu la hala geki vuvuri, mwa hae n̄oton̄oto mulei vai lol ute atamare.”

¹¹ “I atatu gaitolu nin Sisaria ram botu darihou lol mahavana haḡe gea lol imwa gabe nan dogo alolona.

¹² Haḡe Vui mwa bevea lalaiau be nai van bul maira darihou haḡea. Haḡe ira binihi mwasigi gaiono nin vanua Jopa ram bano bul maiau vai Sisaria, i kamai duluai gam bano vai la imwan Konilias.

¹³ I kea mwa bevea lalai kamai huri halana be kunhanigi kea nu gita enjel be nu tu alolon imwana, i enjel mwa bevea lalainia be, ‘Gov hora atatu rituai vai Jopa huri atatu gabe ihana Saimon Pita.’

¹⁴ I kea vi avo lalainigo huri be giḡo mai ira ata la imwamwa duluai giv rahu.”

¹⁵ “I mahavana be nam dau bwatuna nam avo, Vui Sabuga mwa himai alura kun gabe nu himai alumai la bwativuna.

¹⁶ Haḡe nam binihi dum avoana be Ratahigi nu vevea be, ‘Jon nu garuhisabuga gin wai, take kimiu giv garuhisabuga gin Vui Sabuga.’

¹⁷ I mwa melmelo didinigi be God mwa lai hogoi lalai ira Lolobon̄i kunia n̄an be nu laia lalai kamai mahavana be gan binihimwasigi alun Ratahigi Jisas Kraes, i kunhanigi be inau namen tomare be du ḡoro God.”

¹⁸ Haḡe mahavana be ram ron̄oe kunia, ram hav mom avte hantai vai aluna, take ram uloi roron God ram bevea be, “I mulei be God mwa lai mahavana lalai ira Lolobon̄i tanon binihi leahi i rahuana.”

Uloilua Antiok

¹⁹ Haḡe ira binihimwasigi rituai gabe ran visalsala lol mahavan taron ron̄ ḡagarasi batena be ram wehi Stivin i ram bano vai la vanua, Vonisia, Saipras, i Antiok, ram bev roroi lalai ira Jius n̄ano.

²⁰ Take, ira binihimwasigi rituai ata Saipras i Sairini, ram bano vai Antiok ram bev lua roroi lalai ira Lolobon̄i, i mulei ram be Roroi Tavuha lalainira huri Ratahigi Jisas.

²¹ Haḡe muramura non Ratahigi mwa dogo maira, i sinombu gaivua maragai ram binihimwasigi i ram dabagilu huri Ratahigi.

²² Haḡe roroi huri ginau geki mwa botui uloilua Jerusalem, i kunia ram hora Banabas vai Antiok.

²³ I mahavana be mwa botu i mwa ḡitae be God mwa batavuhai sinombu, kea mwa samsamwara i mwa bevea lalainira duluai be rai vavtutu lalai Ratahigi gin sibwen̄ira duluai.

²⁴ Banabas kea atatu tavuha, i nu masiri gin Vui Sabuga, i binihimwasigi i mwa lai sinombu ivusi huri Ratahigi.

²⁵ Haḡe Banabas mwa ban vai Tasis huri be men atei Sol.

²⁶ I garagusi mahavana be mwa habwea mwa laia vai Antiok, haḡe ira tarua geki ramuru dogo mai sinombun uloilua huri taulu gaituvwa i ramuru bagahi tatan̄an sinombu gaivua. Haḡe mwa siv vora muana be sinombu ram uloi ira binihimwasigi be atatun uloilua.

²⁷ Haḡe lol mahavana haḡe gea ira atatun vevsera rituai ram bano nin Jerusalem vai Antiok.

²⁸ I atatu vwate ihana Akabas mwa du amare mwa dovtovo gin roron̄o non Vui be ureure duluai mwa abena be vi maroga lol mahavana gea Klodias nu vora ratahigi.

²⁹ Haḡe ira hala ram binihi tuhia be atatu gaitutuvwai vatvatahara vi lai udun bilana huribe vi bului ira binihimwasigi rituai gabe ram dogo Judia.

³⁰ Haḡe ram lolia vuvuri ram hora Banabas i Sol mai vai lol liman ira bwat metua ḡoro imwa tataro aia.