Kelesia 4 - Hano Niu Testamen

¹ Nam doron be nai vev lalainigo ginau geki: Lol taro be kera be rav haḡo manduen ira tamara ran vora naturirigi radu, ran hav dolua tehe nin ira turin rovoga. Len̄len̄a be naturirigi kera gea rav gitaḡoro ginau n̄oto.

² Lol taro be kera naturirigi, mwa du maragai be rav tabe kera be nu gitan luae be rav gitaḡorora. Take lol taro be naturirigi ram botui taulu be ira tamara ran gita dautaua, ram maribwesi.

³ Kunia mulei huri gida. Gida lol taro vwate kun naturirigi, atat vauhi lalai ira silo lete lol ureure geki.

⁴ Take lol taro be taro vavtutu mwa mai, God nu hora nituna, be nu vora nin vavine i nu togo halaten silo.

⁵ God nu lolia kungeki huribe vi vol dum mwasigi non kera be ram dogo halaten silo i tav mai dumwi gi ira nituna.

⁶ Kunia be kimiu ira nitun God, God nu hora vuin nituna vai lol irubwimiu, i vui gea nu haharigi amare be, “Tata.”

⁷ I kadogaha gim hav mom bora te turin rovoga, giḡo nitun God, i God vi lai lalainigo vatavuha be nu tatauleo huria, bwatuna giḡo nituna.

Binihivwasi non Pol huri ata Kelesia.

⁸ Amua gon hav ilo te God, i gon vora turi lalai tagaro be mwa hav vora te mwasina.

⁹ Take kadogaha gom ilo God mwasigi. Mwasigi, kea God be mwa ilogo. I huri hano be gom ban mulei huri ira silo mandamanda i silo lete be gon hurira amua? Gom doronia be goi vora turi huri ginau keragea mulei?

¹⁰ Gom huri radui ira silo vagahi huri ira raumatan gubwen̄i vula, taro i taulu.

¹¹ Nam matagu hurigo, be noḡu rovoga hurigo nu sabweleiana.

¹² Ira tuaku, nan mai kun kimiu, i nam hudaligi kimiu be giv mai kuniau. Gin tavuha liu lalaiau amua.

¹³ Gin vinihi dumwia be ron̄ mwahantai be nan mai abemiu muana, nan toretore huri Roroi Tavuha.

¹⁴ Len̄len̄a be noḡu harova nu vora ginau hantai lalai kimiu, gin hav varihaiau tehe sage gin hav lolia tehe be nai vano. Take gim lai ḡoḡoau kun gabe enjel nin God, kun gabe inau Kraes Jisas sibona!

¹⁵ Gim ron̄ mwandavuha mulei, take behe haḡea ron̄ mwandavuha gea kadogaha? Nan lol vatuvwai be nai vev luae be giv lai lua matamiu giv laia lalaiau be vi dumwi.

¹⁶ Kadogaha nam bora nomiu ivwalu bwatuna be nam bevea lalai kimiu huri mwasigi?

¹⁷ Atatu keragea ram lol rovoga hahavwani be rav leahi kimiu be giv van burigai kamai i giv hurira n̄ano.

¹⁸ Nu tavuha lalai atatu be rav seserainia be ran lol huri kimiu, take kea n̄ano kebe nora binihiva vi tavuha. Geki mwasigi tagaro, vorate lol taro n̄ano be inau mai kimiu.

¹⁹ Ira nituku, mulei nam ron̄ ḡagarasin bavavana hurigo vaivotu gom mai mwasigi kun Kraes.

²⁰ Nam binihia be nas togo maigo kadogaha i nav leahi dum hala be nam avo mai kimiu, bwatuna be nam len̄ai hano be nav vinihia huri kimiu.

Malele non Heka mai Sera.

²¹ Tavalumiu ram doron be ramen togo halaten silo radu. Vevea lalaiau, gim ilo hano be silo mwa bevea?

²² Ravrava sabuga mwa bevea be Ebraham nituna gairua. Ratahin nituna vwate kea turin rovoga, i ratahin nituna vwate kea vavin maribwesi.

²³ Nitun Ebraham kebe nin turin rovoga nu vora la mwasin halan atatu. Take nituna nin vavin maribwesi nu vora bwatun tatauleo gabe God nu laia lalai Ebraham.

²⁴ Vevuri geki kea nunu vwate be mwa bagahi huri ginau dolua vwate: vavine gairua gea ramuru dovon̄ai leowasi gairua lol davolan God mai non sinombu. Heka turin rovoga mwa dovon̄ai dameiana be nu lolia la vusi Saenae. Atatu be mwa bavara ram bora turi.

²⁵ Heka mulei mwa bora dovon̄a huri vui Saenae lol vanua Arabia i bwatun vanua lavoa Jerusalem be mwa du teti. Kea mai ira nituna ram bora ira turi.

²⁶ Take Jerusalem atamare, kea kun vavin maribwesi i ratahida.

²⁷ Mwa ravana lol ravrava sabuga be, “Gov samwara Jerusalem. Giḡo kun be vavine be mwa mwanmwani. Tau bwatuna ba lol iboi i haharigi huri Samwarana. Gom hav ron̄ te ḡagarasin bavavana, Take ira nitumwa rai vora ivusi liu Vavine ahoana abena.”

²⁸ Ira tuaku, kimiu ira nitun God bwatun non tatauleo, kunia be Aisak.

²⁹ Naturigi atamwani gabe nu vora la mwasin halan atatu mwa lol bwarebware tuana vwate. Kea nu kunia n̄an garigi.

³⁰ Take hano haḡea ravrava sabuga mwa bevea? “Vohai kaburai turin rovoga gea mai nituna. Nitun turin rovoga si hav haḡo te houn ginau vwate. Nitun vavin maribwesi vi haḡo houn ginau duluai.”

³¹ I ira tuaku, gida tan hav vora te ira nitun turin rovoga, take ira vavin maribwesi.