Kelesia 6 - Hano Niu Testamen

Giv Bulbului Kimiu

¹ Ira tuaku, be atatu vwate lol nomiu tatan̄ana mwa lol ginau vahala, giḡo gabe gom dogo lol Vui gos vano aben wani gea ba buluia ba lol bavtutu muleinia. Take giv gitaḡoro, bere gim ḡal kimiu vai lol vuro mulei.

² Be giv bulbului kimiu lol nomiu togoan ririhai, kimiu mwasigi gim dabe silo non Kraes.

³ Be atatu vwate mwa binibe kea liu be mwa hav vora te kunia, kea mwa lol mulei daltaleinia sibona.

⁴ Atatu gaitutuvwai rav vevegi nora loliana sibora, i si hav dadarihainia tehe mai atat dolua, i Vui vi sagereinia huri hano be kea sibona nu lolia.

⁵ Atatu gaitutuvwai rav gitaḡorora mahaḡea sibora.

⁶ Ihei tehe be mwa huhui silo vagahi non God, mwa du be vi hara ginau tavuha duluai be vi betea mai non vagahi.

Rahuana kun gabe mwa Rivuana na Talu

⁷ Gisav taltale tehe: Gisav saruruhi te dum God. Atatu ram lai mwasin hano n̄ano be ram rivua.

⁸ Be ram ririvu be ramen lol lumlumuhira sibora, vurora sibora vi lai lalainira ginau nogonogo. Take be rav ririvu be ramen lol tavuhai Vui, rav lai rahuan n̄ava nin Vui.

⁹ Si hav sav gita te gida gin lolian tavuha. Tav lai vwain bilada gin rahuana vai tuai la mwasin tarona kebe si hav sav te gida.

¹⁰ Lol taro be nonda rovoga be tav bului atatu, mwa du be tas lolia. Take tas lai nonda mwasin loliana lalainira gabe ram dogo lol tatan̄an binihimwasigi garagusi.

Pol mwa Nogoi non Ravrava

¹¹ Giv gita ravrava lalavoa be nam ravae siboku.

¹² Atatu rituai ram lol kimiu be ramen tav dovon̄ana alumiu, huribe ram sasagerega lol ginau ata lol rebehi n̄ano. Ram matagu be rav lol ḡagarasira be rav huri volovolo non Kraes.

¹³ Kera gabe ram dav dovon̄ara ram hav huri te silo sibora, take ram doron kimiu be rav tav dovon̄a alumiu huribe rav sagereinira huri hano be ram lol kimiu be giv lolia.

¹⁴ Nam ilo be nasav sagesagerega tehe huri ginau kunia. Volovolo non Jisas kea n̄ano be mwa lolia nam av sagesagerega. Sivi volovolo non Jisas Kraes, noḡu Ureure mwa boha bolvoloana, i nam mate lalai Ureure.

¹⁵ Mwa hav vora te liu be atatu mwa lai tav dovon̄a sa sigai. Muan ginau liu be rav lol garainira mai atatu gara be God nu lolira.

¹⁶ Tamwata i sine hagavi lalainira be ram huri silo geki i lalai atatu non God duluai.

¹⁷ Haḡe gisav lai tehe lalaiau taro ririhai mulei vwate. Dovon̄a abena la rebehiku be mwa seserainia be inau turin rovoga non Kraes Jisas.

¹⁸ Ira tuaku, hogoi non Ratahigi Jisas Kraes vi togo mai nomiu vui. Amen.