Kolosi 4 - Hano Niu Testamen

¹ Ira Ratahigi, giv lai hano be nu vavtutu lalai ira non turi. Gov iloe be nom Ratahigi lavoa vwate mwa dogo amare.

Havanau gabe Atat Binihimwasigi rav Lolia

² Giv tu rahurahu lol nomiu tataro, giv mamata, i giv avkari God.

³ Giv tataro mulei huri kamai be God vi lai non mwasigi lalai kamai be gav toretore dumwi la ginau dahuligi be God nu lol melmeloinia huri Kraes. Kea haḡea kadogaha nam dogo lol imwa vauvauhi.

⁴ Giv tataro be nav avo dumwi la hala be lolia vi melmelo, kunia be nas lolia.

⁵ Giv mataisaoga lol alen̄amiu mai kera be ram hav binihimwasigi tehe, giv lol nomiu mwasigi duluai.

⁶ Lol taro be gom avo, gov av mahurigi i av maḡemu huribe gov vwaliu dum atatu duluai la hala be mwa du be gov lolia.

Avoan Helheloi lalai Atatu nin Pol

⁷ Tikikas kea tuaku lol Kraes i atat mwasigi i atatun rovoga maiau lol God. Vi vevea lalainigo ginau duluai be mwa loli maiau.

⁸ Kea haḡea bwatuna nam horae: huribe gov iloe kun hanigi haḡe kamai gam dogo i kea vi av dura kimiu.

⁹ Nam horara mai Onesimas, atat mwasigi i vavtutu lol Kraes, i kea lol nomiu tatan̄ana. Kera rai vev ginau duluai be mwa loli teti.

¹⁰ Aristakas, atatu vauhi maiau, i Mak, tuan Banabas, ram lai nora avoan helheloi lalai kimiu. (Nan vevea huba huri hano be giv lolia huri Mak, be vi mai, giv lai ḡoḡoe.)

¹¹ Josua, gabe mwa uloiana be Jastas, mulei mwa lai non avoan helheloi lalai kimiu. Kera n̄ano ira atat binihimwasigi la varan Israel be ram lol rovoga maiau huri ute ratahigi non God, i kera ran vora gitaḡoro lalaiau.

¹² Epavras, atatun rovoga non Jisas Kraes, lol nomiu tatan̄ana, mwa lai non avoan helheloi lalai kimiu. Mwa dataro vataha gubwen̄ hurigo be gov mauri lol Vui Mituaga i gov haḡo ginau duluai be God mwa doronia hurigo.

¹³ Nam iloe be nu lol rovoga hahavwani hurigo mai sinombu ata Laodisia mai lol Hierapolis.

¹⁴ Luk kea nonda dokta be tam dabe mutainia, mai Dimas, ramuru hora nora avoan helheloi lalainigo.

¹⁵ Giv la helheloi lalai ira tuada Laodisia. I giv helheloi Nimva mai sinombu be ram la bulbulu aten imwana.

¹⁶ Ataguna be avoana geki nu vasogoana lalai kimiu, gov iloe be vi vasogoana mulei lol imwa tataro Laodisia. I gov vasogo ravrava mulei be ira tuada Laodisia rav horae lalainigo.

¹⁷ Vevea lalai Akibas, “Gov lol ron̄oe be gov nogoi rovoga gabe God nu laia lalainigo.”

¹⁸ Inau, Pol nam lai avoan helheloi lalai kimiu i nam rav avoana geki gin mwasin limaḡu. Gisav vinihi te malioi gao vatu be ram bauhiau aluna lol imwa vauvauhi. Hogoi non God vi togo maigo.