Kolosi 2 - Hano Niu Testamen

¹ Nam doron giv ilo taro ririhai be nan lol rovoga huri kimiu, kera Laodisia, i kera dodolua be vorate ram ḡita hohoiau.

² Nam doronia be rav muramuraga i rav bul gaituvwa lol lolotabetabe be rav rosoga lol nora iloilo. La hala n̄an gea ram ilo ute rosoga dahuligi non God, kea Kraes sibona.

³ Kraes kea bwatun gaihavan̄i be mwa haḡo ira ute rosoga dahuligi, kun ira iloilo i mataisao non God.

⁴ Nam bevea kungeki huribe atatu vwate si hav saruruhigo tehe gin vigaigaiana be men tavuha, take tenteneana.

⁵ Len̄len̄a be inau sigai maigo lol rebehiku, irubwiku mwa dogo maigo, i nam samwara be nav gita rahumwa tavuha i nom binihimwasigi garagusi alun Kraes.

Giv tu Wasigi lol Ihan Kraes

⁶ Kunia be gim lai Kraes Jisas gabe Ratahigi i giv bulgaituvwa maia.

⁷ Giv tau bwatbwatumiu vi roro aluna i giv lol rahumiu vi mauri aluna. Giv tu wasi lol binihimwasigi garagusi, kun be gin lai silo vagahina, i giv masiri gin tabeana.

⁸ Gov iloe be atatu vwate si hav tomuai te dagainigo gin silo vagahi tentene gabe mwa mai nin atatu n̄ano, be mwa mai nin ira Vui hantai ata lol ureure geki, i vorate nin Kraes.

⁹ Rahun God duluai lol Kraes sibona be mwa mai gi atatu.

¹⁰ I gom dogo gin rahuana duluai be gom bulu lol Kraes, gabe nu holomare hae liu ira tomuai duluai i muramura.

¹¹ Mulei lol Kraes gim haḡo lalan̄an tav dovon̄a, tav dovon̄a gabe mwa hav loli tehe gin lima. Kea sivi tav dovon̄a non Kraes, gabe, mateana, gabe mwa lai luago nin nom muramura sibomwa.

¹² Lol taro be gon garuhisabuga, ram davinigo mai Kraes, i gom domare mulei maia sivi nom binihimwasigi garagusi lol muramura non God gabe mwa seseraiana lol taro gabe mwa domarei mulei Kraes nin mateana.

¹³ Lol taro gabe gom mate gin vuromwa, huribe vorate gom maribwesi nin muramuran vuromwa sibomwa. Bwatuna be kimiu ira Lolobon̄i, kimiu gim dogo avare nin Silo. Take God mwa loligo gom rahurahu mai Kraes, i mwa binihi kaburai vuroda duluai.

¹⁴ Mwa lin̄ kaburai vuro, gabe God nu ravae mai ira silo vevegi duluai huria i mwa lol nogonogoinia lol taro be mwa boha bolvoloana la volovolo.

¹⁵ La volovolo gea, Kraes mwa maribwesi dagai nin ira muramura non ira vuin vwalaua be ran hantai. Kraes nu haravira huba, i mwa lolia lalainira kun ratahigi lavoa be mwa harav ira non ivwalu, i mwa domuainira ram bano lolmatan sinombu be atatu rav gitara.

Gosav huri te Silo non Atatu

¹⁶ Gosav lin̄ te atatu vwate be vi lol silo la halan gangani mai mwinmwinu sage huri gubwen̄ sabuga, gubwen̄ samwaran vula hala botu, sage la Gubwen̄ Mambu.

¹⁷ Ginau kerageki ran kun gabe nunuan ginau vwate be vi mai. Take ginau be nu mwasigi i nu vavtutu nu mai kea Kraes n̄ano.

¹⁸ Gosav lin̄ te atatu vwate be vi vevegigo huribe atatu keragea ram binihi sagera huri kera ira mataigigila i ram ḡogonai ira enjel. Bwatbwatun nora binihiva sigai i ram ravravwega huribe binihin atatu n̄ano.

¹⁹ Ram hav tu te wasi la Kraes, gabe bwatbwatuna. Kraes kea bwatun rebehi. Kraes kea mwa bwalao rebehi n̄oto. Mwa ban̄an rebehi i mwa haḡo bulbulua ute gaituvwa mai ira hui i ira wesi. Rebehi gea mwa mauri la halana be God mwa doronia be vi mauri.

²⁰ Lol taro be gon mate mai Kraes i mwa lai luago nin ira Vui hantai ata lol ureure, huri hano haḡea gom lolia kun gabe gam dogo lalai ureure radu be gom huri ira silo kungeki.

²¹ “Gosav sibweri te ginau gea,” “Gosav gan te ginau gea,” “Gosav sibweri te ginau dolua gea?”

²² Silo kerageki kea huri ginau ata lol ureure gabe ram bano lol taro be tam haḡora. Ram mai gi ginau vuroi n̄ano bwatuna be kea ira silo non atatu n̄ano i silo vagahi.

²³ Bwatbwatun ira silo geki gitavanana nu hav tavuha tehe, huribe ram haḡo alen̄ tentene n̄ano huri lin̄mulei. I ram lol gogona tentene lalai ira enjel, i ram lol ron̄oe be ramen vwalau rebehira gin alen̄a be nu marahi i nu wasi. Take ginau gea mwa hav buluira tehe be ramen vwalau rebehira nin alen̄an vuro lol rebehi.