Kelesia 5 - Hano Niu Testamen

Haḡo Batugehi nomiu Maribwesi.

¹ Tam haḡo maribwesi kadogaha, bwatuna be Kraes nu lol gida gi atat maribwesi. Giv tu wasigi. Gisav leahi tehe i ba ban mulei lol vauvauhi non silo.

² Gov roron̄tai, inau Pol nam bevea lalai kimiu.

³ Mulei, nam bevea lalai atatu duluai be; Be giv mahin̄ai kimiu sibomiu be rav tav dovon̄ana alumiu, giv huri silo duluai.

⁴ Be gim lol ron̄oe be gimen vavtutu mai God sivi silo, rahumiu mai Kraes mwa du dagai nin hogoi non God.

⁵ Take gida tam haḡo mwasin doronhohov be mwa mai nin lolian vavtutu mai God, i gin Vui non God tam hohovi gin doroniva maragai huri doronhohov geki.

⁶ Mahavana be gida lol Kraes Jisas, mwa hav vora te maragai be tav lai tav dovon̄a sa sigai. Muan ginau mutai be binihimwasigi lalan̄an binihimwasigi garagusi be mwa lol rovoga sivi lolotabetabe.

⁷ Kimiu gim rovo huri rovoan tavuha. Ihei mwa du ḡorogoro kimiu be gisav huri te mwasin hala?

⁸ Leahi geki mwa hav mai tehe nin atatu be nu gita luago.

⁹ Giv gitaḡoro! “Is kolo n̄ano mwa lol disin vulaoa mwa buge.”

¹⁰ Take nam du wasigi lol Ratahigi be gisav binihi te mwasigi ira lalan̄an binbinihi dodolua kera gea. Ihei tehe be mwa lol kimiu gim bilen̄alen̄a gin lalan̄an binbinihi kunia vi lai silo vevegi.

¹¹ Ira tuaku, nam hav vagahi tehe be mwa du maragai be atatu vi lai tav dovon̄a. Be nav vagahi tav dovon̄a, huri hano haḡea ram bwalo maiau radu? Be nas vagahi tav dovon̄a radu, noḡu toretore huri volovolo si hav vora te ginau ririhai vwate.

¹² Nam binihi maragainia be kera be ram lol bidoi kimiu ras tav kaburainira.

¹³ Ira tuaku, God nu uloi kimiu huba gi atat mwaribwesi, take gisav haḡo te nomiu ribwesiva gi hala vwate be vi lol kimiu gi atat vuroga sibomiu. Giv lol rovoga lalai kimiu sibomiu gin lolotabetabe.

¹⁴ Silo duluai mwa lol haraharainia gin avoan wasi gaituvwa n̄ano: “Gov tabe tuamwa kunigo sibomwa.”

¹⁵ Be giv lol rahurahuinia be giv varihai mulmulei kimiu i giv haḡo bora kimiu lealea, giv gitaḡoro, besigai giv lol n̄oto bwarebware mulmulei kimiu.

Doroniva non Vui i Doroniva non Rebehi.

¹⁶ I nam bevea lalai kimiu: Giv togo be giv huri vui. I gisav lol te hano be kimiu sibomiu gim doronia.

¹⁷ Nonda doroniva siboda mwa doron hano be mwa hav eno tehe lol Vui, i Vui mwa hav doron te hano be mwa en lol nonda doroniva. Ginau gairua geki ramuru barivarihainira, i gisav lol te dum hano n̄ano be gim doronia.

¹⁸ Take be Vui mwa domuai kimiu, gim hav togo tehe halaten silo.

¹⁹ Ginau vahala be vuro sibona mwa lolia ran melmelo: Kera be ram lol vahala mai vavine, ran hav melmelo tehe, ram lol ginau vahala maragai mai rebehi,

²⁰ gogonai nun vatu, ram lol gabwaleva, ram binbinihi hantai, ram lolhoro, ram bugubugura, ram lol atatu ram lolhoro ginginira, ram lol harabora lol davolan atatu,

²¹ ram botui tovtovo non atat dolua, ram mwinmwinu daltale, ram lol ginaganian lalavoa gin doroniv hantai i ram lol ginau dodolua kungeki. Nam lai avoan wasi lalai kimiu kadogaha kunia be nan laia amua: Kera be ram lol ginau keragea rasav haḡo te houn ute ratahigi non God.

²² Take Vui mwa baivusi vwain lolotabetabe, samwarana, tamwata, ron̄ mwan̄ava, lolotavuha, tavuha, binihimarahi,

²³ lin̄muleini i sine togonai. Silo vwate sigai be men vevea be ginau kerageki ran vahala.

²⁴ Kera gabe ram dogo lalai Kraes Jisas ram boha volvol mulei vurora sibora. Ram lin̄ mulei nora ron̄ova ata tuai i ginau hahantai be ram doronbe ramen lolia.

²⁵ Tam lai rahuan gara nin Vui Sabuga, i tav huri Vui.

²⁶ Tasav ravwega tehe, sage lol ginau hahantai gingin gida sage binbinihi hantai mulmulei mai gida.